ތުރުކީ އަކީ މި ފަހަރުގެ ޔޫރޯ ފުޓްބޯޅަ މުބާރާތަށް، ހަތް ވަނަ އަށް ކޮލިފައިވި ޓީމެވެ. މިއީ ތުރުކީ އިން ޔޫރޯ ފުޓްބޯޅަ މުބާރާތުގައި ކުޅޭނެ ހަ ވަނަ ފަހަރެވެ. ތުރުކީ އިން މީގެ ކުރިން ޔޫރޯގައި ވާދަކޮށްފައިވަނީ، 1996، 2000، 2008، 2016 އަދި 2020 ވަނަ އަހަރު އެވެ.

ޔޫރޯ ފުޓްބޯޅަ މުބާރާތެއްގައި ތުރުކީގެ އެންމެ ރަނގަޅު ކުޅުމެއް ފެނުނު ފަހަރަކީ، 2008 ވަނަ އަހަރު އޮސްޓްރިއާ އާއި ސްވިޒަލެންޑްގައި ބޭއްވި މުބާރާތުގަ އެވެ. އެ ފަހަރު، ތުރުކީ އިން ސެމީ ފައިނަލަށް ދަތުރުކުރި އެވެ. އެ ފަހަރު، ސެމީ ފައިނަލުގައި ތުރުކީ ބަލިވީ ޖަރުމަނު އަތުން 3-2 އިންނެވެ.

އެންމެ ފަހުން، ދެ ފަަހަރު ޔޫރޯ ފުޓްބޯޅަ މުބާރާތުގައި ވާދަކޮށް ތުރުކީ ކެޓީ ގްރޫޕް ސްޓޭޖުންެނެވެ. އެ ދެ ފަހަރު، ޖުމްލަ ހަ މެޗު ކުޅުނުއިރު، މޮޅުވީ އެއް މެޗުންނެވެ. ފަސް މެޗުން ވީ ބައްޔެވެ.

މި ފަހަރުގެ ޔޫރޯ ފުޓްބޯޅަ މުބާރާތަށް ތުރުކީ ކޮލިފައިވީ، ކޮލިފައިން ގްރޫޕް ޑީގެ އެއް ވަނަ ޓީމުގެ ގޮތުގަ އެވެ. ތުރުކީ، އެ ގްރޫޕްގެ އެއް ވަނަ ހޯދީ، އަށް މެޗުގެ ތެރެއިން ފަސް މެޗުން މޮޅުވެ، ދެ މެެޗުން އެއްވަރުކޮށްގެންނެވެ. ކޮލިފައިންގައި ތުރުކީ ބަލިވި ހަމައެކަނި މެޗަކީ، އަމިއްލަ ދަނޑުގައި ކްރޮއޭޝިއާ އަތުންނެވެ.

ތުރުކީ ގައުމީ ޓީމުގެ ކޯޗަކަށް ހުރީ އިޓަލީ ގައުމީ ޓީމުގެ ކުރީގެ ފޯވާޑް، ވިންޗެންޒޯ މޮންޓެއްލާ އެވެ. މޮންޓެއްލާ، ތުރުކީ ޓީމާ ހަވާލުވީ، މިދިޔަ އަހަރުގެ ސެޕްޓެމްބަރު މަހު އެވެ. މޮންޓެއްލާގެ ފުރަތަމަ މެޗުގައި ތުރުކީން ވަނީ ރަށުންބޭރުގައި ކްރޮއޭޝިއާ ބަލިކޮށްފަ އެވެ.

މި ފަަހަރުގެ ޔޫރޯގައި ތުރުކީން އެންމެ ތަފާތު ކުޅުމެއް ދައްކާނެ ކަމަށް ބެލެވެނީ، އިންޓަ މިލާންގެ މިޑްފީލްޑަރު، ހަކަން ޗަނޮނޮގްލޫ އެވެ.

ތުރުކީ، މި ފަހަރުގެ މުބާރާތުގައި ހިމެނޭ ގްރޫޕަށް ބަލާއިރު، ޖޯޖިއާ އާއި ޕޯޗުގަލް އަދި ޗެކް ރިޕަބްލިކް ކައިރިން އެ ޓީމަށް އަނެއް ބުރަށް ދެވޭނެ ވަރުގެ ނަތީޖާ ނެރެވޭނެ އެވެ.