އެފްއޭއެމް އިންތިހާބުގައި ވާދަކުރާ ދެ ކެންޑިޑޭޓުންނަށް ކްލަބް ވެލެންސިއާ އިން ދީފައިވާ ތާއީދު ސިޓީ ކެންސަލް ކުރަން އެފްއޭއެމް އިލެކްޓޯރަލް ކޮމިޓީން މިއަދު ނިންމުމާ އެކު، އިންތިހާބުގައި ވާދަކުރާ އެއް ކެންޑިޑޭޓް ކަމަށްވާ، އަހުމަދު ތޯރިގު (ޓޮމް)ގެ ކެންޑިޑެސީ ސައްހަ ނޫން ކަމަށް ކަނޑައެޅިއްޖެ އެވެ.

މި މަހު 31 ވަނަ ދުވަހު އެފްއޭއެމް އިންތިހާބު ބާއްވަން ތާވަލުކޮށްފައިވާއިރު، ވާދަކުރާ ދެ ކެންޑިޑޭޓުންނަކީ، އެފްއޭއެމްގެ ކުރީގެ ރައީސް، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު ތޯރިގު (ޓޮމް) އާއި ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.

ކޮންމެ ކްލަބަކަށް ތާއީދު އެއް ސިޓީ ދެވޭ ގޮތަށް ގަވާއިދު އޮތްއިރު، ތޯރިގަށް ވެލެންސިއާގެ ތާއީދު ސިޓީ ދިނީ، އެ ކްލަބްގެ ޗެއާމަން، އަބްދުﷲ އަޒްމީން ސޮއިކޮށް، ބޯޑް މެމްބަރުންގެ ރިޒޮލިއުޝަން އެކެވެ. މުފާ އަތުގައި އޮތް ސިޓީ އަކީ ވެލެންސިއާގެ ވައިސް ޗެއާމަން، އިލްމާއު ހުސެއިން (މައު) ސޮއިކޮށްފައިވާ ބޯޑު މެމްބަރުންގެ ތާއީދު ހިމެނޭ ސިޓީ އެކެވެ.

ވެލެންސިއާގެ މި ދެ ތާއީދު ސިޓީގެ މައްސަލައިގައި، އެފްއޭއެމް އިލެކްޓޯރަލް ކޮމިޓީން ވަނީ މި ކަމުގައި އަމަލުކުރާނެ ގޮތެއް އޮޅުންފިލުވަން ގާނޫނީ ލަފަޔަކަށް އޭއެފްސީ ކިބައިން އެދިފަ އެވެ. އޭއެފްސީގެ ލަފާ ލިބުމާ އެކު، މިއަދު ބޭއްވި އިލެކްޓޯރަލް ކޮމިޓީގައި ނިންމާފައިވަނީ، ވެލެންސިއާ އިން ދިން ދެ ސިޓީ ވެސް ކެންސަލް ކުރުމަށެވެ.

އެ ނިންމުމާ އެކު، ތޯރިގު އަތުގައި އޮތީ ފުރަތަމަ ޑިވިޝަނުގެ ދެ ކްލަބްގެ ތާއީދެވެ. މުފާ އަތުގައި، ފަސް ކްލަބްގެ ތާއީދު އެބައޮތެވެ. ކޮންމެ ކެންޑިޑޭޭޓަކު އަތުގައި ވެސް މަދުވެގެން ފުރަތަމަ ޑިވިޝަނުގެ ތިން ކްލަބްގެ ތާއީދު އޮންނަން ގަވާއިދު ލާޒިމް ކުރާއިރު، ތޯރިގު އަތުގައި އެ އަދަދަށް ފުރަތަމަ ޑިވިޝަނުގެ ކްލަބްތަކުގެ ތާއީދު ނެތުމުން، އޭނާގެ ކެންޑިޑެސީ ވަނީ ސައްހަ ނޫން ކަމަށް، އިލެކްޓޯރަލް ކޮމިޓީން ނިންމައިފަ އެވެ.

