އިންޑިއާ އައުޓް ހަރަކާތް ހުއްޓުވަން ކުރީގެ ރައީސް އިބްރާހިމް މުހައްމަދު ސޯލިހު ނެރުއްވި ގަރާރު ގާނޫނުއަސާސީއާ ހިލާފު ކަމަށް ބުނެ އެ ގަރާރު ބާތިލު ކުރަން ސިވިލް ކޯޓަށް ހުށަހެޅި މައްސަލައިގެ އަޑުއެހުންތައް ނިންމާލައިފި އެވެ.

"އިންޑިއާ އައުޓް" އެ ހަރަކާތަކީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރޭވިގެން ހިންގާ ކެމްޕޭނެއްގެ ގޮތުގައި ސިފަކޮށް އޭރުގެ ރައީސް އިބްރާހިމް މުހައްމަދު ސޯލިހު ސޮއިކުރައްވައި ރިޔާސީ ގަރާރެއް ނެރުއްވީ އެޕްރީލް 21, 2022 ގަ އެވެ.

އެ އަހަރުގެ މެދު ތެރޭގައި އޭރުގެ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީނުގެ ފަރާތުން އެ ގަރާރަކީ ގާނޫނު އަސާސީގައި ބަޔާންކުރާ ހިޔާލު ފާޅުކުރުމުގެ މިނިވަންކަމުގެ އަސާސީ ހައްގުތައް ހިފެހެއްޓޭ ގޮތަށް އޮތް "ޣައިރު ގާނޫނީ" ގަރާރެއް ކަމަށް ކަނޑައަޅައިދިނުމަށް އެދި ސިވިލް ކޯޓަށް ހުށަހެޅި އެވެ.

އެ މައްސަލާގައި ސިވިލް ކޯޓުގައި މިއަދު ބޭއްވި އަޑުއެހުމުގައި އޮތީ މައްސަލަ ހުށަހެޅި ޔާމީންގެ ފަރާތްޕުޅުންނާއި، މައްސަލަ ރައްދުވާ ބަންޑާރަ ނައިބުގެ އޮފީހުގެ ފަރާތުން މުޅި މައްސަލައަށް ހުލާސާކޮށް ވާހަކަ ދެއްކުމެވެ. ހުކުމުގެ ކުރިއަށް ފަހު ބަހުގެ ގޮތުގައި އިއްވާ ހުލާސާ ބަޔާން އިއްވުމެވެ.

ދެ ފަރާތުގެ ބަޔާނަށް ފަހު މައްސަލަ ބައްލަވާ ގާޒީ ވިދާޅުވީ ދެން އެ މައްސަލާގައި އިތުރު ކަމެއް ސާފު ކުރަން ނުޖެހޭ ނަމަ ދެން އޮންނަ އަޑުއެހުމެއްގައި ހުކުމް އިއްވަވާނެ ކަމަށެވެ. އެކަމަކު ހުކުމް އިއްވުމުގެ އަޑުއެހުން ބާއްވާނެ ވަކި ތާރީހެއް ގާޒީ ނުދެއްވަ އެވެ.

އެ ގަރާރު ނެރުނު ދުވަހު މިހާރުގެ ރައީސް ޑރ. މުހައްމަދު މުއިއްޒު އާއި އެމަނިކުފާނުގެ ހާއްސަ އެޑްވައިޒަރު އަބްދުރަހީމް އަބްދުالله އާއި ޑިފެންސް މިނިސްޓަރު ގައްސާން މައުމޫން އަދި ލޯކަލް ގަވަމެންޓު މިނިސްޓަރު އާދަމް ޝަރީފް ނޫސްވެރިންނާ ބައްދަލުކުރެއްވި އެވެ.

އޭރު އިދިކޮޅުގައި ތިއްބެވި މިހާރު ސަރުކާރުގެ ބޭފުޅުން އެ ގަރާރު ގާނޫނާ ހިލާފު ކަމަށް ގަބޫލުކުރެއްވީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.

ނަމަވެސް ސަރުކާރު ބަދަލުވި ފަހުން ގަރާރު ބާތިލް ކުރުމަށް އަދިވެސް ނިންމާފައެއް ނުވެ އެވެ. ސަރުކާރުން ބުނަމުން ދަނީ އެއާ މެދު ފަހުގެ ނިންމުމެއް ނިންމޭނީ ދިރާސާކޮށްފައި ކަމަށެވެ. ގަރާރު ބާތިލްނުކުރާތީ، ޔާމީން ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ.

އެ ހިތްހަމަނުޖެހުންތަކާއެކު، ސަރުކާރަށް ހަފުތާއެއް ވެސް ނުވަނީސް އެމަނިކުފާނު ވަނީ ސަރުކާރު ހިންގާ ޕީއެންސީ/ޕީޕީއެމް އިއްތިހާދުން ވަކިވެ ޕީއެންއެފް ނަމުގައި އާ ޕާޓީއެއް އުފައްދަވައިފަ އެވެ. އިންޑިއާ އައުޓުގެ ކެމްޕެއިން އަލުން ފައްޓަވާނެ ކަމަށް ވެސް ޔާމީން ވިދާޅުވެފައިވެ އެވެ.

"އިންޑިއާ އައުޓު" ގެ ނަމުގައި އޭރުގެ އިދިކޮޅު ފަރާތްތަކުން ހިންގި ކެމްޕެއިނަކީ ރާއްޖޭގައި ގާއިމުވެ ތިބި ކަމަށް ބުނާ އިންޑިއާ ސިފައިން ފޮނުވާލުމަށް ވަކާލާތުކޮށް ހިންގި ކެމްޕެއިނެވެ. އިންޑިއާ ސިފައިން ފޮނުވާލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.

ކުރިން ތިބި އިންޑިއާ ސިފައިން އެކި ތާރީހުތަކުގެ މަތިން މިދިޔަ މެއި 10، ގެ ކުރިން ފޮނުވާލާފައިވާ ކަމަށް ދެ ގައުމުގެ ސަރުކާރުން ބުނެ އެވެ. އޭގެ ބަދަލުގައި އިންޑިއާގެ މަދަނީ ހިދުމަތްތެރީން ވަނީ ގެނެސްފަ އެވެ. އިންޑިއާއިން ހަދިޔާކޮށްފައިވާ އަސްކަރީ އުޅަނދުތައް މިހާރު އޮޕަރޭޓްކުރަން އޭގެ 76 މީހުން އެބަ ތިއްބެވެ.