ތަހުގީގުގެ ބޭރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު އެ މައްސަލާގައި ދައުވާކޮށްފައިވާ ކްރިކް ރިޒާއާ ބައްދަލުކޮށް ދައްކާފައިވާ ވާހަކަތަކެއް ހުރި ކަމަށް ބުނާ އޯޑިއޯ ތަހުލީލުކުރަން އެ މައްސަލަ ފަހުން ހުށަހަޅާ ގޮތަށް މި ވަގުތަށް އަނބުރާ ނަގައިދޭން ފުލުހުން ޕްރޮސިކިއުޓަރ ޖެނެރަލްގެ އޮފީހުގައި އެދިއްޖެ އެވެ.

ކްރިކް ރިޒާގެ މައްޗަށް ދައުވާކޮށްފައިވަނީ ރ. ފުއްގިރި ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގަ އެވެ. އެ މައްސަލާގައި ކްރިކް ރިޒާގެ އިތުރުން ކުރީގެ ރައީސް އަބްދުﷲ ޔާމީނާއި، ސަން ކޮންސްޓްރަކްޝަން އެންޑް އިންޖިނިއަރިން، އަދި ސަން އިންވެސްޓްމަންޓްގެ މައްޗަށް ދައުވާ ކޮށްފައިވެ އެވެ.

އެ މައްސަލާގައި ކްރިކް ރިޒާގެ ފަރާތުން ދިފާއީ ހެއްކެއްގެ ގޮތުގައި ހުށަހަޅާފައިވާ އެ އޯޑިއޯ ތަހުލީލުކުރަން އިތުރު ވަގުތު ބޭނުންވާ ކަމަށް ބުނެ ފުލުހުންގެ ފަރާތުން ޕްރޮސެކިއުޓާ ޖެނެރަލްގެ އޮފީހަށް ސިޓީއެއް ފޮނުވާފައިވާ ކަން "އަދަދު" އަށް ވަނީ ޔަގީންކުރެވިފަ އެވެ.

އެ ސިޓީގައި ފުލުހުން އެދިފައިވަނީ ދިފާއީ ހެއްކެއްގެ ގޮތުގައި ކްރިކް ރިޒާ ހުށަހަޅާފައިވާ އެ އޯޑިއޯ ތަހުލީލުކުރަން ފުލުހުން އިތުރަށް ވަގުތު ބޭނުންވާތީ އެހާ އިރަށް މައްސަލަ މަޑުޖައްސާލުމަށެވެ. އެއީ ހެއްކާ ބެހޭ ގާނޫނުން މިހާރު ހުއްދަ ލިބޭ އިޖުރާއަތެއްކަން ފުލުހުން ފާހަގަ ކޮށްފައި ވެ އެވެ.

ފުލުހުން އެދިފައިވާ ގޮތަށް ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓުގައި މިހާރު އެދިފައިވާ ކަން ވެސް ވަނީ އެނގިފަ އެވެ. އަދި އެ ގޮތަށް މައްސަލަ އަނބުރާ ގެންދެވޭނީ ކްރިމިނަލް ކޯޓުން އެ ކަމަށް ހުއްދަ ދީފިނަމަ އެވެ.

ދިފާއުގެ އެ ހެކި ސިއްރުކޮށްދިނުމަށް ވެސް ކްރިކް ރިޒާގެ ވަކީލުން ޝަރީއަތުގައި ކުރިން އެދިފައިވެ އެވެ. ނަމަވެސް ޝަރީއަތުގެ ކުރިން ހުށަހަޅާ ހުށަހެޅުމެއްގެ ގޮތުގައި ކްރިކް ހުށަހެޅި އެ ހުށަހެޅުން ބަލައިނުގަތުމަށް ކޯޓުން އޭރު ނިންމި އެވެ.

ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގައި ހިމެނޭ އެ މުއާމަލާތުގެ މައްސަލާގައި އެމަނިކުފާނުގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލު ކުރުމުގެ ދައުވާ އެވެ.

