މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ގާއިމުކުރި އިންސްޓެންޓް ޕޭމަންޓް ސިސްޓަމް(އައިޕީއެސް) ރަސްމީކޮށް ލޯންޗުކުރަން ތައްޔާރުވެއްޖެ އެވެ.

މި ޕޭމަންޓް ސިސްޓަމަކީ ރާއްޖޭގެ ކޮންމެ ރަށެއްގައި ހުރެ އަދި ކޮންމެ ބޭންކެއްގައި އެކައުންޓް ހުޅުވާފައިވީ ނަމަވެސް ފަސޭހަކަމާ އެކު ވަގުތުން ވަގުތަށް އެކަކު އަނެކަކަށް ފައިސާ ފޮނުވުމަށް މަގުފަހިކޮށްދޭ ސިސްޓަމެކެވެ. މި ސިސްޓަމްގެ ސަބަބުން އެއް ބޭންކު އެކައުންޓުން އަނެއް ބޭންކަށް އޮންލައިންކޮށް ފޮނުވާ ޕޭމަންޓްތައް ވަގުތުން ޖަމާވާނެ އެވެ.

އެމްއެމްއޭއިން ހާމަކުރި ގޮތުގައި އައިޕީއެސް އަންނަ ހޮނިހިރު ދުވަހު ރަސްމީކޮށް އިފްތިތާހު ކުރުމަށް އެ އިދާރާއިން އަންނަނީ ތައްޔާރު ވަމުންނެވެ. ސިސްޓަމް ރަސްމީކޮށް ބޭނުންކުރަން ފެށުމުގެ ކުރިން އެމްއެމްއޭ އިން ވަނީ ރާއްޖޭގެ ތިން ބޭންކަކާއެކު ޔޫސާ އެކްސެޕްޓަންސް ޓެސްޓުތަކާއި ޕައިލެޓް ޓެސްޓިންގެ މަސައްކަތްތަކެއް ކުރިއަށްގެންގޮސްފަ އެވެ.

ގައުމީ ޕޭމަންޓު ސިސްޓަމާއެކު ޒަމާނީ، އީޖާދީ މާލީ ހިދުމަތްދޭ ފަރާތްތަކަށް އެއް ޕްލެޓްފޯމެއް މެދުވެރިކޮށް ރައްޔިތުންނަށް އެފަދަ ހިދުމަތްތައް ފޯރުކޮށްދިނުމުގެ ފުރުސަތު ހުޅުވިގެންދާނެ އެވެ. މިއީ ގައުމީ ފެންވަރުގައި ހިންގޭ ބޮޑު މަޝްރޫއަކަށް ވާއިރު، މީގެ ސަބަބުން ރާއްޖޭގެ މާލީ މުއާމަލާތްތަކުގެ ނިޒާމު އިތުރަށް ހަރުދަނާވެގެންދާނެ އެވެ.

އެމްއެމްއޭއިން ގައުމީ ޕޭމަންޓް ސިސްޓަމް ގާއިމުކޮށްފައިވަނީ ފިންލޭންޑުގެ ޓިއޭޓޯއެވްރީގެ ސަބްސިޑަރީއެއް ކަމުގައިވާ ޓިއޭޓޯ ލެޓްވިއާ އެސްއައިއޭއާ ހަވާލުކޮށްގެންނެވެ. ޓިއޭޓޯއެވްރީ އަކީ ދުނިޔޭގެ އެކި ކަންކޮޅުތަކުގައި މިފަދަ ސިސްޓަމްތަކުގެ ހިދުމަތް ފުޅާދާއިރާއެއްގައި މިހާރުވެސް ދެމުން އަންނަ ތަޖުރިބާކާރު ކުންފުންޏެކެވެ.