ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ވިލިމާލެ ދާއިރާގެ ކުރީގެ މަޖިލީހުގެ ކުރީގެ މެންބަރު އަހުމަދު ނިހާން ހުސައިން މަނިކު އައްޔަންކޮށްފި އެވެ.

މި މަގާމަކީ މަޖިލީހުގެ ރައީސް އައްޔަންކުރައްވާ މަގާމެކެވެ. މަޖިލީހުގެ ޑިރެކްޓަރު އޮފް ކޮމިއުނިކޭޝަން ހަސަން ޒިޔާއު ފޮނުއްވި މެސެޖެއްގައި ވިދާޅުވެފައިވަނީ މަޖިލީހުގެ ރައީސް އަބްދުއްރަހީމް އަބްދުﷲ އެ މަގާމަށް ނިހާން އައްޔަންކުރައްވާފައި ކަމަށެވެ.

"ނިހާން އައްޔަނުކުރައްވާފައިވަނީ ޕާލަމެންޓަރީ ސަރވިސް ގަވާއިދުގެ ދަށުން މަޖިލީހުގެ ރައީސްގެ މަސައްކަތްޕުޅަށް އެހީތެރިވުމުގެ ގޮތުން، ނިހާން ވަނީ އިއްޔެ ވަޒީފާއަށް ނިކުންނަވަން ފައްޓަވާފަ،" ޒިޔާއު ވިދާޅުވި އެވެ.

ރައްޔިތުންގެ މަޖިލީހުގައި ނިހާން އަދާކުރެއްވީ ދެ ދައުރެވެ. އެގޮތުން 17 ވަނަ އަދި 18 މަޖިލީހުގެ ވިލިމާލެ ގޮނޑީގައި އޭނާ ތަމްސީލުކުރެއްވީ މިހާރު ވެރިކަންކުރާ ކޯލިޝަނުގައި ހިމެނޭ ޕީޕީއެމް އަދި ޑީއާރުޕީ އެވެ. 18 ވަނަ މަޖިލީހުގެ މެޖޯރިޓީ ލީޑަރުކަންވެސް އޭނާ އަދާކުރެއްވި އެވެ.

ނިހާންގެ ކުރިން ބިއުރޯ ޗީފަކަށް ހުންނެވީ ކުރީގެ ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު ފާތިމަތު މުހައްމަދު ސޯލިހު އެވެ. ފާތިމަތު އެ މަގާމަށް އައްޔަންކުރެއްވީ ނިމިދިޔަ 19 ވަނަ މަޖިލީހުގެ ރައީސް މުހައްމަދު އަސްލަމް، ޑިސެމްބަރު 4، 2023 ގަ އެވެ.