ފަހުން އައިސް ޖެހިޖެހިގެން ފަސް ފަހަރެއްގެ މަތިން އެ މައްސަލައިގެ އަޑުއެހުން ނުބޭއްވި ކެންސަލް ކުރަން ޖެހުނީ ވެސް ކްރިކް ރިޒާ ބަލިވެ އުޅޭ ކަމަށް ބުނެ ކޯޓަށް ހާޒިރުނުވުމުންނެވެ. ބަލިވެ އުޅޭ ކަމުގެ މެޑިކަލް ސެޓްފިކެޓް އައިޖީއެމްއެޗުން ހޯދައި ހުށަހަޅާފައިވެ އެވެ.

ނަމަވެސް އެއީ އެއްވެސް ޓެސްޓެއް ނުހަދާ ހުށަހެޅި ލިޔުންތަކެއް ކަމަށް ބެލެވޭތީ އެ ކަމުގައި ފިޔަވަޅުތަކެއް އެޅުމަށް ޕީޖީން މަސައްކަތްކުރާ ކަން އެނގިފައިވެ އެވެ.

ފުއްގިރި މައްސަލައިގެ ފަސްފަހަތް؛

ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ޔާމީން، މއ. ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައިވެ އެވެ.

އެމްއެމްޕީއާރްސީގެ ތެރެއިން ފުއްގިރި ކުއްޔަށް ދޫކުރީ ބިޑަކާ ނުލާ ދުބާއީ ކުންފުންޏެއް ކަމަށްވާ ކްލެސިކް ސިޓީ އައިލެންޑް ހޯލްޑިންގްސްއާ އެވެ. އެ ކުންފުންޏަށް ފުއްދިރި ދިނީ 1.55 މިލިއަން ޑޮލަރަށެވެ. ފުއްގިރި ކުއްޔަށް ދިނުމުގައި ރިޝްވަތުގެ ކަންތައްގަނޑެއް ހިންގާފައިވާއިރު, ޕެންޑޯރާ ޕޭޕާސްގައި ހާމަވި ގޮތުގައި އޭގެ ފަހަތުގައި ތިބީ އިންޑިއާގެ ނުޒޫފުގަދަ ވިޔަފާރިވެރިންތަކެވެ.

ރިޒާގެ ނަމުގައި ބޭންކު އޮފް ސިލޯނުގައި ހުޅުވާފައިވާ އެކައުންޓަކުން ސަން ކޮންސްޓްރަކްޝަނަށް 1.1 މިލިއަން ޑޮލަރު ދޫކޮށްފައިވަނީ މެއި 29، 2016 ގަ އެވެ. "އިންހައުސް ޓްރާންސްފާ" އެއް ގޮތަށް ސަން އިންވެސްޓްމަންޓުން ބޭންކް އޮފް އިންޑިއާގައި ހުޅުވާފައިވާ އެކައުންޓަކަށް ޖަމާކުރީ ޖޫން 7، 2016 ގަ އެވެ.

އަދި ހަމަ އެ ތާރީހުގައި އެ ފައިސާއަށް އަށްސަތޭކަ ޑޮލަރު އިތުރުކޮށްފައި އިސްލާމިކް ބޭންކުގައި ޔާމީންގެ ނަމުގައި ހުޅުވާފައިވާ އެކައުންޓަށް ޖަމާކޮށްފައިވެ އެވެ.

ޔާމީނާއި ކްރިކް ރިޒާ އަދި ސަންގެ ކުންފުނިތަކުން ބުނާ ގޮތުން ރ. ފުއްގިރި ކުއްޔަށް ދިނުމަށް ހިނގާފައިވާ މުއާމަލާތާއި ޔާމީނާއި ސަންގެ ކުންފުނިތަކާ މެދު ހިނގާފައިވާ މުއާމަލަތަކީ މުޅިން އެހެން މުއާމަލާތެއް ކަމަށެވެ. އެއީ ސަންގެ ކުންފުންޏަކާ ދެމެދު ހިނގި ޑޮލަރު މާރު ކުރުމުގެ މުއާމަލާތެއް ކަމަށް އެ ފަރާތްތަކުން ބުނެ އެވެ. އެ ކަން ސާބިތު ކުރަން ދިފާއީ ހެކިތަކެއް ވެސް ހުށަހަޅާފައިވެ އެވެ.