ޖިއްދާ، ސައުދީ އަރަބިއްޔާ (ޖޫން 1) - ޕެނަލްޓީ ޖަހައިގެން، 5-4 އިން އަލް ނަސްރު ބަލިކޮށް އަލް ހިލާލުން ސައުދީ ކިންގްސް ކަޕް ކާމިޔާބުކޮށްފި އެވެ.

މިއީ އަލް ހިލާލުން މި މުބާރާތް ކާމިޔާބުކުރި 11 ވަނަ ފަހަރެެވެ. މި މުބާރާތް އެންމެ ގިނަ ފަހަރު ކާމިޔާބުކުރީ 13 ފަަހަރު ތަށި އުފުލާލި އަލް އަހްލީ އެވެ.

ކިންގް އަބްުދުﷲ ސްޕޯޓްސް ސިޓީ ސްޓޭޑިއަމްގައި ރޭ ކުޅުނު ފައިނަލް މެޗު ފަށައިގެން އެންމެ ރަނގަޅު ފުރުސަތެއް ގޯލު ޖަހަން ލިބުނީ އަލް ނަސްރުގެ ސަޑިއޯ މާނޭ އަށެވެ. އޭރިއާތެރެއިން މާނޭ އަށް ލިބުނު ފުރުސަތުގައި އޭނާ ޖެހި ބޯޅަ ދިޔައީ ހުރަސް ދަނޑި މަތިންނެވެ. އޭގެ އިރުކޮޅެއް ފަހުން، މެޗުގެ ހަތް ވަނަ މިނިޓްގައި، އަލް ހިލާލްގެ އަލެކްސަންޑަ މިޓްރޮވިޗް ބޮލުން ގޯލެއް ޖަހައި، އެ ޓީމަށް ލީޑުނަގައިިދިނެވެ.

ދެ ވަނަ ހާފުގެ ކުޅުން ފެށިގެން ދެ ވަަނަ މިނިޓްގައި އަލް ނަސްރުގެ ކެޕްޓަން، ކްރިސްޓިއާނޯ ރޮނާލްޑޯ އޯވަހެޑް ކިކަކުން ޖެހި ބޯޅަ އަމާޒުވީ ގޯލުގެ ދަނޑިއަށެވެ.

އަލް ނަސްރުގެ ކީޕަރު، ޑޭވިޑް އޮސްޕީނާ އަށް މެޗުގެ 56 ވަނަ މިނިޓްގައި ރަތް ކާޑު ދެއްކީ އޭރިއާބޭރުން ބޯޅައިގައި އަތްލުމުންނެވެ.

ހިލާލްގެ ކީޕަރު ބޯނޯ (ކ) އަލް ނަސްރުގެ ކެޕްޓަން ރޮނާލްޑޯ އަށް ލިބުމުގެ ކުރިން ބޯޅަ ހިފަނީ.

މެޗުގެ 86 ވަނަ މިނިޓްގައި އަލް ހިލާލް މެޗުން މޮޅުކޮށްދޭން މިޓްރޮވިޗަށް ލިބުނު ރަނުގެ ފުރުސަތު ބޭނުމެއް ނުކުރެވުނެވެ. އޭގެ މިނިޓެއްހާއިރު ފަހުން، އަލް ހިލާލްގެ އަލީ އަލްބުލާހީ ބޯޅަ ނެތިސް ކުޅުންތެރިއަކަށް ހަމަލާ ދިނުމުން ރަތް ކާޑެއް ދެއްކި އެވެ.

އަލް ހިލާލްގެ ވެސް ކުޅުންތެރިއަކު މަދުވިތާ ލަހެއްނުވެ، އައިމަން ޔަހުޔާ ބޮލުން ޖެހި ގޯލުން، އަލް ނަސްރުން ނަތީޖާ ހަމަަހަމަކުރި އެވެ. އަލް ހިލާލުން މެޗުގެ 90 މިނިޓް ނިންމާލަން ޖެހުނީ ދެ ކުޅުންތެރިން މަދުކޮށެެވެ. އެއީ، އެ ޓީމުގެ ޑިފެންޑަރު، ކަލީދޫ ކުލިބާލީ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.

އިތުރު ވަގުތުގެ ދެ ހާފް ކުޅެން ޖެހުނުއިރު، ނަތީޖާ އެއް ނުނެރެވުމުން ޖެހީ ޕެނަލްޓީ އެވެ. ޕެނަލްޓީގައި، އަލް ނަސްރުގެ ހަތް ޕެނަލްޓީގެ ތެރެއިން ތިން ޕެނަަލްްޓީ، ނާކާމިޔާބުވިއިރު، އޭގެ ތެރެއިން ފަހު ދެ ޕެނަލްޓީ އަލް ހިލާލްގެ ކީޕަރު ޔާސީން ބޯނޯ ވަނީ މަތަކޮށްފަ އެވެ. އަލް ނަސްރުގެ އަލެކްސް ޓެލޭސްގެ ޕެނަލްޓީ ދިޔައީ ހުރަސްދަނޑިމަތިންނެވެ. ބޯނޯ މަތަކުރީ، ނާސިރު އަލް ހަސަން އާއި މިޝާރީ އަލް ނެމާރު ޖެހި ޕެނަލްޓީ އެވެ. ހިލާލުން ވަނީ، ހަތް ޕެނަލްޓީގެ ތެރެއިން ފަސް ޕެނަލްޓީ ކާމިޔާބުކޮށްފަ އެވެ. ކާމިޔާބުނުވީ ރުބެން ނެވޭސް އަތުން ދަނޑިއަށް އަމާޒުވި ޕެނަލްޓީ އާއި ސާލިމް އަބްދުލް ހަމީދު ޖެހި ޕެނަލްޓީ އެވެ.

އަލް ހިލާލުން ސައުދީގެ ފުޓްބޯޅަ ސީޒަން މި ނިންމާލީ މެޗަކުން ބަލިނުވެ، ތިން ތަށްޓާ އެކު އެވެ. އެއީ، ސައުދީ ޕްރޯ ލީގާއި ސުޕަ ކަޕް އަދި ކިންގްސް ކަޕްއާ އެކު އެވެ.

އަލް ނަސްރުން 1990 ވަނަ އަހަރުގެ ފަހުން، ކިންގްސް ކަޕް ކާމިޔާބުކުރަން ކުރާ މަސައްކަތް ދިގުލައިދިޔައީ އެވެ. އަލް ނަސްރުން ވަނީ މީގެ ކުރިން ހަ ފަހަރު ކިންގްސް ކަޕް ކާމިޔާބުކޮށްފަ އެވެ.