މެންޗެސްޓާ (އޮކްޓޫބަރު 10) - ގަތަރުގެ މަހުޖަނު ޝެއިހް ޖާސިމް އިނގިރޭސި ކުލަބު މެންޗެސްޓާ ޔުނައިޓެޑް ގަތުމަށް ކުރަމުން އަންނަ މަސައްކަތް ކާމިޔާބުކުރެވިއްޖެ ނަމަ އެކުލަބުގެ އެމްބެސެޑަރުގެ ގޮތުގައި ކުލަބާ ގުޅުމަށް ޑޭވިޑް ބެކަމް އަށް ފުރުސަތު ލިބިއްޖެ އެވެ.

ބެކަމް އަކީ 1992 އިން 2003 އަށް ޔުނައިޓެޑަށް ކުޅެ، އެ ކުލަބުގެ އެންމެ ވަރުގަދަ ލެޖެންޑުންގެ ތެރޭގައި ހިމެނޭ ކުޅުންތެރިއެކެވެ. ޔުނައިޓެޑް ދޫކޮށް ސްޕެއިންގެ ރެއާލް މެޑްރިޑަށް ބަދަލުވި ފަހުން ޔުނައިޓެޑާއި ބެކްމާއާ ދެމެދު އެހާ ގުޅުން ރަނގަޅެއް ނޫނެވެ.

ކުލަބުގެ މިހާރުގެ ވެރިން އެކުލަބު ވިއްކާލުމަށް މަސައްކަތް ކުރަމުން އަންނައިރު، ޔުނައިޓެޑް ގަތުމަށް އަތުކުރި އޮޅާލައިގެންހުރި އެއް ފަރާތަކީ ގަތަރުގެ މަހުޖަނު ޝެއިހް ޖާސިމް އެވެ. އޭނާ ވަނީ ޔުނައިޓެޑްގެ ވެރިން ކަމަށްވާ އެމެރިކާގެ ގްލޭޒާސް އާއިލާ އިން އެ ކުލަބު ވިއްކާލާނަމަ ގަންނާނެކަމުގެ ޝައުގުވެރިކަން ރަސްމީކޮށް ފާޅުކޮށްފަ އެވެ. ޝެއިހް ޖާސިމްގެ އިތުރުން އިނގިރޭސި ވިލާތުގެ ޖިމް ރެޑްކްލިފް ވެސް ޔުނައިޓެޑް ގަތުމަށް ޝައުގުވެރިވެ އެވެ.

ޝެއިހް ޖާސިމް ވަނި އޭނާ އަށް އެކުލަބު ގަނެއްވިއްޖެ ނަމަ އެމްބެސެޑަރެއްގެ ގޮތުގައި ކުލަބުގެ ލެޖެންޑު ބެކަމް ގެންނަން ނިންމައިފަ އެވެ. ޖާސިމް ގަބޫކުރާ ގޮތުގައި ޔުނައިޓެޑަށް ކުޅުނު އެންމެ ނުފޫޒުގަދަ އަދި ކާމިޔާބު ކުޅުންތެރިޔާ ބެކަމް އަކީ އަދިވެސް އެކުލަބު ހަގީގީ މާނައިގައި ތަމްސީލްކުރެވޭނެ އެމްބެސެޑަރެވެ.

މިކަމާ ގުޅޭގޮތުން ބެކަމް ރަސްމީ ސިފައެއްގައި އެއްވެސް އެއްޗެއް ހާމަކޮށްފައި ނުވެ އެވެ. ބެކަމް އަކީ އެމެރިކާ ލީގުގެ ކްލަބް، އިންޓަ މިއާމީގެ ހިއްސާދާރެކެވެ.

ގަތަރުގެ އެކި ފަރާތްތަކާ ގާތް ގުޅުމެއް އޮންނަ ބެކަމް އަށް އެ ފަދަ މަގާމެއް ދިނުމަކީ ހައިރާންވާވަރުގެ ކަމެއް ނޫނެވެ. މިދިޔަ އަހަރުގެ ނޮވެމްބަރު/ޑިސެމްބަރު މަހު ގަތަރުގައި އޮތް ފީފާ ވޯލްޑް ކަޕްގެ އެމްބެސެޑަރަކީ ވެސް ބެކަމް އެވެ. އަދި ގަތަރުގައި އޮންނަ ބައިނަލްއަގްވާމީ އެކި އިވެންޓުތަކުން ވެސް ބެކަމް އަކީ އާންމު ނަމެކެވެ.

ކާމިޔާބު ކުޅުމުގެ ކެރިއަރަކަށް ފަހު ބެކަމް އިންވެސްޓުކުރަމުން އަންނަނީ ކުޅިވަރު ޓީމްތަކަށެވެ.