ދިވެހިރާއްޖޭގައި ހަރަކާތްތެރިވާ ގޭންގުތަކުގެ ސަބަބުން ރާއްޖޭގެ ސަލާމާތްތެރިކަން ގެއްލޭ ކަމަށާއި އެކަން ހުއްޓުވަންޖެހޭ ކަމަށް ހޯމް ލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު ފުލުހުންނާ ބައްދަލު ކުރަން އިސްކަންދަރު ކޮށީގައި ބުރާސްފަތި ދުވަހުގެ ރޭ ބޭއްވި ޖަލްސާއެއްގައި ވާހަކަ ދައްކަވަމުން އިހުސާން ވިދާޅުވީ، ރާއްޖޭގެ ދާހިލީ ރައްކާތެރިކަމާއި ސަލާމާތްތެރިކަން ކަށަވަރު ކުރުމަށް ގޭންގު ކުށްތައް ހުއްޓުވަންޖެހޭ ކަމަށެވެ.

ގޭންގު ކުށްތައް ހުއްޓުވުން ފުލުހުންގެ އެންމެ އިސް ތިން އަމާޒުގެ ތެރޭގައި ހިމެނޭ ކަމަށް ވެސް އިހުސާން ވިދާޅުވި އެވެ. ފުލުހުންގެ އެންމެ އިސް ތިން އަމާޒުގެ ތެރޭގައި މަސްތުވާތަކެތީގެ މައްސަލަ ހައްލު ކުރުމާއި ގަވާއިދާ ހިލާފަށް އުޅޭ ބިދޭސީން ހުއްޓުވުން ހިމެނޭ ކަމަށް ވެސް އޭނާ ވިދާޅުވި އެވެ.

އެ ޖަލްސާގައި ރައީސް މުއިއްޒު ވެސް ވާހަކަ ދެއްކެވި އެވެ. ރައީސްގެ ވާހަކައިގައި، ފުލުހުން ދޭ ހިދުމަތް ރައްޔިތުންނާ ގާތުން ލޯބިން ދިނުމަށް އެމަނިކުފާނު އެދިވަޑައިގެންނެވި ކަމަށް ފުލުހުން ބުނެ އެވެ. އަދި ފުލުހުންގެ މުއައްސަސާ ހަރުދަނާ ކުރުމަށް ކުރިއަށް ރާވާފައި ހުރި ބައެއް ކަންކަމުގެ މައްޗަށް އަލިއަޅުއްވާލެއްވި ކަމަށް ވެސް ފުލުހުން ބުނެ އެވެ.

ފުލުހުންނާއެކު ރައީސް ބޭއްވި ބައްދަލުވުން އާންމުކޮށް ބްރޯޑްކާސްޓްކޮށްފައެއް ނުވެ އެވެ. އަދި އެ ޖަލްސާއަށް މީޑިއާތަކަށް ދައުވަތެއް ވެސް ނުދެ އެވެ. އަދި ރައީސް އާއި މިނިސްޓަރުން ދެއްކެވި ވާހަކަތައް ވެސް އާންމެއް ނުކުރެ އެވެ. ނަމަވެސް ފުލުހުންގެ ވެބްސައިޓުގައި ލިޔެފައި އިން ހަބަރުގައި ދެއްކެވި ވާހަކަތައް ކޮންމެވެސް ވަރަކަށް ވާހަކަތައް ހިމަނާފައިވެ އެވެ.