ޓޫރިޒަމް ދާއިރާގަ ވަޒީފާ އަދާކުރާ އަންހެނުން އިތުރުކުރަން ޓޫރިޒަމް މިނިސްޓްރީން އިފްތިތާހުކުރި "ފަހި ފަތުރުވެރިކަމަށް އަންހެނުން" ޕްރޮގްރާމުގައި 58 އަންހެނުން ބައިވެރިވެފައިވާ ކަމަށް އެ މިނިސްޓްރީން ބުނެފި އެވެ.

މި އަހަރުގެ ޖެނުއަރީ 18، ވަނަ ދުވަހު އިފްތިތާހު ކުރި ޕްރޮގްރާމާ ބެހޭ ގޮތުން މިނިސްޓްރީން ބުނީ މިހާރު ކުރިއަށްދަނީ ޕްރޮގްރާމްގަ ބައިވެރިވި ފަރާތްތަކަށް މެންޓޯ އިން ހަމަޖެއްސުމުގެ މަސައްކަތް ކަމަށެވެ.

ޓޫރިޒަމް މިނިސްޓްރީން ބުނި ގޮތުގައި ޓޫރިޒަމް ދާއިރާ އިން ސެޓްފިކެޓް، ޑިޕްލޮމާ ނުވަތަ ޑިގްރީ ހާސިލުކޮށްފައިވާ ދަރިވަރުންނަށް، އަހަރަކު ދެފަހަރު ހިންގާ މި ޕްރޮގްރާމުގަ ތިން މަރުހަލާ އެއް ހިމެނެ އެވެ.

އެ ޕްރޮގްރާމުގަ ޓޫރިޒަމް ދާއިރާގަ ތަޖުރިބާހުރި ފާރާތެއް ކޮންމެ ދަރިވަރެއްގެ މެންޓޯއެއްގެ ގޮތުގަ ހަމަޖައްސައި، ތިން މަސް ދުވަހުގެ މުއްދަތަށް މެންޓޯޝިޕް ކުރިއަށްދާނެ ކަމަށް މިނިސްޓްރީން ބުނެ އެވެ.

"މިހާރު ކުރިޔަށް ދަނީ ކޮންމެ ދަރިވަރެއްގެ އިންޓްރެސްޓް ހުރި ދާއިރާއަކާ ގުޅޭ މެންޓަރުން އެ ދަރިވަރަކާ ގުޅުވުމުގެ މަސައްކަތް، މި މަސައްކަތް ނިމުމުން ދަރިވަރުން މެންޓަރުންނާ އެޓޭޗްވެ މަސައްކަތް ފަށާނެ،" މިނިސްޓްރީގެ އޮފިޝަލަކު ވިދާޅުވީ ބަރިވެރިންނަށް ފައިސާގެ އިނާޔަތެއް ވެސް ލިބޭނެ ކަމަށެވެ.

ރާއްޖޭގަ ވަޒީފާއަދާކުރާ އާބާދީގެ 13 ޕަސެންޓް މަސައްކަތް ކުރަނީ ޓޫރިޒަމް ދާއިރާގަ އެވެ. އެއީ ގާތްގަނޑަކަށް 58،000 މީހުންނެވެ. ނަމަވެސް އޭގެ ތެރެއިން އަންހެނުންގެ ހިއްސާ އަކީ 10 ޕަސެންޓްވެ.