ރާއްޖޭގައި ހެލިކޮޕްޓަރުގެ ހިދުމަތް އަލުން ފެށުމަށް ޓަކައި ތައްޔާރުކުރަން ޖެހޭ އާރްއެފްޕީއައި ( ރިލަޔަބިލިޓީ، އެވެއިލަބިލިޓީ، މެއިންޓެއިނަބިލިޓީ އެންޑް ސޭފްޓީ އިންޑިކޭޓާ) އެކުލަވައިލުމުގެ މަސައްކަތް އޮތީ ގާތްގަނޑަކަށް ނިމިފައި ކަަމަށާއި އެ އުސޫލު ގެޒެޓް ކުރުމުން، ހެލިކޮޕްޓަރު އޮޕަރޭޓްކުރާނެ ބަޔަކު ވަރަށް އަވަހަށް ލިބޭނެ ކަަމަށް ސަރުކާރުން ބުނެފި އެެވެ.

ޓްރާންސްޕޯޓް މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމުގައި މިނިސްޓަރު މުހައްމަދު އަމީން ވިދާޅުވީ އާރްއެފްޕީީއައިގެ މަސައްކަތް ލަސްވީ އެެކަމަށް ޓަކައި ފިނޭންސް މިނިސްޓްރީން ކުރަން ޖެހޭ ކަމެއް ނުނިމި އޮތުމުން ކަމަށެވެ. އޭޖީގެ ލަފަޔާ އެކު ފިނޭންސުން އެ މަސަައްކަތް ކުރަމުން އެބަ ގެންދާ ކަމަށް ވެސް އޭނާ ވިދާޅުވި އެވެ.

"އަޅުގަނޑަށް މިހާރު މައުލޫމާތު ލިބިފައި އޮތް މައުލޫމާތު ގޯސްކަަމަށް ނުވާ ނަމަ އިރާދަކުރެއްވިއްޔާ މިހަފުތާ ނޫނީ ލަސްވެގެން މިއަންނަ ހަފުތާގެ މެދުތެރެއަށް ދާއިރު ފިނޭންސް މިނިސްޓްރީން އެކަންތައް ނިންމަވާނެ. ނިންމެވުމާ އެކީ އަޅުގަނޑުމެން އާރްއެފްޕީއައި ސަރުކާރުގެ ގެޒެޓްގަޔާ އިންޓަނޭޝަނަލް ޕްލެޓްފޯމްތަކުގައި ޝާއިއުކުރާނަން،" އަމީން ވިދާޅުވި އެވެ.

އޭނާ ވިދާޅުވި ގޮތުގައި އާރްއެފްޕީއައި ޝާއިއުކުރުމާ އެކީ ގާބިލު ބަޔަކު ގެނެވޭނެ ކަން ޔަގީންވަނީ ރާއްޖޭގައި ވިޔަފާރި އޮތް ގޮތާއި އެ ނޫން ވެސް ކަންތައްތަކަށް ބަލައިގެންނެވެ. ހެލިކޮޕްޓަރު އޮޕަރޭޓްކުރުުމުގައި ހިމެނޭ އެންމެ މުހިއްމު ބަޔަކީ ރައީސް ޑރ.،މުހައްމަދު މުއިއްޒުގެ ވައުދެއް ކަމަށްވާ އެއާ އެމްބިއުލާންސްގެ ހިދުމަތް ދިނުން ކަމަށް ވެސް ވިދާޅުވި އެވެ.

"އާރްއެފްޕީއައި ސާކިއުލޭޓްކުރީމާ އަޅުގަނޑުމެންނަށް ވަރަށް ޔަގީންކަން އެބަ އޮތް ރާއްޖޭގައި މިހާރު މި ވިޔަފާރި [ވައިގެ ދަތުރުގެ ވިޔަފާރި] އޮތް ގޮތާ މިހުރިހާ ކަމަކަށް ބަލާއިރު ރާއްޖޭގައި ހެލިކޮޕްޓަރު އޮޕަރޭޓްކުރުމުގެ ގާބިލިއްޔަތު ހުރި ޕްރޮޕޯނަންޓެއް ދިވެހިރާއްޖެއަށް ގެނެވޭނެކަމަށް،" އަމީން ވިދާޅުވި އެވެ.

ރާއްޖޭގައި ހެލިކޮޕްޓަރު އޮޕަރޭޓްކުރާނެ ބަަޔަކު ހޯދަން ވަރަށް އަވަހަށް ހުޅުވައިލާނެ ކަމަށް ސަރުކާރުން ބުނީ މިދިޔަ ޖެނުއަރީ މަހު އެވެ.