ލިވަޕޫލް (ފެބްރުއަރީ 17) - މިހާރު ފެންނަ ކޯޗުންގެ އާ ޖީލުގައި އެންމެ ތަފާތު ދައްކާނެ އެއް ފަރާތަކީ، ބަޔާ ލެވަކޫސަންގައި ތަފާތު މަސައްކަތެއް ކުރަމުން އަންނަ ކޯޗު ޒަބީ އަލޮންސޯ ކަމަށް ލިވަޕޫލްގެ ކޯޗު، ޔާގަން ކްލޮޕް ބުނެފި އެވެ.

މި ސީޒަނަށް ފަހު، ލިވަޕޫލް ދޫކޮށްލަން ކްލޮޕް ވަނީ ނިންމައިފަ އެވެ. ދެން، ލިވަޕޫލްގެ ކޯޗުކަމާ ހަވާލުވާނީ އަލޮންސޯ ކަމަށް މީޑިއާގައި ވާހަކަ ދެކެވެ އެވެ. އެ އަށް އިޝާރާތްކޮށް ކްލޮޕަށް އަމާޒުވި ސުވާލުތަކުގައި، އޭނާ ވަނީ އަލޮންސޯ އަށް ތައުރީފުކޮށްފަ އެވެ.

ކްލޮޕް ބުނީ، އަލޮންސޯ ކުރަމުން އަންނަ ރަނގަޅު މަސައްކަތުގެ ސަބަބުން އޭނާ އެކި ޓީމުތަކާ ހަވާލުވާނެ ވާހަކަ މީޑިއާގައި ދެކެވޭނެ ކަމަށެވެ. އެކަމަކު، މީގެ އަށް ހަފްތާ ކުރިން، އަލޮންސޯ އާއި ލިވަޕޫލްގެ ވާހަކަ ދެކެވޭ ނަމަ އެއިން ލިބޭނީ ހައިރާންކަން ކަމަށް ކްލޮޕް ބުނެފައިވެ އެވެ.

"އަހަރެން އަބަދުވެސް ބުނަން، ކޯޗުންގެ ތެރެއިން ގިނަ ދުވަސްވީ ޑައިނަަސޯސްތައް. ތި މީހުންގެ ނަޒަރުގައި، އަންޗެލޮޓީ، ގާޑިއޯލާ، މޮރީނިއޯ، ދެން ފަހަރެއްގައި އަހަރެން، ކުރިއަށް އޮތްތަނުގައި މާ ގިނަ އަހަރުތަކެއް މި ކަމުގައި ނުފެނިދާނެ، ފަަަހަރެއްގައި މޮރީނިއޯ ފެނިދާނެ. އެކަމަކު، ޔަގީން 20 އަހަރު މި އެންމެންނެއް ނުފެންނާނެ. އެހެން ނަމަވެސް. އަލޮންސޯ ފެންނާނެ. އޭނާ އަކީ ކޯޗުންގެ މި އަންނަ ޖީލުގައި، ތަފާތު ވާނެ ފަރާތެއް،" ކްލޮޕް ބުންޏެވެ.

އަލޮންސޯ އަކީ ދުނިޔޭގެ ފެންވަރު ކުޅުންތެރިއެއް ކަމަށް ވުމުން، ކޯޗިން ކެރިއަރުގައި ކުރިއަށްދާން ކަންކަން އެނގޭނެ ކަމަށާއި އަނެއްކޮޅުން، ބަލާއިރު، އަލޮންސޯގެ އާއިލާގައި ވެސް ކޯޗިންގައި މަސައްކަތްކުރި ފަރާތްތައް ހިމެނޭތީ އެއީ ވެސް ފަސޭހަތަކެއް ހުންނާނެ ކަމަށް ކްލޮޕް ވަނީ ބުނެފަ އެވެ.

މި ސީޒަނުގައި، އަލޮންސޯ، ކޯޗުކޮށްދެމުން އަންނަ ލެވަކޫސަން އަދި މެޗަކުން ބަލިނުވެ އެވެ. ކްލޮޕް ބުނީ އެއީ އާދައިގެ މަސައްކަތެއް ނޫން ކަމަށެވެ.

ލެވަކޫސަނުން ވަނީ އަލޮންސޯ މަގާމުގައި ދެމިހުންނާނެ ކަމުގެ އުންމީދު އެބައޮތް ކަމަށް ބުނެފަ އެވެ. އެކަމަކު، އަލޮންސޯ ގެންދަން ލިވަޕޫލްގެ އިތުރުން ބަޔާން މިއުނިކުން ވެސް މަސައްކަތް ކުރާ ކަމަށް ޖަރުމަނުގެ މީޑިއާ ރިޕޯޓްތައް ބުނެ އެވެ.