ރާއްޖޭގައި ބާއްވާ އެންމެ ބޮޑު ހަވާ އެރުވުމުގެ ހަރަކާތުގެ އިތުރުން ތަފާތު ކުޅިވަރުތަކާއެކު މި އަހަރުގެ އަޟްހާ އީދު ހއ. ދިއްދޫގައި ކުލަގަދަކޮށް ފާހަގަކުރަން ނިންމައިފި އެވެ.

"ދިއްދޫ އީދު އުފާ" ނަމުގައި ކުރިއަށް ގެންދާ މި ހަރަކާތްތުގެ މެނޭޖަރު އިބްރާހިމް ސިނާން "އަދަދު" އާ ވާހަކަދަމުން ބުނީ އީދު ދުވަހުގެ ދެ ވަނަ ރޭ ހަވާ އެރުވުން މަދުވެގެން 10 މިނެޓަށް ދެމިގެންދާނެ ކަމަށެވެ.

‎ދިއްދޫގައި އީދު ފާހަގަކުރުމު ހަރަކާތްތަކުގައި ރާއްޖޭގެ މަޝްހޫރު ގިނަ ފަންނާނުންނެއް ބައިވެރިވުމަށް ވަނީ ހަމަޖެހިފައި ކަމަށް ވެސް ސިނާން ވަނީ ބުނެފަ އެވެ.

މި އިވެންޓު ކުރިއަށްގެންދަނީ ދިއްދޫ ޒުވާނުންގެ އިސްނެގުމާއެކު ދިއްދޫ ދާއިރާގެ މެންބަރު އަބްދުއްލަތީފް މުހައްމަދާއި ބާރަލާ ސްޕޯސް ކްލަބާއި ރަށު ކައުންސިލް ގުޅިގެންނެވެ.

ދިއްދޫ އީދު އުފާ ކުރިއަށް ގެންދަން ރޭވިފައިވާ ގޮތް:

• ޖޫން 16، - އީދު ދުވަހު ހަވީރު ދިއްދޫ ޗޭނު ޖަމިއްޔާއިން ސަގާފީ ކުޅިވަރު، އަދި މާލި ނެށުން.
• ޖޫން 17، - ރާއްޖޭގެ މަޝްހޫރު "ހަބޭސް" ބޮޑުބެރު ގުރޫޕުން ދަފި ނެގުމާއި، މާލި ނެށުން ފަދަ ސަގާފީ ކުޅިވަރުތަކާއެކު އެރޭއެ ހަވާ އެރުވުން.
• ޖޫން 18، - ކާއްޓޭ ދި ވާންޗޯގެ ކޮމެޑީ ޝޯ
• ޖޫން 19، - މަޝްހޫރު ލަވަކިޔުންތެރިޔާ މީރާ މުހައްމަދު އަދި ޒާރާ މުޖުތަބާގެ ޝޯ.
• ޖޫން 20، - ގޮމަ ގުރޫޕުގެ ހަރަކާތްތައް.
• ޖޫން 21، - އެކުއެޓިކް ވައިބް މިއުޒިކް ބޭންޑްގެ ޝޯ.

މީގެ އިތުރުން އީދުގެ ތެރޭގައި ބައިބަލާ، ވާދެމުން، ބޮއްކުރާ ރޭސްފަދަ ކުޅިވަރުތައް ކުރިއަށް ގެންދަން ވަނީ ނިންމާފައި ކަމަށް ވެސް އީދުގެ ހަރަކާތްތައް އިންތިޒާމު ކުރާ ފަރާތްތަކުން ބުނެ އެވެ.

ދިއްދޫއަކީ ބޮޑު އީދު އަބަދު ވެސް ވަރަށް ފޯރިގަދަކޮށް ފާހަގަކުރާ ރަށެކެވެ. އެގޮތުން ކޮންމެ އަހަރަކު ވެސް އީދާ ދިމާކޮށް ތަފާތު އެކި ހަރަކާތްތައް ރާވައި، ކުލަގަދަކޮށް އީދު ފާހަގަކުރެ އެވެ.