މައުލޫމާތު ހޯދާ ލިބިގަތުމުގެ ހައްގުގުގެ ގާނޫގެ ދަށުން ދައުލަތުގެ އިދާރާތަކުން އަމިއްލައަށް އިސްނަގައިގެން ޝާއިޢުކުރާ މައުލޫމާތުގެ މިންވަރު ވަރަށް ދަށް ކަމަށް އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ބުނެފި އެވެ.

އައިކޮމް އިން މިއަދު ބޭއްވި ނޫސްވެރިންގެ ބައްދަލުބުމެއްގައި އެ އިދާރާއިން ބުނީ، ޓްރާންސްޕޭރެންސީ މޯލްޑިވްސްއާ ގުޅިގެން މިދިޔަ އަހަރުގެ ނޮވެމްބަރާއި ޑިސެމްބަރާ ދެމެދު ކުރި ދިރާސާއެއްގެ ދަށުން ދައުލަތުގެ 935 އިދާރާއެއް ބެލިއިރު ގާނޫނުން ލާޒިމްކުރާ ހުރިހާ މާއްދާއެއް ޝާއިއުކުރީ އެންމެ ހަތް އިދާރާއިން ކަމަށެވެ.

އޭގެ ތެރޭގައި ހިމެނެނީ ދެ ސިޓީ ކައުންސިލަކާއި، ހަތަރު މިނިވަން މުއައްސަސާއެއްގެ އިތުރުން ޑްރަގު ކޯޓު ކަމަށް އައިކޮމް އިން ބުނެފައިވެ އެވެ.

ނޫސްވެރިންގެ ބައްދަލުވުމުގައި އިންފޮމޭޝަން ކޮމިޝަނަަރު އަހުމަދު އާހިދު ރަޝީދު ވިދާޅުވީ، މި ދިރާސާއިން ވެސް ފާހަގަވި މައިގަނޑު އެއް ކަމަކީ ގާނޫނުން މައުލޫމާތު ހާމަކުރުން ލާޒިމުކުރި ނަމަވެސް އެކަން އެގޮތަށް ކުރުމުގެ ޕްރެކްޓިސް އިދާރާތަކުގައި ނެތުމުން ހާމަކުރުމުގެ ސަގާފަތައް ހޭނުމަށް ދަތިތަކެއް ހުރިކަން ކަމަށެވެ.

"ވަރަށް ބޮޑަށް ސިއްރިއްޔާތުގެ ސަގާފަތަކުން ހާމަކުރުމުގެ ސަގާފަތަކަށް ބަދާލުވާން މި ޖެހެނީ، އެހެންވީމަ މީގަ މައުލޫމާތު ހާމަނުކުރަނީ ކޮންމެހެން އިދާރާގެ އިސްވެރިން އަންގައިގެން ކަމަށް ނިންމާތީއެކޭ، ނުވަތަ ސިވިލް ސާވިސްގެ ތެރޭގަ އަހައްމިއްޔަތުކަން ނުދީގެންނެކޭ ސީދާ ބުނެވޭކަން ނެތް،" އާހިދު ވިދާޅުވި އެވެ.

އައިކޮމްގެ ދިރާސާއިން ހޯދި ހޯދުންތަކުން ދައުލަތުގެ ހުރިހާ ވުޒާރާއެއްގައިވެސް ވެބްސައިޓެއް ހުރި ނަމަވެސް އެ ވުޒާރާތަކުގެ ދަށުން ހިންގާ 53 އިދާރާގެ ތެރެއިން ވެބްސައިޓު ހުރީ 40 އިދާރާގައި ކަމަށެވެ.

އޭގެ އިތުރުން ޝަރުއީ ދާއިރާގެ ހުރިހާ އިދާރާއެއްގައި ވެބްސައިޓް ހުރި ނަމަވެސް ގާނޫނު ލާޒިމްކުރާ މިންވަރަށް މައުލޫމާތު ހާމަކޮށްފައި ވަނީ ޑްރަގް ކޯޓުން އެކަނި ކަމަށް ބުނެފައި ވެއެވެ.

"މީގެއިތުރުން މައުލޫމާތު ޝާއިޢުކުރުމުގައި ބޭނުންކުރާ އެންމެ މުހިންމު ވަސީލަތް ކަމަށްވާ، ވެބްސައިޓު ހުރީ 494 އިދާރާއެއްގަ، އެހެންކަމުން މޮނީޓާ ކުރި %47 އިދާރާގަ ވެބްސައިޓެއް ނެތްކަން ފާހަގަކުރެވިފައިވޭ، ވެބްސައިޓު އެންމެ މަދުން ހުރި ދާއިރާގެ ގޮތުގައި ފާހަގަވެފައިވަނީ ސިއްހީ ހިދުމަތް ދޭ ދައުލަޔުގެ އިދާރާތައް" އައިކޮމް އިން ދިން މައުލޫމާތުގައި ބުންޏެވެ.

ހުރިހާ ދާއިރާއަކާ އަޅައި ބަލާއިރު މިނިވަން މުވައްސަސާތަކުގެ ވެބްސައިޓްތައް ރަނގަޅުކަން ފާހަގަކޮށް އައިކޮމްގެ ބަޔާނުގައި ބުނީ، ހުރިހާ މިނިވަން މުވައްސަސާއެއްގެ ތެރެއިން ހަތަރު ތަނަކުން ގާނޫނު ލާޒިމުކުރާ ހުރިހާ މައުލޫމާތެއް ހާމަކޮށްފައިވާކަމަށެވެ.

ސަރުކާރު ހިއްސާވާ 31 ކުންފުންޏެއް މޮނިޓާކުރި އިރު، މައުލޫމާތު ހާމަކޮށްފައި ވަނީ އެވްރެޖްކޮށް 21% ކަމަށް އައިކޮމްއިން ބުނެ އެވެ.

ރާއްޖޭގައި ސިއްހީ ހިދުމަތްދޭ 22 ހޮސްޕިޓަލެއް ހުރި އިރު ވެބްސައިޓެއް ގާއިމްކޮށްފައި ވަނީ އެންމެ ނުވަ ހޮސްޕިޓަލުގައި ކަމަށް އައިކޮމް އިން ބުނެ އެވެ. މި ތަންތަނުން މައުލޫމާތު އާންމުކޮށްފައި ވަނީ ގާނޫނު ލާޒިމްކުރާ މިންގަނޑުގެ 11 ޕަސެންޓަށެވެ. އަދި 164 ސިއްހީ މަރުކަޒެއްގައި ހިދުމަތް ދެމުން އަންނަ އިރު އެއިން އެއްވެސް ތަނެއްގައި ވެބްސައިޓެއް ނެތް ކަމަށް އައިކޮމް އިން ބުނެ އެވެ.

ތައުލީމީ ހިދުމަތްދޭ ތަންތަނުން ވެސް މައުލޫމާތު އާންމުކުރާ މިންވަރު މަދުކަމަށް އައިކޮމް އިން ބުނެ އެވެ. އަމިއްލަ އިސްނެގުމުން ހާމަކުރަން ޖެހޭ 25 ބައެއްގެ ތެރެއިން ނުވަ ބައެއް ތައުލީމީ ހިދުމަތްދޭ އެއްވެސް ތަނަކުން ހާމައެއް ނުކުރެ އެވެ.