އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގައި މިއަދު ހަވީރު ކުޅުނު މެޗުގައި ޔުނައިޓެޑް ވިކްޓަރީ (ޔޫވީ) އިން ލަނޑެއް ޖަހާފައި ވަނިކޮށް ކްލަބް ގްރީން ސްޓްރީޓްސް އިން ފަހަތުން އަރައި 4-1 އިން މޮޅުވެއްޖެ އެވެ.

ގަލޮޅު ދަނޑުގައި ކުޅުނު މެޗުގައި ޔުނައިޓެޑް ވިކްޓަރީން ލީޑުނެގީ ހަ ވަނަ މިނިޓްގައި، ތޯއިފް އަބްދުލް މަޖީދު ޖެހި ގޯލުންނެވެ. އޭރިއާބޭރުން ތޯއިފް ޖެހި ބޯޅަ ގޯލަށް ވަނީ ގްރީން ސްޓްރީޓްސްގެ ކީޕަރު، މޫސާ ރަޝީދު އަތްދަށުންނެވެ.

ފުރަތަމަ ހާފު ނިމުމުގެ ކުރިން، ގްރީން ސްޓްރީޓްސް އިން އެއްވަރުކުރީ ކޯނަރަކުން، އެ ޓީމުގެ، އަހުޒަމް ރަޝީދު ޖެހި ގޯލުންނެވެ. އެ ބޯޅަ ގޯލަށް ވަންއިރު، ޔުނައިޓެޑް ވިކްޓަރީގެ ކީޕަރު އިބްރާހިމް އާއިޝް ޝަރީފަށް މާ ބޮޑު ކަމެއް ނުކުރެވުނެވެ.

މިއަދުގެ މެޗުގެ ތެރެއިން ގްރީން ސްޓްރީޓްސްގެ ފައިޒާން ބޯޅަ ފޮނުވާލަނީ.--- ފޮޓޯ: އިމޭޖަސް،އެމްވީ / ނައުޝަމް ވަހީދު

ގްރީން ސްޓްރީޓްސް އިން ވަނީ ދެ ވަނަ ހާފު ފަށައިގެން، ނުވަ ވަނަ މިނިޓްގައި އަބްދުﷲ އަނޫސް ޖެހި ލަނޑުން ލީޑުނަަގައިފަ އެވެ. އަނޫސްގެ މި ލަނޑަކީ އިންޑިވިޖުއަލީ މޮޅު ގޯލެކެވެ. އޭރިއާތެރެއިން އޭނާ ބޯޅަ ގޯލަށް ފޮނުވާލީ ހަމަޖެހިލައިފަ އެވެ.

ނަތީޖާ ހަމަހަމަކުރެވޭތޯ ޔުނައިޓެޑް ވިކްޓަރީގެ ކެޕްޓަން، ޝަނާން ރަޝާދު އެޓޭކްތަކެއް ކުރެވޭތޯ ބެލިނަމަވެސް، އިތުރު ވަގުތުގައި ދެ ލަނޑު ޖަހައި، ގްރީން ސްޓްރީޓްސް އިން މެޗުން މޮޅުވި އެވެ.

އިތުރު ވަގުތުގައި ގްރީން ސްޓްރީޓްސްގެ ތިން ވަނަ ލަނޑު ޖެހީ، މުހައްމަދު ފައިޒާން ފަޒީން އެވެ. އޭރިއާތެރެއިން ލިބުނު ބޯޅަ ފައިޒާން ވަނީ ގޯލުގެ މަތީ ދާގަނޑަށް ފޮނުވާލައިފަ އެވެ. އޭގެ އިރުކޮޅެއް ފަހުން، ފައިޒާން ދިން ބޯޅައަކުން، އަހުޒަމް ވަނީ ދެ ކުޅުންތެރިން ކައިރިން ނައްޓާފައި ގޮސް ގޯލަށް ބޯޅަ ފޮނުވާލައިފަ އެވެ.

ޔޫތު ޗެމްޕިއަންޝިޕްގައި މިރޭ ކުޅޭ މެޗުގައި މާޒިޔާ ސްޕޯޓްސް އެންޑް ރެކްރިއޭޝަނުން ކުޅޭނީ ކްލަބް އީގަލްސްއާ އެވެ. އީގަލްސް އިން ފުރަތަމަ މެޗުގައި ޔުނައިޓެޑް ވިކްޓަރީ ބަލިކުރި އެވެ. މާޒިޔާ ވަނީ ފުރަތަމަ މެޗުގައި ގްރީން ސްޓްރީޓްސްއާ އެއްވަރުވެފަ އެވެ.