ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންމެ ބޮޑު އިސްކަމެއް ދީގެން ކުރަންވީ ކަމަކީ އެ އިދާރާއިން ކޮރަޕްޝަން ނައްތާލުމަށް ކަމަށާއި އެ އަށް ފަހު، ދިވެހި ކުޅުންތެރިންނާއި ކޯޗުން އަދި އެޑްމިނިސްޓްރޭޓަރުންނަށް ފުރުސަތު ފަހިވާގޮތަށް ކަންކަން ކުރިއަށްގެންދަން ކްލަބް ގްރީން ސްޓްރީޓްސްގެ ހެޑް ކޯޗު އަލީ ނިސްތާރު މުހައްމަދު ގޮވާލައިފި އެވެ.

އެފްއޭއެމް އިން "ޖޮބްސް4ފުޓްބޯލް" ގައި އިއުލާނުކުރި ޓެކްނިކަލް ވަޒީފާތަކަށް 600 އަށް ވުރެ ގިނަ ހުށަހެޅުން ލިބުނު ކަމަށް އެ އެސޯސިއޭޝަންގެ ސޯޝަލް މީޑިއާ ޗެނަލްތައް މެދުވެރިކޮށް ވަނީ މައުލޫމާތު އާންމުކޮށްފަ އެވެ. އަދި މިއީ ވަރަށް ބޮޑު މަސައްކަތެއްގެ ގޮތުގައި ދޭހަވާ ގޮތަށް، އެފްއޭއެމްގެ ޓެކްނިކަލް ޑިރެކްޓަރު، ޕޯލް ސްމޯލީ ވެސް އަންނަނީ މީޑިއާގައި ވާހަކަ ދައްކަމުންނެވެ.

އެ އަށް ރައްދުދީ، ފުރަތަމަ ޑިވިޝަނުގެ ކޯޗިންގައި ގިނަ އަހަރުތަކެއް މަސައްކަތް ކޮށްފައިވާ ކޯޗު، ނިސްތާރު ބުނީ، ރަނގަޅަށް ކުޅެގެން ކުރިއަރާނެ ހަރުދަނާ ޕްލެޓްފޯމެއް ނެތި ފުޓްބޯޅަ ކުރިއަށްދާނެ މިސްރާބެއް ނުފެންނާނެ ކަމަށެވެ.

"އެންމެ ފުރަތަމަ ކަމަކަށް ޓުވާޑްސްފިއުޗާ (އެފްއޭއެމްގެ ޕްލޭން)ގެ ކަންކަން ބަދަލުކުރަންވީ ކޮރަޕްޝަން ނައްތާލުމަށް. ދެން ލިސްޓެއް ހަދަންވީ މިދިޔަ ފަސް އަހަރު ތެރޭ ފެއިލްވި ހުރިހާ ޕްރޮޖެކްޓެއްގެ. ދެން ބަލަންވީ އޭގެއިން މާލީ މަންފާ ކުރީ ކޮންބަޔަކަށްތޯ. އެ ބަޔަކު ހޯދައި އެއީ ކޮންމެ ބަޔަކު ކަމަށް ވިޔަސް އެބަޖެހޭ ފުޓްބޯޅައިގެ ކަންކަމުން އެކަހެރިކުރަން، އެއީ، މެޗު ފިކްސްކުރާ މީހުންނާ މެދު އަމަލުކުރާ އުސޫލުން ނަމަވެސް،" ނިސްތާރު، އޭނާގެ ފޭސްބުކް އެކައުންޓް މެދުވެރިކޮށް ލިޔެފައިވެ އެވެ.

ކުރިން، އއ. މާޅޮސް އާއި ށ. ފޯކައިދޫ އަށް ފުރަތަމަ ޑިވިޝަނުގައި ކޯޗުކަން ކޮށްދިން ނިސްތާރު ބުނީ، ދިވެހި ފުޓްބޯޅައިގެ ހައްގުގައި އެތައް މަސައްކަތްކުރި މީހުންނަށް ލިބެންޖެހޭ މުސާރަ އަދާކޮށްފައި ނޫނީ ބޮޑު ނަންތަކެއް ކިޔާ ބޭރު ބަޔަކަށް ވަޒީފާ ދިނުމަކީ ހައްލެއް ނޫން ކަމަށެވެ.

