ގަވައިދުން ފެން ބިލު ދައްކަމުން ދަނިކޮށް, ގޭގެ ވެރިފަރާތުން ފެން މީޓަރުގައި ތަޅު އަޅުވާ, ފެނުގެ ހިދުމަތް މެދުކަނޑާލުމުގެ މައްސަލަތަކެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަން ފަށައިފި އެވެ.

އެޗްއާރްސީއެމުން ބުނީ އެ ކޮމިޝަނަށް ހުށަހަޅަމުން ދަނީ, ގަވައިދުން ބިލު ދައްކަމުން ދަނިކޮށް ގޭގެ ވެރިފަރާތުގެ އެދުމުގެ މަތިން ފެން މީޓަރުގައި ތަޅުއެޅުވުމުގެ މައްސަލަ އާއި, ފެން ކުންފުންޏަށް އެންގުމަކާ ނުލާ ގޭގެ ވެރިފަރާތުން އަމިއްލައަށް ފެން މީޓަރުގައި ތަޅުއަޅުވާ, ފެނުގެ ހިދުމަތް މެދުކަނޑާލާ މައްސަލަތައް ކަމަށެވެ.

މި މައްސަލަތައް ތަހުގީގު ކުރަމުން ދާއިރު, މިފަދަ މައްސަލަތަކުގައި ޝާމިލުވާ މީހުންނާއި, ގުޅުންހުރި އިދާރާތަކާ މަޝްވަރާކޮށްގެން ބައެއް މައްސަލަތަކުގައި ހައްލު ހޯދިފައިވާ ކަމަށް ވެސް އެ ކޮމިޝަނުން ބުނެ އެވެ.

ފެނުގެ ހިދުމަތް މެދުކަނޑާލުމަކީ އެ ގެއެއް ނުވަތަ ގޭބިސީއެއްގައި ދިރިއުޅޭ މީހުންނަށް މިކަނުގެ ސަބަބުން ނޭދެވޭ އަސަރު ކުރާނެ ކަމަކަށް ވާތީ އެޗްއާރްސީއެމުން ކަންބޮޑުވުން ފާޅުކޮށްފައިވެ އެވެ. އަދި ގާނޫނުއަސާސީގައި ބަޔާންކޮށްފައިވާ ގޮތުގެ މަތިން މެނުވީ, އެއްވެސް ހައްގެއް އެއްވެސް މިންވަރަކަށް ނުހިފެހެއްޓޭނެ ކަން އެ ކޮމިޝަނުން ފާހަގަކުރި އެވެ.

ހިއުމަން ރައިޓްސް ކޮމިޝަނުން ވަނީ, އާންމު ފަރުދުންގެ މެދުގަ އާއި, އާންމު ފަރުދުންނާއި އިދާރަތަކުގެ މެދުގައި ދިމާވާ މައްސަލަތައް ގުޅުން ހުރި އިދާރާއަކަށް ހުށަހެޅުމާއެކު ގާނޫނީ އިމުގެ ތެރެއިން ހައްލު ހޯދުމަށް އިލްތިމާސްކޮށްފަ އެވެ.