އިންޑިއާގެ ބެންގަލޫރުގައި ކުރިއަށްދާ ފަސް ވަނަ އިންޑިއަން އޯޕަން ޕެރަ އެތުލެޓިކްސްގެ އިންޓަނޭޝަނަލް ޗެމްޕިއަންޝިޕުގައި ވާދަކޮށް ރާއްޖޭގެ މުހައްމަދު މާޒިން ރަން މެޑަލް ހޯދައިފި އެވެ.

މި މަހުގެ 5-7 އަށް ބެންގަލޫރުގައި ކުރިއަށްދާ ފަސް ވަނަ އިންޑިއަން އޯޕަން ޕެރަ އެތުލެޓިކްސްގެ އިންޓަނޭޝަނަލް ޗެމްޕިއަންޝިޕުން މާޒިން ރަން މެޑަލް ހޯދީ ޓީ11 ކެޓަގަރީގެ 100 މީޓަރު ދުވުމުންނެވެ. މާޒިން ރޭސް ނިންމީ 16.39 ސިކުންތުންނެވެ.

މިއީ, ޕެރަލިމްޕިކްސްގައި ރާއްޖެއިން ހޯދި ފުރަތަމަ ރަން މެޑައްޔެވެ. މާޒިންގެ ގައިޑެއްގެ ގޮތުގައި މި އިވެންޓުގައި ދުވެފައިވަނީ ހުސައިން ޝިފާޒް އެވެ.

ފަސް ވަނަ އިންޑިއަން އޯޕަން ޕެރަ އެތުލެޓިކްސްގެ އިންޓަނޭޝަނަލް ޗެމްޕިއަންޝިޕުގައި އިންޑިއާގެ ގިނަ އެތުލީޓުން ވާދަކުރާއިރު، ރާއްޖެ، ގްރީސް، ފިލިޕީންސް، ސްރީ ލަންކާ، ބަންގްލަދޭޝް، ކަޒަކިސްތާން، ކިރިގިސްތާން އަދި މޮންގޯލިއާ އިންވެސް އެތުލީޓުން އަންނަނީ ވާދަކުރަމުންނެވެ.

މި މުބާރާތަކީ މި އަހަރު ޗައިނާގައި އޮންނަ އޭޝިއަން ޕެރަލިމްޕިކް ގޭމްސް އާއި މި އަހަރު ޕެރިހުގައި އޮންނަ ވޯލްޑް ޕެރަ އެތުލެޓިކްސް ޗެމްޕިއަންޝިޕްގެ ކޮލިފައިން އަށް ޕޮއިންޓް ލިބޭ މުބާރާތެކެވެ.

ރާއްޖެ އަށް ފުރަތަަމަ ރަން މެޑަލް ހޯދައިދިން މާޒިން ވަނީ މީގެ ކުރިން 2019 ގެ އިންޑިއަން އޯޝަން އައިލެންޑް ގޭމްސްގައި ވާދަކޮށް ރާއްޖެ އަށް ލޯ މެޑަލް ހޯދައިދީފަ އެވެ.

ރާއްޖޭގައި މި ވަގުތު ހުރި އެންމެ ކާމިޔާބި ޕެރަ އެތުލީޓު މާޒިން އަންނަނީ ބައިނަލްއަގްވާމީ މެޑަލްތަކެއް ހޯދުމަށްޓަކައި ގިނަ ތަމްރީންތަކެއް ހަދަމުންނެވެ. އެ ގޮތުން މި އަހަރުގެ އައިއޯއައިޖީގައި ވެސް މެޑަލް ހޯދުމަކީ އޭނާގެ އަމާޒެކެވެ.

މީގެ ތިން އަހަރު ކުރިން، 2019 ވަނަ އަހަރުގެ އައިޯއައިޖީގައި ތައްޔާރީތަކަށް ބަލާއިރު މާޒިން އަށް ރަން މެޑަލް ހޯދުމުގެ ފުރުސަތު ބޮޑުކޮށް އޮތެވެ. ނަމަވެސް ރޭސް ފެށި ވަގުތު އޭނާގެ ފަޔަށް އެރި ތަދެއްގެ ސަބަބުން މާޒިން އަށް ރޭސް ނިންމާލެވުނީ އޭނާގެ ލަފާކުރި ޓައިމިން އަށް ވުރެ ލަހުންނެވެ.