"އިހުތިރާމް ކުރަންވީ ދިވެހި ކުޅުންތެރިންނާއި ކޯޗުން އަދި އެޑްމިނިސްޓްރޭޓަރުން ކުރާ ބުރަ މަސައްކަތަށް. ދެން، މީހުން ނަގަންވީ ބޭނުންވާ މަސައްކަތަށް އެންމެ ރަނގަޅު މީހާ، މީހުން މަގާމުތަކަށް ހޯދަންވީ ހަމުގެ ކުލަަޔަށް ނޫނީ ނިސްބަތްވަނީ ކޮން ގައުމަކަށްތޯ ބަލާފައެއް ނޫން،" ނިސްތާރު ލިޔެފައިވެ އެވެ.

އޭނާ ބުނީ މި ވޭތުވެދިޔަ ތަނުގައި، އެފްއޭއެމް އިން ގައުމީ ޓީމުގެ ކޯޗަކަށް ގެނައި، އިޓަލީ ގައުމީ ޓީމުގެ ކުރީގެ ކުޅުންތެރިޔާ، ފްރެންޗެސްކޯ މޮރިއޭރޯ އާއި ޓެކްނިކަލް ޑިރެކްޓަރަކަށް ގެނައި، އިނގިރޭސިވިލާތަށް ނިސްބަތްވާ ޖުދާން އަލީ ފަދަ، ބޮޑު މުސާރަ ދިން މީހުންނަށް ހާސިލްކުރެވުނު އެއްވެސް ނަތީޖާއެއް ނެތެވެ.

މާލީ ގޮތުން ބަލާއިރު، ރާއްޖޭގެ ފުޓްބޯޅަ ބޮޑުތަނުން އަޑިއަޅާލައިފައި އޮތްއިރު، އެފްއޭއެމް ހިންގުމުގައި ވެސް އެތައް މައްސަލައެއް އޮތީ ކުރިމަތިވެފަ އެވެ. އެފްއޭއެމް އިން އެ ތަނުގެ މުވައްޒަފުންނަށާއި ކްލަބްތަކަށް ދޭން ޖެހޭ މުސާރަ އާއި ފައިސާ ބަރާބަރަށް ދީފައިނުވެ އެެވެ. އަނެއްކޮޅުން، އެފްއޭއެމް އިން އަމިއްލަ ކުންފުނިތަކާ އެކު ކޮށްފައިވާ އެކި މުއާމަލާތްތަކުގައި، ކޮންޓްރެކްޓް ހަދައިގެން އެއްބަސްވި ގޮތަށް ފައިސާގެ ކަންކަން ނިންމާފައިނުވެ އެވެ. އެހެންވެ، އެކި ކުންފުނިތަކުން ވަނީ ކޯޓަށް މައްސަލަ ހުށަހަޅައިފަ އެވެ.

ކޯޓުން އަންނަނީ ފަހަރަކު މައްސަލައެއް ގޮތަށް އެފްއޭއެމްގެ މައްޗަށް ފައިސާ ދައްކަން ހުކުމްކުރަމުންނެވެ. އެކަމަކު، އެފްއޭއެމްގައި އެ ފައިސާ ދެއްކޭނެ ފަދަ ވެސް ނެތެވެ.

މި ވަގުތު ދިވެހި ފުޓްބޯޅަ އޮތް ހާލަތަށް ބަލާއިރު، ދުނިޔޭގެ މައި ފުޓްބޯޅަ އިދާރާ، ފީފާ އާއި އޭޝިއާގެ ފުޓްބޯޅަ ފެޑެރޭޝަން، އޭއެފްސީން އަންގައިގެން، އެފްއޭއެމްގެ އިންތިހާބުގެ ކަންކަން އޮތީ މަޑުޖައްސާލައިފަ އެވެ. އެފްއޭއެމްގެ މައްސަލަ ބަލަން ވަރަށް އަވަހަށް ފީފާގެ ޓީމެއް ރާއްޖެ އަންނަ ގޮތަށް ވަނީ ހަމަޖެހިފަ އެވެ.