ވެެލެންސިއާގެ ތާއީދު ސިޓީ ކެންސަލްކުރުމުން، މުފާ އަށް ތާއީދުކުރާ ފުރަތަމަ ޑިވިޝަންގެ ޓީމުތަކަކީ އޭނާގެ ކްލަބް އީގަލްސްގެ އިތުރުން، ކްލަބް ގްރީން ސްޓްރީޓްސް، ޔުނައިޓެޑް ވިކްޓަރީ (ޔޫވީ)، ސުޕަ ޔުނައިޓެޑް ސްޕޯޓްސް (ސަސް) އަދި ބުރު ސްޕޯޓްސް ކްލަބް އެވެ. ތޯރިގު އަށް ސަޕޯޓް ދިނީ، ޓީސީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން އެވެ.

އިލެކްޓޯރަލް ކޮމިޓީގެ މި ނިންމުން އެޕީލްކުރުމުގެ ފުރުސަތު ތޯރިގު އަށް އޮންނާނެ އެވެ. އެޕީލް ކުރުމުގެ ފުރުސަތު އޮތީ މިއަދުން ފެށިގެން ދެ ދުވަހަށެވެ. އަދި އެޕީލާ މެދު ގޮތެއް ނިންމުން އޮތީ، އެޕީލް ހުށަހަޅާ ދުވަހުން ފެށިގެން ތިން ދުވަހުގެ މުހުލަތެކެވެ.

އިލެކްޓޯރަލް ކޮމިޓީގެ މި ނިންމުން މި ގޮތަށް އައީ، އޭއެފްސީ ކްލާސް ޕޯޓަލްގައި ރަޖިސްޓްރީކޮށްފައިވަނީ ގޮތުގައި، ވެލެންސިއާގެ ރައީސް/ޗެއާމަން އަކީ ރަސްލާން އަދީލް ޖަލީލް ކަމަށްވާއިރު، ނައިބު ރައީސް/ވައިސް ޗެއާމަން، އިލްމާއު އަދި ޖެނެރަލް ސެކްރެޓަރީ، އަޒްމީން ކަމަށެވެ. އެ ގޮތުގެ މަތިން ބަލާއިރު، މުފާ އާއި ތޯރިގަށް ދީފައިވާ ތާއީދު ސިޓީ އަކީ، ފީފާގެ ގަވާއިދުގެ ދަށުން ބަލައިގަނެވޭނެ ކަމަކަށް ނުވާތީ، ދެ ސިޓީ ވެސް ކެންސަލްކުރުމަށެވެ.

މި މައްސަލައިގައި ވެލެންސިއާގެ ޑިސިޕްލިނަރީ މައްސަލައެއް ކުރިއަށްދާނެ އެވެ.

ވެެލެންސިއާގައި ދެ ފެކްޝަނެއް އުފެދިފައިވާއިރު، އެއް ފެކްޝަނުން ވަނީ އަޒްމީން އިސްތިއުފާ ދީފައިވާ ކަމަށް ބުނެފަ އެވެ. އެކަމަކު، އަޒްމީން ވަނީ އެކަން ދޮގުކޮށްފަ އެވެ.

ކޮމިޝަނާ އޮފް ސްޕޯޓްސް މުހައްމަދު ތޮލާލް، މިއަދު، އެފްއޭއެމް އަށް ފޮނުވި ސިޓީއެއްގައި ބުނެފައިވަނީ، އެ ކޮމިޝަނަށް ލިބިފައިވާ މައުލޫމާތަށް ބަލާއިރު، ވެލެންސިއާގެ ޗެއާމަނަކީ އަޒްމީން ކަމަށެވެ. ވެލެންސިއާ އިން އަޒްމީން މަގާމުން ވަކިކޮށްފައިވާ ކަމަށް ބުނާ ބުނުން ގަބޫލުކުރެވެން ނެތް ސަބަބަކީ އެ ކްލަބްގެ އަސާސީ ގަވާއިދުގައި ބުނާ އިޖުރާތްތައް ފުރިހަމަކޮށްފައިނުވާތީ ކަމަށް ތޮލާލްގެ ސިޓީގައި ވަނީ ހިމަނުންވައިފަ އެވެ.

އޭގެ އިތުރުން، ކޮމިޝަނާ އޮފް ސްޕޯޓްސްގެ އެ ސިޓީގައި ވަނީ ވެލެންސިއާގެ ތާއީދު ސިޓީ ފަދަ މުހިންމު ލިޔުންތަކުގައި ސޮއިކުރުމުގެ ބާރު އޮތީ ޗެއާމަން އަތުގައި ކަމަށާއި ވައިސް ޗެއާމަންގެ ޒިންމާ އަކީ ކްލަބްގެ ޗެއާމަން އަށް ހިންގުމުގައި އެހީތެރިވެދިނުން ކަމަށެވެ.

