ރައްޔިތުންގެ މަޖިލީހުގެ އިންތިހާބު ފަސްވުމުން އިތުރަށް ވޯޓު ލުމުގެ ހައްގު ލިބޭ މީހުންގެ ލިސްޓު މާދަމާ އިއުލާންކޮށް، އިތުރަށް ރީރަޖިސްޓްރީވުމުގެ ފުރުސަތު މި މަހު 14، ގައި ހުޅުވާލުމަށް ނިންމައިފި އެވެ.

ރައްޔިތުންގެ މަޖިލިހުގެ އިންތިހާބު އެންމެ ފުރަތަމަ ތާވަލުކުރީ މި މާޗު މަހު 17، އަށެވެ. އެ ތާރީހު ދިމާވަނީ ރޯދަ މަހުގެ ދުވަހަކަށެވެ. އޭގެ ފަހުން ރައްޔިތުންގެ މަޖިލީހުން ގާނޫނަށް ގެނައި ބަދަލަކީ ރޯދަ މަހުގެ ތާރީހަކަށް އިންތިހާބީ ތާރީހު ދިމާވާނަމަ ރޯދަ މަސް ނިމިގެން 10 ދުވަސް ފަހުން އިންތިހާބު ބޭއްވުމަށެވެ.

ގާނޫނު ފާސްކޮށް ތަސްދީގު ކުރުމުން، އާ ތާރީހުގެ ގޮތުގައި އިލެކްޝަންސް ކޮމިޝަން (އީސީ) އިން ނިންމީ، އޭޕްރީލް 21، އަށެވެ.

މިއަދު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ބޭއްވި ބައްދަލުވުމެއްގައި، އެ ކޮމިޝަނުގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ އޭޕްރީލް 21، އަށް އިންތިހާބު ފަސްކުރުމުން އެ ތާރީހަށް 18 އަހަރު ފުރޭ މީހުން ހިމެނުމުން ކުރިން ލިސްޓުގައި ނެތް 560 މީހަކަށް ވޯޓުގެ ހައްގު އެބަ ލިބެ އެވެ.

ހަސަން ޒަކަރިއްޔާ ވިދާޅުވި ގޮތުގައި މާދަމާ އާ ލިސްޓު އިއުލާން ކުރާއިރު ޝަކުވާ ހުށަހެޅުމުގެ ފުރުސަތު ހުޅުވާލަނީ އާ މީހުންގެ ލިސްޓަށް އެކަންޏެވެ. އެ ފުރުސަތު ހުޅުވާލާނީ މާދަމާއިން ފެށިގެން ބުރާސްފަތި ދުވަހާ ހަމައަށް ތިން ދުވަހަކަށެވެ.

ރީރަޖިސްޓްރޭޝަނަށް ވެސް އިތުރު ތިން ދުވަހުގެ ފުރުސަތެއް ހުޅުވާލަން ކުރިން އެ ކޮމިޝަނުން ނިންމާފައިވާއިރު، ޒަކަރިއްޔާ މިއަދު ވިދާޅުވީ އެ ފުރުސަތު ހުޅުވާލާނީ މި މަހު 14، ގައި ކަމަށެވެ. އެހެންކަމުން އެ ފުރުސަތު ހަމަވާނީ މި މަހު 17، އަށެވެ.

މީގެ އިތުރުން ބޭރު ގައުމުތަކުގައި ރަޖިސްޓްރީކުރަން ވެސް އަލުން ހުޅުވާލާނެ އެވެ. އަދި ކުރިން ވެސް ނިންމާފައިވާ ގޮތަށް ކަނޑައަޅާފައިވާ އަދަދަށް ރަޖިސްޓްރީވެއްޖެނަމަ އެ ގައުމެއްގައި ވޯޓު ފޮށި ބަހައްޓާނެ ކަމަށް އެ ކޮމިޝަނުން ބުންޏެވެ.

ބޭރު ގައުމުތަކުގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ކަނޑައަޅާފައި ވަނީ 150 އަށްވުރެ ގިނަ މީހުން ރީ-ރެޖިސްޓަރީ ކުރާ ގައުމުތަކުގައި އެކަންޏެވެ. ކުރިން ހުޅުވާލި ރީ-ރެޖިސްޓްރޭޝަންގެ މުއްދަތު ހަމަވިއިރު، އެ އަދަދަށް ރީ-ރެޖިސްޓަރީ ކޮށްފައި ވަނީ ހަމައެކަނި މެލޭޝިޔާ އާއި ސްރީލަންކާއިންނެވެ.

އިލެކްޝަން ކޮމިޝަނުން ކަނޑައަޅާފައިވާ ސީލިން ހަމަނުވެއްޖެނަމަ ބޭރު ގައުމުތަކުގައި ވޯޓުލާން ރަޖިސްޓްރީވި މީހުނަށް ރީރަޖިސްޓްރީވާން ވެސް އަދި ފުރުސަތެއް ހުޅުވާލާނެ އެވެ. ހުޅުވައިލި ފުރުސަތުގައި ސީލީން ހަމަނުވީ އިންޑިއާ, ތައިލެންޑް, އިނގިރޭސިވިލާތް އަދި ޔޫއޭއީ އެވެ.

މަޖިލިސް އިންތިހާބުގައި ރީ-ރެޖިސްޓަރީ ކުރަން ކުރިން ދިން ފުރުސަތުގައި ރީ-ރެޖިސްޓަރީ ކޮށްދީފައި ވަނީ 11919 މީހުންނެވެ.

އިލެކްޝަން ކޮމިޝަނުން މިހާރު ތައްޔާރުކޮށްފައިވާ ވޯޓާސް ލިސްޓުގައި މާޗު 17، ވަނަ ދުވަހާ ހަމައަށް އުމުރުން 18 އަހަރު ފުރޭ މީހުންނާއެކު ވޯޓުލުމުގެ ހައްގު ލިބިގެންވާ މީހުންގެ ޖުމުލަ އަދަދަކީ 284،327 އެވެ. އިތުރުވި 560 މީހުނާއެކު ވޯޓު ލުމުގެ ހައްގު މިހާރު 284،887 މީހުނަށް ލިބެ އެވެ.