އަންނަ މަހު ބާއްވަން ނިންމާފައިވާ ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިހާބުގައި ވާދަކުރަން ހުޅުވާލި ފުރުސަތު ހަމަވިއިރު، ރައީސަކަށް ކުރިމަތިލެއްވީ މިހާރު ވެސް އެ މަގާމުގައި ހުންނެވި، އަލީ ރަޝީދު (އައްޔަ) އެކަނި ކަމަށް ޓީޓީ އެސޯސިއޭޝަނުން ހާމަކޮށްފިއެވެ.

ޓީޓީ އެސޯސިއޭޝަންގެ އިންތިހާބު އަންނަ މަހުގެ 10 ވަނަ ދުވަހު ބާއްވަން މި މަހު ދެ ވަނަ ދުވަހު ބޭއްވި ޓީޓީ އެސޯސިއޭޝަންގެ ހިންގާ ކޮމިޓީގެ ޖަލްސާގައި ނިންމިއިރު، އިއްޔެގެ 14:00 ގެ ނިޔަލަށް ވަނީ މަގާމުތަކަށް ކުރިމަތިލާން ހުޅުވާލައިފަ އެވެ.

އެ ގޮތުން މަގާމުތަކަށް ކުރިމަތިލުމުގެ ސުންގަނޑު ހަމަވިއިރު، ކޮންމެ މަގާމަކަށް ވެސް ކުރިމަތިލާފައިވަނީ އެންމެ ފަރާތެކެެވެ. މި އަހަރު މިހާތަނަށް ބޭއްވި ސްވިމިން އެސޯސިއޭޝަން އާއި އެތުލެޓިކްސް އެސޯސިއޭޝަންގެ އިންތިހާބުގައި ވެސް ކޮންމެ މަގާމަކަށް ކުރިމަތިލެއްވީ އެއް ފަރާތް ކަމަށްވާތީ ނެގީ ފެންނަ ނުފެންނަ ވޯޓެކެވެ.

އެ ގޮތުން، ޓީޓީ ރައީސް ކަމަށް އައްޔަ ވަނީ ތިން ވަނަ ދައުރަކަށް ކުރިމަތިލައްވައިފަ އެވެ. ނައިބު ރައީސްގެ މަގާމަށް ކުރިމަތިލެއްވީ، މިހާރު ވެސް އެ މަގާމުގައި ހުންނެވި، އިބްރާހިމް ޝިއުރީ އެވެ. ޝިއުރީ ދާދި ފަހުން ވަނީ، މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ) ގެ މެނޭޖިން ޑިރެކްޓަރުގެ މަގާމަށް އައްޔަނުކޮށްފަ އެވެ.

ޓީޓީ އެސޯސިއޭޝަންގެ އިންތިހާބުގައި އެހެން މަގާމުތަކަށް ކުރިމަތިލެއްވި ފަރާތްތަކަށް ބަލާއިރު، ހަޒާންދާރަކަށް އަހުމަދު ޝާޒިލް، ހިންގާ ކޮމިޓީގައި ފުރިހަމަ މެމްބަރުން ތަމްސީލްކުރާ އަންހެން މެމްބަރަކަށް އައިޝަތު ފަދުވާ ރަޝީދު، ހިންގާ ކޮމިޓީގައި ފުރިހަމަ މެމްބަރުން ތަމްސީލްކުރާ ފިރިހެން މެމްބަރަކަށް، އަމްޕަޔަރު، އައްޒާމް އިބްރާހިމް، ހިންގާ ކޮމިޓީގައި ކްލަބް ޖަމިއްޔާތައް ތަމްސީލްކުރާ މެމްބަރު ކަމަށް ޖާދުﷲ ހަސަން އަދި ހިންގާ ކޮމިޓީގައި އެސޯސިއޭޓް މެމްބަރުން ތަމްސީލްކުރާ މެމްބަރު ކަމަށް އިސްމާއިލް ސުޖާއު އެވެ.

މި އަހަރުގެ އޮލިމްޕިކްސްގައި ރާއްޖޭގެ ޗެފް ޑި މިޝަނަރަކަށް ހަމަޖައްސާފައިވާ އައްޔަ އަކީ 2006 އިން 2008 އަށް އެސޯސިއޭޝަންގެ އިދާރީ މަސައްކަތްތައް ކުރިއިރު، 2008 ވަނަ އަހަރުން ފެށިގެން ޓީޓީގެ ނައިބް ރައީސް އެވެ. އަދި އެންމެ ފުރަތަމަ ރައީސަކަށް އިންތިހާބުވީ، ވާދަވެރިއަކު ނެތި، 2016 ވަނަ އަހަރު ބޭއްވި އިންތިހާބު ކާމިޔާބު ކުރައްވައިގެންނެވެ. އެކަމަކު، އެންމެ ފަހުން، 2020 ވަނަ އަހަރު ބޭއްވި އިންތިހާބު ވާދަވެރިކޮށް ދިޔައިރު، އައްޔަ، ވަނީ ދެ ވަނަ ދައުރަކަށް އިންތިހާބުވެވަޑައިގެންފަ އެވެ.