ލަންޑަން (މެއި 23) - މެންޗެސްޓާ ޔުނައިޓެޑްގެ ކޯޗުކަމުން އެރިކް ޓެން ހާގް ވަކިކޮށް، އެ މަގާމު، ދާދި ފަހުން، ޗެލްސީ ދޫކޮށްލި ކޯޗު މައުރީސިއޯ ޕޮޗެޓީނޯ އަށް ހުށަހަޅައިފިނަމަ އޭނާ އެކަން ގަބޫލުކުރަން ތައްޔާރަށް ހުރި ކަމަށް ރިޕޯޓްތައް ބުނެފި އެވެ.

ދެ އަހަރުގެ ކޮންޓްރެކްޓެއްގައި، ޗެލްސީ އަށް މި ސީޒަނުގައި ސޮއިކުރި ޕޮޗެޓީނޯ، ވަނީ ކްލަބްގެ ވެރިންނާ މަޝްވަރާކޮށް، އެއް އަހަރަށް ފަހު ކޮންޓްރެކްޓް ނިންމާލައި، އެ ޓީމު ދޫކޮށްލައިފަ އެވެ.

ހޮނިހިރު ދުވަހު ކުޅޭ އެފްއޭ ކަޕް ފައިނަލް މެޗަށް ފަހު، ޔުނައިޓެޑްގެ ކޯޗުކަމުން ޓެން ހާގް ވަކިކުރާނެ ކަމަށް ރިޕޯޓްތައް ބުނެ އެވެ.

ޔުނައިޓެޑްގެ ތާރީހުގައި، އިނގިރޭސި ޕްރިމިއާ ލީގުގައި އެންމެ ދަށް ނަތީޖާއެއް އެ ޓީމުގެ ފަރާތުން ފެނުނީ މި ސީޒަނުގަ އެވެ. ޔުނައިޓެޑް، މި ފަހަރު ލީގު ނިންމާލީ އަށް ވަނައިގަ އެވެ. އެހެންވެ، ޔުނައިޓެޑްގެ ބޯޑުން، ޓެން ހާގް ވަކިކޮށް، އާ ކޯޗަކާ ޓީމު ހަވާލުކުރަން ނިންމާފައިވާ ކަމަށް ރިޕޯޓްތައް ބުނެ އެވެ.

ދާދި ފަހުން، ޔުނައިޓެޑްގެ ފުޓްބޯޅައިގެ ކަންކަމާ ހަވާލުވި، އިިނިއޯސް ކުންފުނިން އަންނަނީ އެ ޓީމަށް ކޯޗެެއް ހޯދުމުގެ މަސައްކަތް ކުރަމުން ކަަމަށް ވެސް އިނގިރޭސި ރިޕޯޓްތައް ބުނެ އެވެ.

މީގެ ކުރިން ވެސް ޔުނައިޓެޑުން ވަނީ ޕޮޗެޓީނޯއާ ޓީމު ހަވާލުކުރަން މަސައްކަތްކޮށްފަ އެވެ. އެކަމަކު، އޭރު އޭނާ އެ ޓީމަށް ގެނެވޭ ގޮތެއްނުވީ، ކްލަބެއްގެ ކޮންޓްރެކްޓެއްގައި ހުރުމުންނެވެ.

ކުރިން، ޓޮޓެންހަމް ހޮޓްސްޕާސް އާއި ސައުތެމްޓަން އަދި ޕީއެސްޖީ އަށް ކޯޗުކޮށްދިން ޕޮޗެޓީނޯގެ އިތުރުން، ޔުނައިޓެޑުން ދެން އެ ޓީމުގެ ކޯޗަކަށް ގެންނަން މަޝްވަރާކުރަމުން އަންނަ އެއް ކޯޗަކީ، ބަޔާން މިއުނިކްގެ ކޯޗުކަމުން މި ސީޒަނަށް ފަހު، ވަކިވި، ތޯމަސް ޓުޗެލް އެވެ.

ބްރައިޓަންގެ ކޯޗުކަމުން ވަކިވި އިޓަލީގެ ކޯޗު، ރޮބާޓޯ ޑި ޒާބީ އަކީ ވެސް ޔުނައިޓެޑުން މަޝްވަރާކޮށްފާނެ ކޯޗެއް ކަމަށް ރިޕޯޓްތައް ބުނެ އެވެ.