ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު ވަކިކުރަން އެމްޑީޕީން ހުށަހަޅާފައިވާ ގަރާރުގެ މަސައްކަތް އެޖެންޑާކުރާ ޖަލްސާއަށް ނައިބު ރައީސް އީވާ އަބްދުﷲ ވަޑައިނުގަންނަވާ ނަމަ، އެކަމަށް އޮތް ހައްލަކީ މަޖިިލީހުގެ ގަވައިދު ބަދަަލުކުރުން ކަމަށް މަޖިލީހުން ސުޕްރީމް ކޯޓުގައި ބުނެފި އެވެ.

ނަޝީދު މަގާމުން ވަކިިކުރަން އެމްޑީޕީން ދެ ވަނަ ފަހަރަށް ހުށަހެޅި މައްސަލަ ކުރިއަށް ނުގެންދެވި އޮތީ އެ މައްސަލަ ކުރިއަށް ގެންދާ ޖަލްސާގެ ރިޔާސަތު ބެލެހެއްޓޭނީ ހަމަ އެކަނި ނައިބު ރައީސަށް ކަމަށް މަޖިލީހުން މާނަކުރާތީ އެވެ. މަޖިލީހުން އެގޮތަށް މާނަކުރާ އިރު މަޖިލީހުގެ ނައިބު ރައީސް އީވާ އެކި ފަހަރު އެކި އުޒުރު ދައްކަވައި، މަޖިލީހަށް ވަޑައިނުގެން އުޅުއްވާތާ ދުވަސްތަކެއް ވެއްޖެ އެވެ.

ސުޕްރީމް ކޯޓަށް ހުށަހެޅި ދުސްތޫރީ މައްސަލައިގައި އެމްޑީޕީން އެދުނީ މަޖިލީހުގެ ރައީސް ވަކިކުރުމުގެ ޖަލްސާގެ ރިޔާސަތު ބެލެހެއްޓޭނީ ހަމައެކަނި މަޖިލީހުުގެ ނައިބު ރައީސަށް ކަމަށް ބަލުމަކީ ގާނޫނު އަސާސީގެ 82 ވަނަ މާއްދާގެ ށ. އާއި ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާއާ ހިލާފު ކަމެއް ކަމަށް ކަނޑައަޅައިދިނުމަށެވެ.

ރައްޔިތުންގެ މަޖިލީހުގެ ރައީސާއި ނައިބު ރައީސަށް ވެސް ވަޑައިނުގެންނެވޭ ހާލަތްތަކުގައި ޖަލްސާތަކުގެ ރިޔާސަތު ބަލަހައްޓާނެ ގޮތެއް މަޖިލީހުގެ ގަވާއިދުގެ 44 ވަނަ މާއްދާގައި އޮވެ އެވެ. މިހާރު ދިމާވެގެން އުޅޭ މައްސަަލައަކީ މަޖިލީހުގެ ގަވައިދުގެ 205 ވަނަ މާއްދާގެ ބ. ގައި ރައްޔިތުންގެ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށް އޮންނަ އޮތުމަށް އެކަނި ރިއާޔަތްކޮށްގެން ޖަލްސާ ނުބޭއްވުމުގެ މައްސަލަ އެވެ.

އެމްޑީޕީން ހުށަހެޅި މައްސަލާގައި ސުޕްރީމް ކޯޓުން މިއަދު ބޭއްވި ފުރަތަމަ އަޑު އެހުމުގައި ފަނޑިޔާރު ހުސްނުއް ސުއޫދު، ސުވާލުކުރެއްވީ ނައިބު ރައީސް ވަޑައިނުގަންނަވާތީ މަޖިލީހުގެ ރައީސް ވަކިކުރުމުގެ މައްސަލަ އެއް ކުރިއަށް ނުގެންދެވޭ ހާލަތަށް އޮތް ހައްލަކީ ކޮބައިތޯ އެވެ.

އެ ސުވާލަށް ޖަވާބުދެއްވަމުން މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ވިދާޅުވީ އެ ހާލަތަށް އޮތް ހައްލަކީ މަޖިލީހުގެ ގަވައިދު ބަދަލުކުރުން ކަަމަށެވެ.

"ގަވައިދަށް އެމެންޑްމެންޓެއް ގެންނަން ޖެހޭނީ. އެ ލަފާ އަޅުގަނޑުމެން މިހާރު ވެސް ދީފައިވާނީ،" ފިލްޒާ ވިދާޅުވި އެވެ.

އޭނާ މިހެން ވިދާޅުވި އިރު، މައްސަލަ ހުށަހެޅި އެމްޑީޕީން މަޖިލީހުގެ ގަވާއިދު މާނަކުރަނީ މަޖިލީހުގެ ރައީސް ވަކިކުރަން މައްސަލައެއް ހުށަހަޅާފައި ވަނިކޮށް، އެ މައްސަލަ ނުނިންމައި މަޖިލީހުގައި އެހެން މަސައްކަތެއް ކުރިއަށް ނުގެންދެވޭ ގޮތަށެވެ.

އެކަމަށް ރިއާޔަތްކުރައްވައި ފިލްޒާ ވިދާޅުވީ މަޖިލީހުގެ ރައީސް ވަކިކުރުމުގެ މައްސަލަ ނުނިންމައި އެހެން ކަމެއް ކުރިއަށް ނުގެންދެވޭ ހާލަތު މެދުވެރިވާނީ ރައީސް ވަކިކުރާ މައްސަލަ މަޖިލީހުގެ ޖަލްސާއެއްގައި [ތަޅުމަށް] ހުށަހެޅުމުން ކަމަށެވެ.

"އާއްމު ޖަލްސާތައް ބޭއްވުމަކަށް އަދި ހުރަހެއް ނެތް. ހުރަހެއް ނެތް ހާލަތުގައި މަޖިލީހުގެ ގަވައިދު އިސްލާހުކުރުމުގެ ބާރު، އިސްލާހުކުރުމުގެ އިހުތިޔާރު މަޖިލީހަށް އެބަ އޮތް،" ފިލްޒާ ވިދާޅުވި އެވެ.

"މަޖިލީހުގެ ރައީސާއި ނައިބު ރައީސް ވެސް ޖަލްސާތަކަށް ވަޑައިނުގެން މަޖިލިސް ޑެޑްލޮކަކަށް ދާ ހާލަތަށް އޮތް ހައްލަކީ ކޮބައިތޯ؟،" ސުއޫދު ފުރަތަމަ ސުވާލުކުރެއްވުމުން ވެސް ފިލްޒާ ވިދާޅުވީ މަޖިލީހުގައި މިހާރު އެ ހާލަތު ނެތް ކަމަށެވެ. އޭނާ ވިދާޅުވި ގޮތުން މަޖިލީހުގެ ޖަލްސާތައް މިހާރު ވެސް ކުރިއަށް ގެންދެވޭނެ އެވެ.