ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ ތިމަރަފުށީ ދާއިރާއަށް ޕްރޮގްރެސިވް ކޯލިޝަނުގެ ކެންޑިޑޭޓަކު ހުއްޓައި، ރައީސް ޑރ. މުހައްމަދު މުއިއްޒުގެ ތާއީދު ކުރައްވަނީ މިހާރު އެ ދާއިރާގެ މަޖިލިސް މެމްބަރު އަބްދުﷲ ރިޔާޒުގެ ބޭބެ އަހުމަދު ރިޔާޒަށް ކަމަށް ރައީސް އޮފީހުގެ ދެ މިނިސްޓަރަކު ވިދާޅުވެއްޖެ އެވެ.

އަންނަ މަހު ބާއްވާ 20 ވަނަ ރައްޔިތުންގެ މަޖިލީހުގެ ތިމަރަފުށީ ދާއިރާއަށް އަހުމަދު ރިޔާޒު ވާދަ ކުރައްވަނީ އަމިއްލަ ކެންޑިޑޭޓެއްގެ ގޮތުގަ އެވެ.

އެ ދާއިރާއަށް ޕީއެންސީގެ ޓިކެޓު ޕްރައިމަރީއަކާ ނުލައި ދީފައިވަނީ ރައީސް މުއިއްޒުގެ ކުރީގެ ޕާސަނަލް އެސިސްޓަންޓު އިބްރާހިމް ސަނާހު (ސަންޓޯ) އަށެވެ. ސަނާހު އަށް ވަނި ޓިކެޓުގެ ލިޔުން ވެސް ހަވާލުކޮށްފަ އެވެ.

ނަމަވެސް، މިއަދު ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ރައީސް އޮފީހުގެ ދެ މިނިސްޓަރުން ކަމަށްވާ އާދަމް ރަމީޒު އަދި އަބްދުﷲ ނާސިރު ވަނީ ސަރުކާރުގެ ކެންޑިޑޭޓަކީ ރިޔާޒު ކަމަށާއި ރައީސް މުއިއްޒު ވަނީ އެ ޔަގީންކަން ދެއްވާފައި ކަމަށް ވިދާޅުވެފަ އެވެ. އެ ދެ މިނިސްޓަރުންނަކީ ސިޓީ ކައުންސިލްގައި ތިއްބެވި އިރުވެސް މުއިއްޒުގެ އެންމެ އަރިސް ދެ ބޭފުޅުންނެވެ.

"ދެން އަދި ތިމަރަފުށީ ކައުންސިލް މީޓިންގަވެސް ރައީސް ދަންނަވާނެ ރައީސް ތާއީދު ކުރައްވަނީ ރިޔާޒަށް ކަމަށް، ދެން އޭގެ އިތުރުން އަދި ދަންނަވާފަ އޮތީ އަޅުގަނޑަށް ދެން ހުރި ކެންޑިޑޭޓަށް [ސަނާހު] ގުޅާފަ ހުރިހާ ކަމެއް ހުއްޓާލަން ވެސް ނަންގަންނާށޭ،" ރަމީޒު ވިދާޅުވެފައިވެ އެވެ.

ވީޑިއޯގައި ރަމީޒު އަދި ނާސިރުގެ އިތުރުން ދެން ފެންނަނީ އެމްއެންޕީއަށް ނިސަބަތްވާ މެމްބަރު ރިޔާޒު އަދި އަމިއްލަ ގޮތުން މި ފަހަރު މަޖިލީހަށް ވާދަ ކުރައްވާ އަހުމަދު ރިޔާޒެވެ.

މައުލޫމާތު ލިބިފައިވާ ގޮތުގައި މިއީ މިހާރު ރައީސް މުއިއްޒު ތ. އަތޮޅަށް ކުރައްވާ ދަތުރުގެ ތެރޭގައި ބާއްވާފައިވާ ބައްދަލުވުމެވެ. ތ. އަތޮޅު ދަތުރުގައި ރައީސް މުއިއްޒު އަރިހުގައި ރަމީޒާއި ނާސިރު، އަދި އަބްދުﷲ ރިޔާޒު ވެސް ބައިވެރިވެވަޑައިގަންނަވަ އެވެ.

"ވަރަށް ސާފުކޮށް މިހާރު ރައީސްގެ ކެންޑިޑޭޓަކީ މިއީކަން [އަހުމަދު ރިޔާޒު]. އަޅުގަނޑުމެން ދެބޭފުޅުންގެ ފަރާތުންވެސް ތިބޭފުޅުންނަށް ޔަގީން މީގެ ފަހުން މީ ތިމަރަފުށީ ދާއިރާ، މި ދާއިރާގެ ހުރިހާ ކަންތައްތައް ދާނީ މިބޭފުޅާގެ ބެލުމުގެ ދަށުން އަޅުގަނޑުމެންނާ ކޯޑިނޭޓު ކުރެވިގެން ރައީސް އޮފީހުން،" އަހުމަދު ރިޔާޒަށް އިޝާރާތް ކުރައްވާ ރަމީޒު އިތުރަށް ވިދާޅުވެ އެވެ.

އޭނާގެ ވާހަކަ ނިންމާލުމުން ނާސިރުވެސް ވަނީ "ކުރަންޖެހޭ ހުރިހާ ކަމެއް" ކުރަން ރައީސް އަންގަވާފައިވާ ކަމަށާއި އެކަން އެގޮތަށް ކުރައްވާނެ ކަމަށެވެ.

ރައްޔިތުންގެ މަޖިލީހުގެ މި އިންތިހާބުގައި ހޮވާ 93 ދާއިރާއަށް ވެސް ޕީއެންސީއިން ކެންޑިޑޭޓުން ނެރޭއިރު، ބައެއް ދާއިރާތަކަށް ޕީއެންސީގެ ޓިކެޓު ހޯދި ފަރާތްތަކުގެ ބަދަލުގައި ރައީސް މުއިއްޒު ވަކި ކެންޑިޑޭޓުންތަކެއް ނެރެމުންދާ ކަމުގެ އަޑުތައް ސޯޝަލް މީޑިއާގައި ވަނީ ފެތުރިފަ އެވެ.