މިއީ ހަންގޭރީ އިން ޔޫރޯ ފުޓްބޯޅަ މުބާރާތުގައި ޖެހިޖެހިގެން ވާދަކުރާ ތިން ވަނަ ފަހަރެވެ. މީގެ ކުރިން ހަންގޭރީން ވަނީ ހަަތަރު ފަހަރު ޔޫރޯ ފުޓްބޯޅަ މުބާރާތުގައި ކުޅެފަ އެވެ. އެއީ، 1964، 1972، 2016 އަދި 2020 ވަނަ އަހަރު އެވެ. ހަންގޭރީ އަކީ، މި ފަހަރުގެ ޔޫރޯ އަށް 10 ވަނަ އަށް ކޮލިފައިވި ޓީމެވެ.

އިޓަލީގެ ކޯޗު މާކޯ ރޮސީ، 2018 ވަނަ އަހަރު ހަންގޭރީއާ ހަވާލުވިއިރު، މިއީ، އޭނާ އެ ޓީމު ގޮވައިގެން ނުކުންނާނެ ދެ ވަނަ ޔޫރޯ ފުޓްބޯޅަ މުބާރާތެެވެ. އެ ގޮތުން، އެންމެ ފަހުން ބޭއްވި 2020 ވަނަ އަހަރުގެ ޔޫރޯ ފުޓްބޯޅަ މުބާރާތުގައި، ހަންގޭރީ ކެޓީ ގްރޫޕް ސްޓޭޖުން މޮޅެއް ނުލިބި އެވެ. އެ ފަހަރު ހަންގޭރީ ހިމެނުނީ މަރުގެ ގްރޫޕްގަ އެވެ. އެއީ ފްރާންސާއި ޖަރުމަނު އަދި ޕޯޗުގަލްއާ އެކުގަ އެވެ.

ހަންގޭރީން ވަނީ ޕޯޗުގަލް އަތުން ފުރަތަމަ މެޗުގައި ބަލިވި ނަމަވެސް ދެން ކުޅުނު ދެ މެޗުގައި، ޖަރުމަނާއި ފްރާންސާ އެއްވަރުކޮށްފަ އެވެ. ހަންގޭރީން ޖެހިޖެހިގެން ދެ ވަނަ ފަަހަރަށް ޔޫރޯ ފުޓްބޯޅަ މުބާރާތުގައި ވާދަކުރަން ޖެހިފައިމިވަނީ ޖަރުމަނާ އެއް ގްރޫޕެއްގަ އެވެ. އެކަމަކު، މި ފަހަރު، ނިސްބަތުން ބަލާއިރު، ހަންގޭރީ އަށް އޮތީ ކުރިއަށް ވުރެ ފަސޭހަ ގްރޫޕެކެވެ. އެއީ، ޖަރުމަނުގެ އިތުރުން، ސްކޮޓްލެންޑާއި ސްވިޒަލެންޑާ އެކުގަ އެވެ.

ހަންގޭރީ މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވެފައިވަނީ ކޮލިފައިން ގްރޫޕް ޖީގެ އެއް ވަނައިގެ ގޮތުގަ އެވެ. ހަންގޭރީ ހިމެނުނު ގްރޫޕުން ދެ ވަނައިގެ ގޮތުގައި، ސާބިއާ ކޮލިފައިވިއިރު، ހަންގޭރީ އަކީ ބަލިނުވެ، ކޮލިފައިން ނިންމާލި މަދު ޓީމުތަކުގެ ތެރެއިން ޓީމެކެވެ. ކޮލިފައިންގައި ކުޅިުނު އަށް މެޗުގެ ތެރެއިން ފަސް މެޗުން މޮޅުވި އެވެ.

މި ފަހަރުގެ ޔޫރޯ ފުޓްބޯޅަ މުބާރާތުގައި ހަންގޭރީން ވިދާލާނެ ކަމަށް އެންމެ ބޮޑަށް ބެލެވޭ ކުޅުންތެރިއަކީ، އެ ޓީމުގެ ކެޕްޓަން، ޑޮމިނިކް ސޮބޯސްލާއި އެވެ. އެންމެ ފަހުން ޔޫރޯގައި އަނިޔާގެ ސަބަބުން އޭނާ އަށް ނުކުޅެވުމަކީ، އެ ޓީމަށް ލިބުނު ބޮޑު ދެރައެކެވެ.