އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރެޓިކް ޕާޓީގެ 13 މެމްބަރަކު މިރޭ ބޭއްވި ހާއްސަ ހަފުލާއެއްގައި ވެރިކަން ހިންގާ ޕާޓީ ޕީޕަލްސް ނެޝަނަލް ކޮންގްރެސްއާ ގުޅިއްޖެ އެވެ.

އެ 13 މެމްބަރުން ޕީއެންސީއަށް ސޮއި ކުރުމަށްފަހު ފޯމު ހަވާލު ކުުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށެވެ.

ޕީއެންސީއަށް ސޮއި ކުރެއްވީ:

1. މަރަދޫ ދާއިރާގެ އިބްރާހިމް ޝަރީފް
2. ފޭދޫ ދާއިރާގެ މެމްބަރު މުހައްމަދު ނިހާދު
3. މައްޗަންގޮޅި އުތުރު ދާއިރާގެ އަހުމަދު ހައިތަމް
4. އިސްދޫ ދާއިރާގެ އަލީ ހަމީދު
5. ކަނޑިތީމު ދާއިރާގެ އަބްދުﷲ ޝަހީމް އަބްދުލްހަކީމް
6. ކުރެންދޫ ދާއިރާގެ ޢަބްދުލްޣަނީ އަބްދުލްހަކީމް
7. މަތިވެރި ދާއިރާގެ ހަސަން ޒަރީރު
8. މުލަކު ދާއިރާގެ އިބްރާހިމް ނަސީރު
9. ނިލަންދޫ ދާއިރާގެ އަބްދުލްމުހްސިން ހަމީދު
10. މާފަންނު ދެކުނު ދާއިރާގެ އާދަމް އަލީ
11. ކޮމަންޑޫ ދާއިރާގެ މުހައްމަދު ރާޝިދު (ރާޑޯ)
12. ތޮއްޑޫ ދާއިރާގެ ހަސަން ޝިޔާން (ގިޓާ)
13. ގުރައިދޫ ދާއިރާގެ އިބްރާހިމް ޝާޒު


ކޮމަންޑޫ ދާއިރާގެ މެމްބަރު މުހައްމަދު ރާޝީދު، ޕީއެންސީއަށް ސޮއިކުރެއްވުމަށް ފަހު ފޯމް، އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒާ ހަވާލު ކުރައްވަނީ. -- ފޮޓޯ: އަދަދު

---

ރައީސް ވިދާޅުވީ އެމަނިކުފާނާއެކު އަދިވެސް އިތުރު އެމްޑީޕީ މެމްބަރުން އެބަ ތިބި ކަމަށެވެ. އަދި ވިދާޅުވީ އުއްމީދަކީ އެބޭފުޅުން ވެސް ޕީއެންސީއާ ގުޅުން ކަމަށެވެ.

"އެކިއެކި ސަބަބުތަކަށްޓަކައި، މަސްލަހަތަށްޓަކައި އަޅުގަނޑުމެންނާ ފާޅުގައި ގުޅިވަޑައި ނުގަތަސް، އަޅުގަނޑަށް ޕާސަނަލީ، އަމިއްލަ ހައިސިއްޔަތުން އެނގޭ، ހަމަ އެމްޑީޕީ މަޖިލިސް މެމްބަރުން އެބަ ތިއްބެވި އެމްޑީޕީ ޕީޖީ ގްރޫޕުގައި މަޑު ކުރައްވައިގެން ތިއްބެވި ބޭފުޅުން ވެސް،" ރައީސް ވިދާޅުވި އެވެ.

ރައީސް ވިދާޅުވީ އެމަނިކުފާނާއެކު ތިބި އެމްޑީޕީގެ މެމްބަރުން އެމަނިކުފާނާ ދެކޮޅަށް ވޯޓު ނުދެއްވާނެކަމުގެ ފުރިހަމަ ޔަގީންކަން އެބަ އޮތް ކަމަށެވެ.

"އަޅުގަނޑާ ދެކޮޅަށް އެ މަސައްކަތް ކުރާ ވޯޓު ނެގުމުގައި އިނގިލި ބުރިކޮށްލިޔަސް ވޯޓު ނުދޭނެ އެމްޑީޕީ މަޖިލިސް މެމްބަރުން އެބަ ތިބި. އެކަން އަޅުގަނޑަށް އެނގޭ،" ރައީސް ވިދާޅުވި އެވެ.

މިރޭ ޕީއެންސީއާ ގުޅިވަޑައިގެންނެވި މެމްބަރުންނަށް ޝުކުރު އަދާ ކުރައްވަމުން ރައީސް ވިދާޅުވީ އެބޭފުޅުން ހިޔާރު ކުރެއްވީ ގައުމު ކަމަށެވެ.

"އަޅުގަނޑު ޔަގީން ކުރަނީ ތިޔަ ބޭފުޅުން ތިޔަ ނިންމެވި ނިންމެވުމާއެކު ހިތްވަރު ލިބިގެން އަދިވެސް ގިނަ މަޖިލިސް މެމްބަރުން މި ސަފަށް، ގައުމީ ސަފަށް އަރުއްވާނެ ކަމަށް. އެކަމުގެ އުއްމީދުގައި އަޅުގަނޑުމެން ތިބި ވާހަކަ ދަންނަވާލަން،" ރައީސް ވިދާޅުވި އެވެ.