ދަތުރުކުރެއްވި ހެލިކަޕްޓަރު ވެއްޓި އަވާހަރަވި އިރާންގެ ރައީސް، އިބްރާހިމް ރައިސީ، 63, ގެ ހަށިކޮޅު ހަތަރު ދުވަސް ފަހުން ފަސްދާނުލައްވައިފި އެވެ.

ރައިސީގެ ޖަނާޒާގައި އިރާނުގެ އެތައް ހާސް ރައްޔިތުންނެއްގެ އިތުރުން ދުނިޔޭގެ އެކި ރައީސުންނާއި، ގައުމުގެ އިއްޒަތްތެރިން ބައިވެރިވެވަޑައިގެން ފަހުގެ އިހުތިރާމް އަދާކުރެއްވި އެވެ.

ރައިސީގެ ސަންދޯއް އިރާނުގެ އެކި ހިސާބުތަކަށް ހަތަރު ދުވަސްވަންދެން ގެންގޮސްފައި ވާއިރު، އެ ގައުމުގެ ރޫހާނީ ލީޑަރު އާޔަތުﷲ އަލީ ހާމަނާއީ އިމާމުކަން ކުރެއްވި ކަށުނަމާދުގައި ވެސް އެތައް ހާސް ރައްޔިތުންނެއް ބައިވެރިވި އެވެ.

ރައިސީގެ ޖަނާޒާގައި ރައީސް ޑރ. މުހައްމަދު މުއިއްޒުގެ ހާއްސަ މަންދޫބެއްގެ ގޮތުގައި ލޯކަލް ގަވަމެންޓު މިނިސްޓަަރު އާދަމް ޝަރީފް ވަނީ ބައިވެރިވެވަޑައިގެންފަ އެވެ.

ރައިސީ އަވަހާރަވީ މެއި 19، 2024 ގައި އިރުމަތި އަޒަރުބައިޖާނުގައި ބޭއްވި ރަސްމިއްޔާތަކަށް ފަހު އެނބުރި ގައުމަށް ވަޑައިގެންނެވި ހެލިކޮޕްޓަރު ވެއްޓުނު ހާދިސާގަ އެވެ. އެ ހެލިކަޕްޓަރުގައި ރައިސީގެ އިތުރުން އިރާނުގެ ފޮރިން މިނިސްޓަރު އަދި އިރުމަތީ އަޒަރުބައިޖާނުގެ ގަވަރުނަރު ވެސް ވަނީ ނިޔާވެފަ އެވެ.

އިރާންގެ އަށް ވަނަ ރައީސް, ރައިސީ ވެރިކަމާ ހަވާލުވެވަޑައިގެންނެވީ އޯގަސްޓް، 2021، ގަ އެވެ. އެމަނިކުފާނު ވަނީ އިރާނުގެ ޕްރޮސެކިއުޓާ ޖެނެރަލްގެ މަގާމު 2014 އިން 2016 ގެ ނިޔަލަށް ފުރުއްވާފަ އެވެ.

އިރާންގެ ވަގުތީ ރައީސްކަމާ ނައިބުރައީސް މުހައްމަދު މުހްބަރް, 69 ހަވާލުވެވަޑައިގެންފައިވާއިރު، އިރާންގެ އާ ރައީސް އިންތިހާބު ކުރުން ޖޫން، 28 ގައި ބޭއްވުމަށް ވަނީ ނިންމައިފަ އެވެ.