ސިފައިން ސަލާމަތީ ކަންކަން ބަލަހައްޓާ ތަންތަނާއި އެއާޕޯޓުތައް ކައިރި ޑްރޯން އަރުވާ މައްސަލަ ބޮޑުވެ، ހުއްދަ ނުހޯދާނަމަ ފިޔަވަޅު އަޅާނެ ކަމަށް ޑިފެންސް މިނިސްޓްރީން ބުނެފި އެވެ.

މިއަދު ނެރުނު އިއުލާނެއްގައި އެ މިނިސްޓްރީން ބުނީ، މިހާރަކަށް އައިސް މިފަދަ ތަންތަން ކައިިރި ޑްރޯން އަރުވާ މިންވަރު އިތުރުވެފައިވާ ކަމަށެވެ. އަދި މިއީ އެ ތަންތަނުގެ ސަލާމަތާއި ވައިގެ ދަތުރުފަތުރަށް ނުރައްކަލެއް ކުރިމަތިވެދާނެ ފަދަ އަމަލެއް ކަމަށްވެސް ޑިފެންސުން ބުނެފައިވެ އެވެ.

މީގެ ކުރިންވެސް ޑްރޯން އުދުއްސުމަށް ހުއްދަ ހޯދަން ޖެހޭ ކަމަށް އަންގާފައިވާނެ ކަމަށާއި ރާއްޖޭގެ ކޮންމެ ދިމާއެއްގައި ޑްރޯން އަރުވަން ބޭނުންވި ކަމުގައިވިއަސް ދިފާއި ވުޒާރާގެ ހުއްދަ ހޯދުމަށްވެސް މިއަދު ނެރުނު އިއުލާނުގައި ބުނެފައިވެ އެވެ.

އަދި ހުއްދަ ނުހޯދާ ޑްރޯން އަރުވާނަމަ ފިޔަވަޅު އަޅާނެ ކަމުގެ އިންޒާރުވެސް މިނިސްޓްރީން ވަނީ ދީފަ އެވެ.

"ހުއްދަ ނުހޯދާ އުދުއްސާ ޑްރޯންތަކާމެދު މި ވުޒާރާއިން އަޅާ ފިޔަވަޅަކާއި ގުޅިގެން އެތަކެއްޗަށް ލިބޭ ގެއްލުމެއްގެ ޒިންމާ މި ވުޒާރާއިން ނުނަގާނެ،" ޑިފެންސް މިނިސްޓްރީގެ އިއުލާނުގައި ބުނެފައިވެ އެވެ.

މިފަދައިން އެއާޕޯޓުތައް ކައިރި ޑްރޯން އެރުވުމުގެ ސަބަބުން ވައިގެ ދަތުރުތަކަށް އަސަރު ކުރާ ކަމަށް ބުނެ ޕައިލެޓުން އެކި ފަހަރުމަތިން ވަނީ ސޯޝަލް މީޑިއާގައި ޝަކުވާވެސް ކޮށްފަ އެވެ. މި ފަހުންވެސް އެފަދަ ވީޑިއޯއެއް ސޯޝަލް މީޑިއާގައި ދައުރުވި އެވެ.