ރައީސް ޑރ. މުހައްމަދު މުއިއްޒު އައްޔަންކުރެއްވި ވަޒީރުންނަށް ރުހުން ދިނުމަށް އިއްޔެ ބާއްވަން އެޖެންޑާކޮށް ފެށި ޖަލްސާ ކުރިއަށް ގެންދިޔުމަށް ސަރުކާރަށް ތާއިދުކުރާ މެމްބަރުން ހުރަސް އަޅައި، ޖަލްސާ ހުއްޓުވުމަށް ފަހު ރޭ ދަންވަރު ރައީސް އޮފީހަށް ވަޑައިގަތެވެ.

އޭގެ ތެރެއިން ބައެއް މެމްބަރުން އަދަދު ނޫހަށް ވިދާޅުވީ އެ ބޭފުޅުން ވަޑައިގަތީ ރައީސް މުއިއްޒު ވިދާޅުވިގެން އެ މަނިކުފާނާ ބައްދަލު ކުރެއްވުމަށެވެ.

ނަމަވެސް ބައްދަލު ކުރައްވަނީ ކޮން ބޭފުޅަކާ ކަމަށް ރޭ އެ ބޭފުޅުން ވިދާޅެއް ނުވެ އެވެ.

މަޖިލީހުގެ ގާނޫނީ ޒިންމާ އަދާކުރުމަށް ހުރަސް އެޅުމަށްޓަކައި ސަރުކާރަށް ނިސްބަތްވާ މެމްބަރުންގެ ތެރެއިން ފުނަދޫ ދާއިރާގެ މެމްބަރު މޫސާ ސިރާޖު، މައިކްތައް ނެގިއިރު، އެމްޑީޕީގައި ކުރިން އުޅުއްވި އަދި މިހާރު ޕީއެންސީ އަށް ބަދަލުވެފައިވާ ބައެއް މެމްބަރުންނާއި އެމްޑީޕީގެ ބައެއް މެމްބަރުންނާ ދެމެދު މަޖިލީހުގެ ތަޅުމުގައި މާރާމާރީ ހިންގި އެވެ.

އެންމެ ބޮޑު މާރާމާރީއެއް ހިންގީ ކަނޑިތީމުގެ ދާއިރާގެ މެމްބަރު އަބްދުﷲ ޝަހީމް އާއި ކެނދިކުޅުދޫ ދާއިރާގެ މެމްބަރު އަހުމަދު އީސާއާ ދެމެދު އެވެ.

އިއްޔެ ހެނދުނު ޖަލްސާ ފެށުނު ފަހުން ނިމެންދެން ސަރުކާރުގެ މެމްބަރުން މަޖިލީހުގެ ނިޒާމު ގެއްލުވާލުމަށްޓަކައި އަޑުގަދަކޮށް ރިޔާސަތަށް ހުރަސް އަޅައި ހެދިއިރު، ސަރުކާރުގެ އިސް ވަޒީރާއި ބައެއް މިނިސްޓަރުންނާއި ސްޓޭޓު މިނިސްޓަރުންނާއި ޑެޕިއުޓީ މިނިސްޓަރުން އަދި ސިޔާސީ މަގާމުތަކުގައި ތިއްބެވި ބައެއް ބޭފުޅުން ދިޔައީ މަޖިލީހުގެ ބޭރުގައި މުޒާހަރާ ކުރަމުންނެވެ.

ބައެއް ގްރޫޕުތަކުން ވެސް ފަހުން އެ މުޒާހަރާގައި ބައިވެރިވި އެވެ.

މުޒާހަރާގެ ތެރެއިން މަޖިލީހުގެ ގޯތިތެރެއަށް ގާ އުކި ކަމަށް ބައެއް މެމްބަރުން ވިދާޅުވި އެވެ. އަދި މަޖިލީހަށް ހާޒިރުވި ބައެއް މެމްބަރުންނަށް މުޒާހަރާގެ ތެރެއިން ހަމަލާ ދީފައިވާ ކަމަށް އެމްޑީޕީން ވަނީ ބުނެފަ އެވެ.

މުހިއްމު ބައެއް ހަބަރު