ޕޯސްޓުން ދިވެހިރާއްޖެއަށް ގެނައި ޕެކޭޖަކުން މަސްތުވާތަކެތި ފެނުނު މައްސަލައެއްގައި މީހަކު ތަހުގީގަށް ބަންދު ކުރަން ކޯޓަށް ގެންދިޔުމުން އެ ޕެކޭޖު ބަލައި ދިޔައީ ރައްޓެއްސެއް ބުނެގެން ކަމަށް އޭނާ ބުނެފި އެވެ.

ޕޯސްޓުން ގެނައި ޑްރަގް ޕެކޭޖަކާ ހަވާލުވާން ދިޔަ އުމުރުން 28 އަހަރުގެ ދިވެހި ފިރިހެނަކު އިއްޔެ ވަނީ ހައްޔަރުކޮށްފަ އެވެ. އަދި ކްރިމިނަލް ކޯޓުން ވަނީ އޭނާގެ ބަންދަށް 10 ދުވަސް ދީފަ އެވެ.

އޭނާގެ ބަންދު އަމުރުގައިވާ ގޮތުން ޕޯސްޓް އޮފީހުން އޭނާ ހަވާލުވި ޕެކޭޖު ތެރޭގައި ގިނަ އަދަދެއްގެ ޑްރަގް އަޅާފައި ހުރި ދެ ޝީޓު ހުއްޓެވެ. އެކަމަކު، އެ ޑްރަގްގެ ބަރުދަން އަދި އެނގިފައި ނުވެ އެވެ.

އޭނާގެ މައްޗަށް ފުލުހުން ކުރަނީ ދިވެހިރާއްޖެއަށް ޑްރަގް އެތެރެކުރުން، ޓްރެފިކް ކުރުން އަދި ބޭނުންކުރުމުގެ ތުހުމަތެވެ. އޭނާގެ ކުޑަކަމުދާތަކެތި މަސްތުވާތަކެއްޗަށް ޕޮޒިޓިވްވެފައިވާ ކަމަށް ވެސް އެ އަމުރުގައިވެ އެވެ.

އޭނާ ކޯޓުގައި ބުނެފައި ވަނީ އެ ޕެކޭޖު ބަލައި ދިޔައީ ރައްޓެއްސަކު ބުނެގެން ކަމަށެވެ. އަދި އޭގައި މަސްތުވާތަކެތި ހުރި ކަމެއް ނޭނގޭ ކަމަށް އޭނާ ބުންޏެވެ.

މީހެއްގެ އަތުން 14 ގްރާމަށް ވުރެ ގިނައިން ކެނަބިސް ފެނިއްޖެ ނަމަ ނުވަތަ ހަތަރު ގްރާމަށް ވުރެ ގިނައިން ޑައިމޯފިން ފެނިއްޖެ ނަމަ އެ މީހަކު ޑްރަގް ޓްރެފިކިންއަށް ގެންގުޅުނު ތަކެތި ކަމަށް ބެލެވޭނެ އެވެ. އެ ކުށަށް އޮންނަ އަދަބަކީ 25 އަހަރަށް ޖަލަށްލުމާއެކު 100،000ރ. އާއި 10،000،000ރ. ދެމެދުގެ އަދަދަކުން ޖޫރިމަނާ ކުރުމެވެ.

މީގެ ކުރިން ވެސް ޕޯސްޓުން ޑްރަގް އެތެރެ ކުރި މައްސަލަތަކުގައި ޑްރަގް ޓްރެފިކިންގެ ދައުވާ ސާބިތުވެގެން މީހުން 25 އަރަށް ޖަލަށްލާފައި އެބަ ހުއްޓެވެ.