ރައީސް ޑރ. މުހައްމަދު މުއިއްޒުގެ އަމިއްލަ އެކައުންޓަށް ފައިސާ ޖަމާވުމުގައި ކޮރަޕްޝަނަށް މަގުފަހިވާ ގޮތަށް އަމަލުކޮށްފައިވާ ކަމަށް ތުހުމަތު ކުރެވޭ މައްސަލައަކާ ގުޅޭ އިންޓެލިޖެންސް ރިޕޯޓުތަކެއް މިރޭ ލީކުކޮށްލައިފި އެވެ.
މި ރިޕޯޓުތައް ލީކުކޮށްލީ ޓްވިޓާގައި ކާކުކަން ނޭނގޭ ގޮތަށް ސަރުކާރަށް ފާޑުކިޔައި އެކި މައުލޫމާތުތައް ހާމަކުރަމުންދާ "ހަސަން ކުރުސީ"ގެ އެކައުންޓުންނެވެ. އެ އެކައުންޓުން ވަނީ ރައީސްގެ އެކައުންޓަށް ޖަމާވި ފައިސާތަކާ ގުޅޭގޮތުން އެމްއެމްއޭގެ ފައިނޭންޝިއަލް އިންޓެލިޖެންސް (އެފްއައިޔޫ) އަދި ފުލުހުންގެ އިންޓެލިޖެންސުން އެކުލަވާލާފައިވާ ދެ ރިޕޯޓެއް ލީކުކޮށްލާފަ އެވެ.
މި ރިޕޯޓުތަކާ ގުޅިގެން "އަދަދު" އިން އެއްކުރި މައުލޫމާތުތަކުން ވަނީ މިއީ ސައްހަ ރިޕޯޓުތަކެއްކަން ކަށަވަރު ކުރެވިފަ އެވެ. މިއީ މިފަހުން އެފްއައިޔޫގެ އިންޓެލިޖެންސް ރިޕޯޓެއް ލީކުވި ފުރަތަމަ ފަހަރެވެ. މިއީ 2018 ގައި ތައްޔާރުކޮށްފައިވާ ރިޕޯޓެކެވެ.
މިހާތަނަށް މި ރިޕޯޓުތަކާއި އަދި ރިޕޯޓުތައް ލީކުވި ސަބަބު ހޯދުމަށް ކުރަމުންދާ މަސައްކަތްތަކާ ގުޅޭގޮތުން އެއްވެސް އިދާރާއަކުން މައުލޫމާތު ލިބިފައި ނުވެ އެވެ.
ލީކުކޮށްފައިވާ އެފްއަައިޔޫގެ ރިޕޯޓުގެ ތިރީގައި ރައީސް މުއިއްޒުއާ ގުޅުވައި ރެޑް ފްލެގް އިންޑިކޭޓާސްގެ ގޮތުގައި ސީރިއަސް 10 ނުކުތާއެއް ބަޔާންކޮށްފައިވެ އެވެ.
ރައީސްއާ ގުޅުވައި ރިޕޯޓުގައި އޮތް ރެޑް ފްލެގް އިންޑިކޭޓާސް
- ޕޮލިޓިކަލީ އެކްސްޕޯޒްޑް ޕާސަން (ޕީއީޕީ) ނުވަތަ ސިޔާސީ ފަރާތްތަކާއި އަދި އެ ފަރާތްތަކުން ކޮންޓްރޯލް ކުރާ ކުންފުނިތަކާ ގިނަ މުއާމަލާތްތަކެއް ކުރުން
- އެމްބެޒެލްމެންޓް ނުވަތަ ހިޔާނާތްތެރިވުން
- ފޮރުވުމަށްޓަކައި ލޭޔަރުކޮށް ސްޓްރަކްޗާ ކޮށްފައިވާ ޓްރާންސެކްޝަން ޕެޓާން
- ފަންޑުތަކުގެ އަސްލު ފޮރުވުމަށް ރަސްމީ ނިޒާމުތައް ބޭނުންކުރުން
- ބޭންކަށް ސައްހަ ތެދު މައުލޫމާތު ނުދިނުން
- ވަރަށް ގިނައިން އެއްވެސް ސަބަބެއް ބަޔާންކުރުމެއް ނެތި ނަގުދު ފައިސާ ޖަމާކޮށް ނެގުން
- ސަރުކާރުގެ ޕްރޮޖެކްޓުތައް ހިންގަން ދިން ކުންފުނިތަކުން ފައިސާ ލިބިފައިވުން
- ގިނަ އަދަދެއްގެ ނަގުދު ފައިސާ ގެންގުޅުން
- ދިމްޔާތު ޕްރައިވެޓް ލިމިޓެޑްގެ ފައިދާ ލިބުން
- ނުހައްގު މުއްސަދިކަން
ރައީސް މުއިއްޒުގެ އެކައުންޓަށް ފެބްރުއަރީ 01, 2017 އިން ފެށިގެން އޮކްޓޯބަރު 15, 2018 ގެ ނިޔަލަށް ޖަމާވެފައިވާ ފައިސާއާ ގުޅޭ ރިޕޯޓެއް ސެޕްޓެމްބަރު 2, 2023 ގައި "އަދަދު" ނޫހުގައި ޝާއިއު ކޮށްފައިވާނެ އެވެ.
