61 ވަނަ ގައުމީ ޓޭބަލް ޓެނިސް މުބާރާތުގެ ފިރިހެން ސިންގަލްސް ފައިނަލުން މުހައްމަދު ޝައްފާން އިސްމާއިލް އާއި ފާތިމަތު ދީމާ އަލީ ޖާގަ ހޯދައިފި އެވެ.

މިދިޔަ އަހަރުގެ ގައުމީ ޓީޓީ މުބާރާތުގެ ޗެމްޕިއަންކަން ހޯދި ޝައްފާން މިފަހަރު ފައިނަލުން ޖާގަ ހޯދީ ސެމި ފައިނަލްގައި ޒުވާން ތަރި ޒީކް ހަސަން ލަތީފް ބަލިކޮށްގެންނެވެ. މުންސިފް ފައިނަލުން ޖާގަ ހޯދީ ސެމީ ފައިނަލް ދެ ވަނަ މެޗުގައި ތާބިން ސުޖާއު ބަލިކޮށްގެންނެވެ.

މިދިޔަ އަހަރުގެ ގައުމީ ފައިނަލުގައި ވާދަކުރީވެސް ޝައްފާން އާއި މުންސިފް އެވެ. މިދިޔަ އަހަރުގެ ފައިނަލް މެޗު ޝައްފާނަށް ލިބުނީ މެޗުގެ ތެރެއިން އަނިޔާވެ މުންސިފް މެޗު ދޫކޮށްލުމުންނެވެ. މުންސިފް މެޗު ދޫކޮށްލިއިރު ކުރީގައި އޮތީވެސް ޝައްފާން އެވެ.

މި ދެ ކުޅުންތެރިން ވަނީ ދާދި ފަހުން ނިމުނު އެސޯސިއޭޝަން ކަޕްގެ ސިންގަލްސް ފައިނަލުގައިވެސް ވާދަކޮށްފަ އެވެ. މި މެޗު ޝައްފާން ކާމިޔާބުކުރީ މުންސިފް ދެ ސެޓު ހޯދާފައިވަނިކޮށް ފަހަތުން އަރާ ހަތަރު ސެޓު ހޯދައިގެންނެވެ.

ގައުމީ ޓީޓީ މުބާރާތުގެ އަންހެން ސިންގަލްސް ފައިނަލުން ޖާގަ ހޯދީ ފާތިމަތު ދީމާ އަލީ އާއި ފާތިމަތު ޖުމާނާ ނިމާލް އެވެ.

މިދިޔަ އަހަރުގެ ޗެމްޕިއަން ދީމާ ފައިނަލުން ޖާގަ ހޯދީ ފައިނަލުގައި މަލާކު ބިންތި މުއިއްޒު ބަލިކުރުމަށް ފަހު އެވެ. ޖުމާނާ ވަނީ ސެމީ ފައިނަލުގައި އުއްމީދީ ތަރި މިޝްކާ މުހައްމަދު އިބްރާހިމް ބަލިކޮށްފަ އެވެ.

ދިމާއާ ދެކޮޅަށް މިދިޔަ ތިން އަހަރު ވެސް ފައިނަލުގައި ވާދަކުރީ އައިޝަތު ރަފާ ނާޒިމް މިފަހަރު މުބާރާތުގައި ނުކުޅެ އެވެ. މަތީ ތައުލީމް ހާސިލްކުރުމަށް ރަފާ ހުރީ އިނގިރޭސި ވިލާތުގަ އެވެ.

ގައުމީ ޓޭބަލް ޓެނިސް މުބާރާތުގެ ސިންގަލްސް ފައިނަލް މެޗުތަކާއި އިނާމް ދިނުމުގެ ރަސްމިއްޔާތު އޮންނާނީ އަންނަ ބުރާސްފަތި ދުވަހު އެވެ.