ލަންޑަން (މެއި 29) - އާރްބީ ލައިޕްޒިގުގެ ލޯން ޑީލެއްގެ ދަށުން ޓޮޓެންހަމް ހޮޓްސްޕާސް އަށް ކުޅެމުން އަންނަ ޖަރުމަނު ފޯވާޑް، ޓިމޯ ވާނާގެ އެއްބަސްވުމުގެ މުއްދަތު އިތުރުކޮށްފި އެވެ.

ކުރިން ޗެލްސީ އަށް ކުޅުނު ފޯވާޑް، ވާނާ، ޖެނުއަރީ މަހު، ޓޮޓެންހަމަށް ބަދަލުވެ، ހުރިހާ މުބާރާތެއްގައި އެ ޓީމަށް ކުޅެދިން 14 މެޗުން ވަނީ ދެ ލަނޑު ޖަހައިފަ އެވެ.

ޖެނުއަރީ މަހު ހެދި އެއްބަސްވުމުގައި ހިމަނާފައިވާ ގޮތުން، ސީޒަން ނިންމާފައި ވާނާ، 28، ދާއިމީކޮށް ޓްރާންސްފާ ކުރަން ޓޮޓެންހަމް އިން 20 މިލިއަން ޑޮލަރު ދޭން ޖެހެ އެވެ. އެކަމަކު، އެ ފުރުސަތު ދޫކޮށްލައި، ޓޮޓެންހަމް އިން ނިންމީ އަންނަ ސީޒަނުގެ ނިޔަލަށް ވާނާގެ ލޯންގެ މުއްދަތު އިތުރުކުރުމަށެެވެ.

އެ ގޮތުން، ލޯނަށް ހުންނައިރު، ވާނާގެ މުސާރަ އެއްކޮށް ދައްކާނީ ޓޮޓެންހަމް އިންނެވެ. އަލުން މި އެއްބަސްވި ޑީލުގައި ހިމަނާފައިވަނީ، ސީޒަން ނިންމުމަށް ފަހު، ވާނާ ދާއިމީކޮށް ޓޮޓެންހަމްގައި މަޑުކުރުވާނަމަ 12 މިލިއަން ޑޮލަރު ދެއްކުމަށެވެ.

ސީޒަން ނިންމާލިިއިރު، ވާނާ ހުރީ އަނިޔާގަ އެވެ. އެ ގޮތުން، ފަލަމަސްގަނޑަށް ލިބުނު އަނިޔާއާ ހެދި ވާނާ އަށް ޕްރިމިއާ ލީގުގެ ފަހު ފަސް މެޗު ގެއްލުނުއިރު، ޖަރުމަނުން ޔޫރޯގައި ވާދަކުރާ ސްކޮޑުގައި ވެސް ވާނާ ނުހިމެނެ އެވެ.

ދެ އަހަރު ދުވަހު، ޗެލްސީ އަށް ކުޅެދިން ވާނާ ވަނީ އެ ޓީމަށް 89 މެޗުން 23 ލަނޑުު ޖަހައިދީފަ އެވެ.