އެޕީލްކޮށްގެން ތޯރިގުގެ ކެންޑިޑެސީ ސައްހަ ކަމަށް ކަނޑަނޭޅިއްޖެނަމަ، އެފްއޭއެމް އިންތިހާބުގައި ކުރިއަށްދާނީ، މުފާގެ ޓީމާ މެދު ނަގާ ފެންނަ ނުފެންނަ ވޯޓެކެވެ.

ތޯރިގު ކެންޑިޑެސީ ހުށަހެޅިއިރު، ޓީމުގައި ހިމެނެނީ، ރައީސަކަށް ތޯރިގުގެ އިތުރުން، ނައިބު ރައީސަކަށް ކުރީގެ އެއް ވަަނަ ގޯލްކީޕަރު، އިމްރާން މުހައްމަދު (ކީޕަރު)، މާޒިޔާގެ ސީއީއޯ އަދި އެފްއޭއެމްގެ ރައީސް ބައްސާމް އަދީލް ޖަލީލްގެ ދެ ވަނަ ދައުރުގެ އެކްސްކޯގައި މަސައްކަތް ކުރި، ހުސައިން ޝާފިއު (ކޮއްކީ)، މެމްބަރުންގެ ގޮތުގައި، އެފްއޭއެމް އިންޓަރިމް ރައީސް އަހުމަދު ޝާހިރު، އެފްއޭއެމްގެ ކުރީގެ ޖެރެނަލް ސެކްރެޓަރީ، އަބްދުލް ހަމީދު އަބްދުލް ގަފޫރު (އައްޑޯ)، އަންހެން މެމްބަރެއްގެ ގޮތުގައި މަހިބަދޫ ސްޕޯޓްސް ކްލަބްގެ އުލާ އިބްރާހިމް، މެމްބަރެއްގެ ގޮތުގައި ޓީސީ ސްޕޯޓްސް ކްލަބްގެ މުހައްމަދު މިފްތާހު އަދި މެމްބަރުންގެ ގޮތުގައި އަލީ ރިޒްވާން އާއި އަބްދުﷲ ނާސިހު އެވެ.

މުފާ ހުށަހެޅި އެކްސްކޯ ގައި އެފްއޭއެމް އެންމެ ފަހުން އޮތް، ރައީސް ބައްސާމް އަދީލް ޖަލީލްގެ އެކްސްކޯގައި މަސައްކަތްކުރި އަހްމަދު ޝަކީބު (ޑޮކް) އާއި ކުރިން އެކްސްކޯއިން އިސްތިއުފާދިން، ކްލަބް ގްރީން ސްޓްރީޓްސްގެ ރައީސް މުއާވިޔަތު ހަލީލު (މުއާބެ) ހިމެނެ އެވެ.

މުއާބެ، ހިމަނާފައިވަނީ މުފާގެ ޓީމުގެ ނައިބު ރައީސްގެ ގޮތުގަ އެވެ. ދެން ނައިބު ރައީސަކަށް ހިމެނީ، ބުރު ސްޕޯޓްސްގެ މުހައްމަދު އަހްސަން އެވެ. މުފާގެ ކެންޑީޑެސީ ފޯމުގައި ދެން، އެކްސްކޯ މެމްބަރުންގެ ގޮތުގައި ހިމަނާފައިވަނީ ބުރުގެ މެނޭޖަރު އަރުޝަދު އަޝްރަފު، ޖޭޖޭ ސްޕޯޓްސް ކްލަބުން ކުރީގެ ގައުމީ ޓީމުގެ ފޯވާޑް ހަސަން އަދުހަމް (ސަޑޭ) އާއި ޔުނައިޓެޑް ވިކްޓަރީގެ ރައީސް، އިސްމާއީލް ޝަފީއު (އިއްސެ) އާއި ބުރުގެ މުހައްމަދު ހަސަން އެވެ. ދެން އަންހެން މެމްބަރުގެ މަގާމަށް ހިމަނާފައިވަނީ، ގައުމީ އަންހެން ފުޓްބޯޅަ ޓީމުގެ ކުރީގެ ކުޅުންތެރިޔާ އަދި މިހާރު ކޯޗިންގައި ފާހަގަކުރެވޭ، މަރްޔަމް މިރްފަތު އެވެ.