ލ. ފޮނަދޫ ކައުންސިލުގެ ސެކްރެޓަރީ ޖެނެރަލް މުހައްމަދު ފާއިގު މަގާމުން ވަކިކޮށް ދިނުމަށް އެދި ސިވިލް ސާވިސް ކޮމިޝަން (ސީއެސްސީ) އަށް ހުށަހަޅަން އެ ކައުންސިލުން ނިންމައިފި އެވެ.

މިދިޔަ ހަފުތާގައި ބޭއްވި ފޮނަދޫ ކައުންސިލުގެ 19 ވަނަ އާންމު ޖަލްސާގައި ނިންމާފައި ވަނީ އެސްޖީ މަގާމުގެ ޒިންމާތަކާއި މަސްއޫލިއްޔަތު އެކަށީގެންވާ މިންވަރަށް އަދާކުރަމުން ނުގެންދާ ކަމަށެވެ. އޭނާ މަގާމުން ވަކިކޮށްދިނުމަށް އެދި ސިވިލް ސާވިސް ކޮމިޝަން (ސީއެސްސީ) އަށް ހުށަހަޅަން ނިންމީ އެހެންވެ އެވެ.

ފާއިގު, މަގާމުގެ ޒިންމާތަކާއި މަސްއޫލިއްޔަތު އަދާ ނުކުރާ ކަމަށް ބުނެ ގިނަ ސަބަބުތަކެއް ކައުންސިލުގެ އާންމު ޖަލްސާގައި ފާހަގަކޮށްފައިވެ އެވެ. އޭގެ ތެރޭގައި, ކައުންސިލުގެ ނިންމުންތައް ތަންފީޒު ކުރުމުގައި އެއްބާރުލުން ނުދިނުމާއި, އަތޮޅު ކައުންސިލަށް ފޮނުވަންޖެހޭ ރިޕޯޓުތައް ނުފޮނުވުމާއި, ހާލުބެލުން ޕޯޓަލްގެ މަސައްކަތް ނުކުރުމާއި, މަސައްކަތް ހޭންޑްއޯވާ ނުކޮށް ޗުއްޓީއަށް ދިއުމާއި, ހެނދުނުގެ ބްރީފިންތަކަށް ހާޒިރުނުވުން ހިމެނެ އެވެ.

މިކަމާ ގުޅޭ ގޮތުން ފާއިގު 'އަދަދު' ނޫހަށް ވިދާޅުވީ އޭނާ މަގާމުން ވަކިކުރަން ނިންމީ ޒިންމާ އާއި މަސްއޫލިއްޔަތު އަދާ ނުކޮށްގެން ނޫން ކަމަށާއި، އެކަމުގައި އޮތީ ސިޔާސީ މަގުސަދެއް ކަމަށެވެ. އެ ސަބަބަކީ އޭނާ ވިދާޅުވި ގޮތުގައި ނިމިގެން ދިޔަ ރައްޔިތުންގެ މަޖިލިސް އިންތިހާބުގައި، ޕީއެންސީގެ ކެންޑިޑޭޓު، އަބްދުއްރަހީމް އަބްދުﷲ އަށް ތާއިދު ނުކޮށް، އެ ދާއިރާ އަށް އަމިއްލަ ގޮތުން ވާދަކުރި އިބްރާހިމް އަނީސް އަށް އޭނާ ތާއިދު ކުރުމެވެ.

"އަޅުގަނޑު ޗުއްޓީގައި މިވަގުތު މިހިރީ, ޗުއްޓީން އަންނަން ވާއިރަށް ނިންމާފައި އޮތް ނިންމުމެއް އެއީ, ބޮޑަށް ބެލެވެނީ ސިޔާސީ ގޮތުން މިހާރު ތިބި ކައުންސިލަރުންނާ ހިޔާލު ތަފާތުވުން ހުރި ގޮތުންހެން. އެއީ ޕީއެންސީ ބައެއް. އެ ބޭފުޅުން ބޭނުންވަނީ އަޅުގަނޑު ބޭރު ކުރަންކަން ގަބޫލުކުރެވެނީ," ފާއިގު ވިދާޅުވި އެވެ.

ސެކްރެޓަރީ ޖެނެރަލްގެ މަގާމަކީ ސިވިލް ސާވިސްގެ މަގާމަކަށް ވުމާއެކު އޭނާ އެ މަގާމުން ދުރުކުރާނީ، މައްސަލަ ސިވިލް ސާވިސް ކޮމިޝަނުން ބެލުމަށް ފަހު އެވެ.