ނުރައްކާތެރި ކެމިކަލެއް އެކުލެވޭ ކަމަށް ބުނެ، ތައިލެންޑުގައި އުފައްދާ ވިއްކާ 15 ބޭހެއް ނުގަތުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފި އެވެ.

އެ އިދާރާއިން މިއަދު ނެރުނު ބަޔާނެއްގައި، އެ ބޭސްތަކަކީ ރާއްޖެ އެތެރެކޮށް ވިއްކުމަށް ހުއްދަ ކުރާ ބޭހުގެ ލިސްޓުގައި ނުހިމެނޭ ބޭސްތަކެއް ކަމަށް ވެސް އެ އިދާރާއިން ފާހަގަކޮށްފަައިވެ އެވެ.

"ތައިލޭންޑަކީ ދިވެހިން ބޭސް ފަރުވާއަށް ގޮސް އުޅޭ ގައުމަކަށްވެފައި، ބައެއް ހާލަތްތަކުގައި އަމިއްލަ ބޭނުމަށް ތައިލެންޑުން ބޭސް އެތެރެކުރާތީ، މިކަމަށް ސަމާލުވުމަށް ދަންނަވަން،" ބަޔާނުގައި ބުނެފައިވެ އެވެ.

އެމްއެފްޑީއޭ އިން ބުނެފައިބަނީ ތައިލެންޑުގެ ސެވަން ސްޓާސް ފާމަސޫޓިކަލް ކުންފުނިން ބޭސް އުފެއްދުމަށް ބޭނުން ކޮށްފައިވާ ސޯބިޓޯލް ކިޔާ އެކްސިޕިއެންޓެއްގައި ނުރައްކާތެރި ކެމިކަލުގެ މާއްދާއެއް އެކުލެވޭތީ، ތައިލެންޑުގެ އެފްޑީއޭއިން އެކަން އަންގާފައިވާ ކަމަށެވެ.

އެގޮތުން ކެމިކަލް އެކުލެވޭ 15 ބޭހެއް ރިކޯލް ކޮށްފައިވާ ކަމަށް ބުނެ އެމްއެފްޑީއޭ އިން ވަނީ އެ ބޭސްތަކުގެ ނަންތައްވެސް ހާމަކޮށްފަ އެވެ.

މީގެއިތުރުން، ބޭސް ސިޓީއަށް ބޭސް އެތެރެ ކުރާއިރު ހާއްސަ ސަމާލު ކަމެއް ދިނުމަށާއި ވައިގެ އަދި ވިޔަފާރި ބަނދަރުތަކުން މި ބޭސްތަކަށް އިތުރަށް ސަމާލުކަން ދޭނެ ކަމަށްވެސް މި ބަޔާނުގައި ބުނެފައިވެ އެވެ.