އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގެ ސަލާމަތީ ކަންކަން ބެލެހެއްޓުން ފުލުހުންނާ ހަވާލުކޮށްފި އެވެ.

އެ މަސައްކަތް ފުލުހުންނާ ރަސްމީކޮށް ހަވާލުކުރީ މިއަދު ދަރުބާރު ގޭގައި ބޭއްވި ހާއްސަ ރަސްމިއްޔާތެއްގަ އެވެ. އިންތިހާބުގެ ސަލާމަތީ ކަންކަން ބެލެހެއްޓުމުގެ އެއްބަސްވުމުގައި ފުލުހުންގެ ފަރާތުން ސޮއިކުރީ ކޮމިޝަނާ އޮފް ޕޮލިސް މުހައްމަދު ހަމީދު އެވެ. އަދި އިލެކްޝަންް ކޮމިޝަނުގެ ފަރާތުން ސޮއިކުރީ އެ ކޮމިޝަނުގެ ރައީސްް ފުއާދު ތައުފީގެވެ.

މިއަދު ސޮއި ކުރީ، އިލެކްޝަންސް ކޮމިޝަންސްގެ ސަލާމަތީ ކަންކަމާއި އިންތިހާބާ ގުޅުންހުރި ކަމެއްގެ ގޮތުގައި މި އެއްބަސްވުމުގައި ބަޔާންކޮށްފައިވާ އެނޫން ވެސް ކަންކަމުގައި އިލެކްޝަން ކޮމިޝަނުން އެދިއްޖެ ނަމަ އެހީތެރިކަން ފޯރުކޮށްދިނުމުގައި ދެފަރާތުން އަމަލުކުރާނެ ގޮތްތަކާ ހަމަތައް ބަޔާންކުރާ ފަހުމުނާމާއެއް ކަމުގައި ފުއާދު ވިދާޅުވި އެވެ.

އެފަދަ އިންތިހާބުތަކުގެ ސެކިއުރިޓީ ބެލެހެއްޓުމާއި ހިނގާ ހަމަނުޖެހުންތައް ހުއްޓުވުންފަދަ ކަންކަމުގައި ފުލުހުންގެ ދައުރު ބޮޑެވެ. އެންމެ ފަހުން މިދިޔަ ޖެނުއަރީ 21، ގައި ބޭއްވި އެމްޑީޕީގެ ޕްރައިމެރީ އިންތިހާބުގައި ވެސް ގިނަ ހަމަނުޖެހުންތަކެއް ހިނގާފައި ވެއެވެ. އަދި އެކަމާއި ގުޅިގެން ބައެއް މީހުން ހައްޔަރު ވެސް ކުރި އެވެ.

މި ފަހަރުގެ އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 280،000 އަށް އަރާއިރު، ރާއްޖޭގެ އާބާދީގެ އެންމެ ގިނަ މީހުން ދިރިއުޅޭ މާލޭގައި ބަހައްޓާ ވޯޓު ފޮށީގެ އަދަދު ވެސް ވަރަށް ބޮޑަށް އިތުރުވެ އެވެ.

ކޮމިޝަނުން އެންމެ ފަހުން ހާމަކުރި ގޮތުގައި މި އިންތިހާބުގައި ބަހައްޓާ ވޯޓު ފޮށީގެ އަދަދު 600 އަށްވުރެ އިތުރެވެ.

ސެޕްޓެމްބަރު މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބަށް ބާކީ 88 ދުވަސް އޮތް އިރު، މިހާތަނަށް އިންތިހާބުގާ ވާދަކުރައްވާ ބައެއް ކެންޑިޑޭޓުން ވަނީ އެކަން އިއުލާންކޮށްފަ އެވެ.

ވެރިކަންކުރާ އެމްޑީޕީގެ ޓިކެޓުގައި ނުކުންނަވާނީ ރައީސް އިބްރާހިމް މުހައްމަދު ސޯލިހު އެވެ. މި ސަރުކާރުގެ ކޯލިޝަނުގައި އޮތް ނަމަވެސްް ޖުމްހުރީ ޕާޓީ ރިޔާސީ އިންތިހާބުގައި ވަކިން ނުކުތުމަށް ނިންމާ އެ ޕާޓީގެ ލީޑަރު ގާސިމް އިބްރާހިމަށް ވަނީ ޓިކެޓު ދީފަ އެވެ.

އަދި، އިދިކޮޅު ޕީޕީއެމުން ވަނީ އެ ޕާޓީގެ ރިޔާސީ ޓިކެޓު، މިވަގުތު ޖަލުގައި ހުންނެވި ކުރީގެ ރައީސް އަބްދުﷲ ޔާމީނަށް އަރުވާފަ އެވެ. ނަމަވެސް ޖަލު ހުކުމުގެ ސަބަބުން ޔާމީނުގެ ކެންޑިޑެސީއާމެދު ވަނީ ސުވާލު އުފެދިފަ އެވެ.

އޭގެ އިތުރުން ކުރީގެ ބަންޑާރަ ނައިބު ޑރ. މުހައްމަދު މުނައްވަރު އަމިއްލަ ގޮތުންް ވާދަކުރައްވާނެކަން އިއުލާނުކުރައްވާފައި ވެއެވެ.

މިދިޔަ އަހަރު އުފެއްދި އެމްއެންޕީގެ ޓިކެޓުގައި ކުރީގެ ޑިފެންސް މިނިސްޓަރު އަދި ދަނގެތީ ދާއިރާގެ މެންބަރު ކާނަލް މުހައްމަދު ނާޒިމް އާއި ކުރީގެ ހޯމް މިނިސްޓަރު އުމަރު ނަސީރު އަދި އަލަށް ޕާޓީއެއް އުފައްދަން އެދިފައިވާ އަހުމަދު އާތިފް ވެސް ވަނީ ރިޔާސީ އިންތިހާބުގައި ވާދަކުރައްވާނެކަން އިއުލާންކޮށްފި އެވެ. އަދި، އެމްޑީޕީގެ ރައީސް މުހައްމަދު ނަޝީދު އިސްވެ އަލަށް އުފައްދަވާ ދަ ޑިމޮކްރެޓްސް ޕާޓީންވެސް ވަނީ ރިޔާސީ ކެންޑިޑޭޓެއް ނެރޭނެ ކަމަށް ބުނެފަ އެވެ.