ޗައިނާގެ ކުޅުންތެރިންނާ އެކު, ރާއްޖޭގެ ޒުވާން ޓޭބަލް ޓެނިސް ޓީމުން މި މަހު ކޮލަމްބޯގައި ކުރިއަށްދާ ސައުތު އޭޝިއަން ޖޫނިއާ ކެޑޭޓް މުބާރާތައް ފަރިތަކުރުންތައް ފަށައިފި އެވެ.

ޗައިނާގެ ފޮރިން މިނިސްޓްރީ އާއި ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) އާ ދެމެދު ހެދުނު އެގްރީމަންޓްގެ ދަށުން ޗައިނާ ކުޅުންތެރިން ރާއްޖެ އަށް ތަމްރީނު ޕްރޮގްރާމްތަކުގައި އައުމަށް ވަނީ ނިންމައިފަ އެވެ.

އެހެންވެ, ކެޑޭޓް މުބާރާތުގެ ކުރިން ޒުވާން ގައުމީ ޓީމުގެ ފަރިތަކުރުންތައް ކުރިއަށް ދަނީ މި ކުޅުންތެރިންނާ އެކުގަ އެވެ. މީގެ ކުރިން، ސާބިއާގެ ކުޅުންތެރިން ވެސް ވަނީ ޒުވާން ގައުމީ ޓީމުގެ އިތުރުން ސީނިއާ ގައުމީ ޓީމުގެ ކުޅުންތެރިންނާ އެކު، ފަރިތަކުރުންތަކުގައި ބައިވެރިވެފަ އެވެ.

ޖޫނިއާ ގައުމީ ޓީމުގެ ކޯޗު ހުސެއިން ރަޝީދު "އަދަދު" (ހުސެން) އާ ވާހަކަ ދައްކަމުން ބުނީ ޗައިނާ ކުޅުންތެރިންނާ އެކު ކުރެވުނު ފަރިތަކުރުންތައް ކާމިޔާބު ކަމަށެވެ. ޒުވާން ކުޅުންތެރިންނަށް ތަފާތު ގޮތްގޮތައް ބޯޅަތައް ކުޅެން ދަސްވެފައިވާ ކަމަށް ހުސެން ވަނީ ބުނެފަ އެވެ.

"ޓީޓީ އަކީ ތަފާތު ބޯޅަތަކެއް ކުޅެން މި ލިބެނީ އެހެން މީހުންގެ ފަރާތުން. ޗައިނާގެ ތިން ކުޅުންތެރިން މި ކުޅެނީ މުޅިން ތަފާތު ތިން ސްޓައިލަކަށް އެ ތިން ސްޓައިލަށް ކުޅުންތެރިން ފަރިތަވާނެ" ހުސެން ބުންޏެވެ.

ޖޫނިއާ މުބާރާތައް ރާއްޖެއިން ނުކުންނައިރު, ގައުމީ ޖޫނިއާ ޓީމު މުޅިން ކަހަލަ ގޮތަކަށް އާވުން އެއީ މައްސަލަ އެއް ނޫން ކަމަށް ހުސެން ވަނީ ބުނެފަ އެވެ.

ހުސެން ބުނީ ޓީމު އާވުމަކީ އަބަދުވެސް ލިބޭނެ ކުރިއެރުމެއް ކަމަށެވެ.

ޖޫނިއާ ކެޑޭޓް މުބާރާތަކީ ރާއްޖޭގެ ކުޅުންތެރިން ކާމިޔާބު ނަތީޖާތަކެއް ނެރެފައިވާ މުބާރާތެކެވެ. އެގޮތުން ރާއްޖޭގައި ބޭއްވި މި މުބާރާތުން ރާއްޖޭގެ ޓީޓީ ތަރި ފާތިމަތު ދީމާ އަލީ ވަނީ ރިހި މެޑަލް ހޯދާފަ އެވެ. އަދި އެ މުބާރާތުގެ ޓީމް އިވެންޓުން ރާއްޖޭގެ އަންހެން ޓީޓީ ޓީމް ވަނީ ލޯ މެޑަލް ހޯދާފަ އެވެ.

މި ފަހަރުގެ މުބާރާތް ކުރިއަށްދާނީ ސްރީލަންކާގެ ކެންޑީގައި މި މަހުގެ 26-29 އަށެވެ.