ވެރި ރަށް މާލޭގައި މިހާރު ގާއިމުކޮށްފައިވާ ސްޓޯމް ވޯޓާ ޑްރެއިނޭޖް ސިސްޓަމުތައް ކުރިއަށް އޮތް ތަނުގައި ވެސް ފެއިލުވުން އެކަށީގެންވާ ކަމަށާއި ފެންބޮޑުވުމުގެ މައްސަލަ ހައްލު ކުރެވޭނީ ގުދުރަތީ ނިޒާމުގެ ތެރެއިން އުފަންކުރާ ޑިޒައިނަކުން ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

އާދަޔާ ހިލާފަށް ބޯކޮށް ވާރޭ ވެހި އާދީއްތަ ދުވަހު މުޅި މާލެ ފެންބޮޑުވުމާ ގުޅޭ ގޮތުން ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ކޮންކްރީޓު ސްޓޯމް ވޯޓާ ޑްރެއިންސްގެ ބަދަލުގައި ގުދުރަތީ ނިޒާމުގެ ބޭނުން ހިފައި، މައްސަލައަށް ހައްލު ހޯދުން މުހިންމު ކަމަށެވެ.

"ގުދުރަތީ ނިޒާމުގެ ބޭނުން ހިފައި، މި މައްސަލަ ހައްލު ކުރަން އާ ޑިޒައިންތަކެއް ތައާރަފު ކުރަންޖެހޭ. މިސާލެއްގެ ގޮތުން، މާލޭގެ ކުޅިތަކާއި ވެވުތައް އަލުން ތައާރަފު ކުރެވިދާނެ،" ސިޔާސީ މަސައްކަތާ ދުރަށްޖެހި ކްލައިމެޓް ވަލްނަރަބަލް ފޯރަމްގެ ސެކްރެޓަރީ ޖެނެރަލްގެ މަގާމު މިވަގުތު އަދާކުރައްވާ ނަޝީދު ވިދާޅުވި އެވެ.

ކުޅިއަކީ ފެންބޮޑުވުމަށް އޮތް ހައްލެއް ކަމަށާއި ކުޅި ނައްތާލުމުން ފެންބޮޑުވުމުގެ ނުރައްކާ އިތުރުވާ ކަމަށް ދިރާސާތަކުން ދައްކަ އެވެ. ވެވަކީ އިހު ޒަމާނުގައި ފެންވެރުމަށް ހަދާފައި ހުރި ވަޅުގަނޑުތަކެކެވެ.

މާލޭގައި ފެންބޮޑުވެގެން ހާލުގައި ޖެހުނު ބައެއް ގޭގެއަށް ޒިޔާރަތް ކުރެއްވުމަށްފަހު ނޫސްވެރިންނާ ވާހަކަ ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، މާލޭގައި ފެންބޮޑުވުމުގެ މައްސަލަ ހައްލު ކުރުމަށް ހުރިހާ މަގެއް ހަދައި، މިހާރަށްވުރެ ވަރުގަދަ ސްޓޯމް ވޯޓާ ޑްރެއިނޭޖް ސިސްޓަމްތަކެއް ހަރުކުރަންޖެހޭ ކަމަށެވެ.

"އަޅުގަނޑުމެން ނިންމާފައި އޮތީ މާލޭގެ ހުރިހާ މަގުތައް ރަނގަޅު ފެންވަރަކަށް ހެދުން. ހަދާއިރުގައި އަޑީގައި ވަރަށް ވަރުގަދަ ސްޓޯމް ވޯޓާ ނިޒާމެއް ގާއިމްކުރަން. ވަރަށް ފަލަ ހޮޅި ތަކެއް ލާފައި ވަރަށް ވަރުގަދަ ޕަމްޕިން ނިޒާމެއް ލާފައި،" ރައީސް ވިދާޅުވި އެވެ.

މިދިޔަ އާދީއްތަ ދުވަހު، 24 ގަޑިއިރުގެ ތެރޭގައި މާލެއަށް 118 މިލިމީޓަރުގެ ވާރޭ ވެހުނެވެ. މާލެއާ ޖެހިގެން އޮންނަ ހުޅުލެއަށް 179 މިލިމީޓަރުގެ ވާރޭ ވެހުނެވެ. ހުޅުލެއަށް ވާރޭ ވެހުނީ ރިކޯޑު މިންވަރަކަށެވެ.

މާލެއަށް ކުރި ވިއްސާރާގައި މާލޭގެ 180 އަށްވުރެ ގިނަ އިމާރާތަށް ފެނުގެ އަސަރުކޮށްގެން އެހީތެރިކަމަށް އެދުނެވެ. އޭގެ ތެރޭގައި މީހުން ދިރިއުޅޭ 164 ގެ ހިމެނެ އެވެ. ބައެއް ގޭގެއަށް ފެން ވަދެ, ގޭތެރޭގައި ތަނބިކައްޓާ ހަމައަށް ފެން އަރައި, ފަރުނީޗަރުތަކަށް ވެސް ފެނުގެ އަސަރު ކޮށްފައިވާ ކަމަށް ޑިޒާސްޓާ މެނޭޖްމަންޓު އޮތޯރިޓީން ބުނެ އެވެ.