މާލޭގައި ރޭ ފަތިހު ދެ ސައިކަލު ޖެހި ހިނގި އެކްސިޑެއްގައި އެކަކަށް ސީރިއަސް އަނިޔާތަކެއް ވެއްޖެ އެވެ.

ފުލުހުން ބުނީ މަޖީދީ މަގު، ހީނާމާގޭ ޕާކިން ޒޯން ކައިރީ އެކްސިޑެންޓެއް ހިނގައިގެން އުޅޭ ކަމުގެ ރިޕޯޓު އެ އިދާރާއަށް ލިބުނީ ރޭ ފަތިހު 4:42 ހާއިރު ކަމަށެވެ.

މި އެކްސިޑެންޓުގައި އަނިޔާވި ދެ މީހުންގެ ތެރެއިން އެކަކަށް އޭޑީކޭގައި ފަރުވާދިނުމަށްފަހު ދޫކޮށްލާފައިވާ ކަމަށް ފުލުހުން މައުލޫމާތު ދެއެވެ.

އޭޑީކޭގެ މެނޭޖިން ޑިރެކްޓަރު އަހްމަދު އަފްއާލް 'އަދަދު' އަށް ވިދާޅުވީ، އެކްސިޑެންޓުގައި އަނިޔާވި މީހުންގެ ތެރެއިން އެކަކު ދޫކޮށްލާފައިވާއިރު، އަނިޔާވި ދެވަނަ މީހާއަށް އައިސީޔޫގައި ފަރުވާދެމުން އަންނަ ކަމަށެވެ.

މި އެކްސިޑެންޓުގެ ވީޑިއޯއެއް އަންނަނީ ސޯޝަލް މީޑިއާގައި ދައުރުވަމުންނެެވެ. އަނިޔާވި ދެ މީހުންގެ ތެރެއިން އެކަކުގެ ބޯފަޅައިގެން ގޮސް، ބޮލުން ލޭ އަންނަ މަންޒަރު ވީޑިއޯއިން ފެނެ އެވެ.

ފުލުހުން ބުނީ މި އެކްސިޑެންޓާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.