ލަންޑަން (ނޮވެމްބަރު 19) - ޓޮޓެންހަމް ހޮޓްސްޕާސްގެ ކެޕްޓަން، ސޮން ހެއުން މިންގެ ނަސްލަށް މަލާމަތް ރައްދުވާ ގޮތަށް އެ ޓީމުގެ މިޑްފީލްޑަރު، ރޮޑްރީގޯ ބެންޓަންކޫރު ވާހަކަދެއްކި މައްސަލައެއްގެ މައްސަލައިގައި އޭނާ ހަތް މެޗަށް ސަސްޕެންޑްކޮށް ޖޫރިމަނާކުރަން ނިންމައިފި އެވެ.

އުރުގުއޭގެ ޓީވީ އަކަށް މިދިޔަ ޖޫން މަހު ދިން އިންޓަވިއުއެއްގައި، އެ ގައުމުގެ މިޑްފީލްޑަރު، ބެންޓަންކޫރު ގާތުގައި ޓޮޓެންހަމްގެ ޖޯޒީއެއް ދޭން އެދުމުން، އޭނާ ބުނެފައިވަނީ، ބޭނުންވަނީ ސޮންގެ ޖޯޒީއެއް ތޯ ސުވާލުކޮށް، ސޮންގެ އާއިލާ މީހެއްގެ ޖޯޒީ ދިނަސް ނޭނގޭނެ ކަމަށާއި އެންމެން ތިބެނީ އެއްގޮތަށް ކަމަށް ބުނެފަ އެވެ. މިއީ، ދެކުނު ކޮރެއާގެ މީހުންގެ ބުރުސޫރަ ހުންނަ ގޮތަށް މަލާމަތް ރައްދުވާ ގޮތަށް، ބެންޓަންކޫރު ބުނި އެއްޗެއް ކަމަށް ބަލައި، ގިނަ ބަޔަކު އެ ވާހަކަ ދެއްކި އެވެ. އޭގެ ފަހުން، ބެންޓަންކޫރު ވަނީ އިންސްޓަގްރާމް މެދުވެރިކޮށް ކުރި ޕޯސްޓެއްގައި ސޮން ކިބައިން މާފަށް އެދިފަ އެވެ. އަދި، އެއީ، ޖޯކަކަށް ބުނި ކަމުގައި ވިޔަސް ދެއްކުނު ގޯސް ވާހަކައެއް ކަމަށް ބެންޓަންކޫރު ވަނީ އެއްބަސްވެފަ އެވެ.

މި މައްސަލަ ބަލައި ނިންމުމަށް ފަހު، އިނގިރޭސި އެފްއޭ އިން ވަނީ ބެންޓަންކޫރު ހަތް މެޗަށް ސަސްޕެންޑްކޮށް، 150،000 ޑޮލަރުން ޖޫރިމަނާކުރުމުގެ އިތުރުން، މެންޑޭޓަރީ ފޭސް ޓު ފޭސް ޕްރޮގްރާމެއްގައި ބައިވެރިވުމަށް އަންގައިފަ އެވެ.

މި ސީޒަނުގައި ޓޮޓެންހަމްގެ 15 މެޗެއްގައި ކުޅެފައިވާ ބެންޓަންކޫރަށް، ސަސްޕެންޝަންގެ މުއްދަތު ފުރިހަމަކޮށްފައި އެނބުރި އާދެވޭނީ ޑިސެމްބަރު 26 ގަ އެވެ. ސަސްޕެންޝަންގެ ސަބަބުން ބެންޓަންކޫރަށް ގެއްލޭ މެޗުތަކުގެ ތެރޭގައި، ޓޮޓެންހަމް އިން ލީގުގައި މެންޗެސްޓާ ސިޓީ އާއި ލިވަޕޫލް އަދި ޗެލްސީއާ ކުޅޭ މެޗު ހިމެނެ އެވެ.

ސަސްޕެންޝަންގައި ހުއްޓަސް ބެންޓަންކޫރަށް ޓޮޓެންހަމް އިން ޔޫރޮޕާ ލީގުގައި ކުޅޭ މެޗުތަކުގައި ކުޅެވޭނެ އެވެ. އެއީ، އޭނާ އަށް ދީފައިވާ ސަސްޕެންޝަނަށް އަމަލުކުރަން ޖެހޭނީ އިންގްލެންޑްގެ މުބާރާތްތަކުގައި އެކަނި ކަމަށްވާތީ އެވެ.