ސްލޮވާކިއާ މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވީ، ކޮލިފައިން ގްރޫޕް ޖޭގެ ރަނަރަޕްގެ ގޮތުގަ އެވެ. މިއީ، ސްލޮވާކިއާ އިން ޔޫރޯގައި ކުޅޭނެ ހަ ވަނަ ފަހަރެވެ. މީގެ ކުރިން، ސްލޮވާކިއާ ވަނީ، 1960، 1976، 1980، 2016 އަދި 2020 ވަނަ އަހަރުގެ ޔޫރޯގައި ވާދަކޮށްފަ އެވެ.

ޗެކޮސްލޮވާކިއާގެ ނަމުގައި ކުޅުނުއިރު، އެ ޓީމުން ވަނީ، 1976 ވަނަ އަހަރު މުބާރާތުގެ ޗެމްޕިއަންކަން ހޯދައި، ޖެހިގެން އައި ފަހަރު ތިން ވަނަ ހޯދައިފަ އެވެ. އެކަމަކު، ސްލޮވާކިއާގެ ނަމުގައި ވާދަކުރަން ފެށި ފަހުން، ކޮލިފައިވި ދެ ފަަހަރުގެ ތެރެއިން އެއް ފަހަރު ގަދަ 16 ގައި ކުޅުނެވެ. އެންމެ ފަހުން ޔޫރޯގައި އެ ޓީމު ކެޓީ ގްރޫޕް ސްޓޭޖުންނެވެ.

މި ފަހަރުގެ ޔޫރޯ އަށް ކޮލިފައިވާން، ސްލޮވާކިއާ ހިމެނުނީ، ހަ ގައުމު ވާދަކުރި ގްރޫޕެއްގަ އެވެ. އެ ގްރޫޕްގެ އެއް ވަނަ ހޯދީ ޕޯޗުގަލް އެވެ. ދެ ވަނަ ޓީމުގެ ގޮތުގައި ސްލޮވާކިއާ ކޮލިފައިވިއިރު، އެ ޓީމުން ކުޅުނު 10 މެޗުގެ ތެރެއިން ހަތް މެޗުން މޮޅުވި އެވެ. ބަލިވީ ޕޯޗުގަލްއާ އެކު ކުޅުނު ދެ މެޗުން އެކަންޏެވެ.

ސްލޮވާކިއާގެ ކޯޗަކަށް ހުރީ، އިޓަލީ އަށް އުފަން، ފްރެންޗެސްކޯ ކަލްޒޯނާ އެވެ. ކަލްޒޯނާ، 2022 ވަނަ އަހަރުގެ އޮގަސްޓް މަހުން ފެށިގެން، ސްލޮވާކިއާގެ ކޯޗުކަން ކުރަމުން އަންނައިރު، އޭނާ ވަނީ މި އަހަރުގެ ފެބްރުއަރީ މަހު އިޓަލީގެ ނަޕޯލީގެ ކޯޗުކަމާ ވެސް ހަވާލުވެފަ އެވެ. މި ސީޒަނުގެ ނިޔަލަށް ނަޕޯލީގެ ކޯޗަކަށް ކަލްޒޯނާ ހުންނަން ސްލޮވާކިއާ އިން ވެސް ހުއްދަދީފައިވެ އެވެ. އެކަމަކު، ޔޫރޯ އަށް ފަހު މުސްތަގުބަލަށް ގޮތެއް ނިންމާނެ އެވެ.

މި ފަހަރުގެ ޔޫރޯގައި ސްލޮވާކިއާ ހިމެނޭ ގްރޫޕަށް ބަލާއިރު، ބެލްޖިއަމާއި ރުމޭނިއާ އަދި ޔޫކްރެއިނާ އެކު އޮތުމަކީ، މި ގްރޫޕްގެ ފޯރިގަދަވާނެ ސަބަބެކެވެ. ބެލްޖިއަމް ނަގާފައި ދެން މި އޮތީ ދާދި ހަމަހަމަ ޓީމުތަކެކެވެ.

ސްލޮވާކިއާގެ ތަރިއަކަށް މި ފަހަރުގެ މުބާރާތުގައި ވާނެ ކުޅުންތެރިއަކީ، ސްޓަނިސްލާވް ލޮބޮޓްކާ އެވެ.