ސަރުކާރުގެ ފެނާއި ކަރަންޓު ދޭ ކުންފުނި، ފެނަކައިން އެކިއެކި ކުންފުނިތަކަށް ދަރާފައިވާ މައްސަލައިގައި އިދިކޮޅުން ހުށަހެޅި ކުއްލި މައްސަލަ ބޭރުކޮށްލާފައިވަނިކޮށް، އެކަމާ ގުޅިގެން ގަރާރެއް މަޖިލީހަށް ވައްދައިފި އެވެ.

މަޖިލީހުގެ މިއަދުގެ ޖަލްސާގައި މި ގަރާރު ހުށަހަޅުއްވާފައިވަނީ ކުއްލި މައްސަލަ ވެސް ހުށަޙެޅުއްވި މަޑުއްވަރީ ދާއިރާގެ މެންބަރު އާދަމް ޝަރީފެވެ.

ފެނަކަ ކުންފުނިން ހިދުމަތްތައް ހޯދުމަށް ފަހު 2.8 ބިލިއަނަށް ވުރެ ގިނަ ރުފިޔާ ކުންފުނިތަކަށް ދަރާފައިވާ ކަމަށް މަސްދަރުތައް ބުނެ އެވެ.

މިއަދު ހުށަހެޅި ގަރާރުގައި ވަނީ ފެނަކައިން ދަރާފައިވާ ފައިސާ ދޫކުރެވޭނެ ނިޒާމެއް ހަމަ ޖައްސައި، ފެނަކައިގެ މެނޭޖުމަންޓާއި ފައިނޭންޝަލް އޮޑިޓެއް ހެދުމަށާއި ދަރަނި އަދާކުރެވޭނެ ގޮތުގެ ޕްލޭނެއް ހެދުމަށް ގޮވައިލައިފަ އެވެ.

"އެ ފައިސާ ނުލިބި ގިނަ ދުވަސްވުމުގެ ސަބަބުން ކުދި ވިޔަފާރިތަކަށް ބޮޑެތި މާލީ ދަތިތަކާ ކުރިމަތިވެ، މުސާރަ ނުދެވި އަދި ކުލި ނުދެއްކުން ފަދަ ކަންކަން ހަމަޖެއްސުމަށް ދަތިވެ ވިޔަފާރިތައް ހުއްޓި، ބަނގުރޫޓުވާ ހިސާބަށް ގޮސްފައި،" ގަރާރުގައި ބުނެފައިވެ އެވެ.

ފެނަކައިން ލާރި ނުދޭ މައްސަލައިގައި އަމިއްލަ ކުންފުނިތަކުން ވަނީ ފާއިތުވީ ހަފްތާގައި އެ އޮފީސް ކުރިމަތީގައި މުޒާހަރާ ވެސް ކޮށްފަ އެވެ.

ގަރާރާއި ކުއްލި މައްސަލަ؛ ތަފާތަކީ ކޮބާ؟

މި މައްސަލައިގައި ފާއިތުވީ ހަފްތާގައި ހުށަހެޅި ކުއްލި މައްސަލަ ބޭރުކޮށްލާފައިވަނީ ދެ ވޯޓު މަދުވެގެންނެވެ. ބަލައިގަންނަ ފެންނަ ކަމަށް 15 މެންބަރުން ވޯޓު ދެއްވިއިރު ނުފެންނަ ކަމަށް 18 މެންބަރުން ވޯޓު ދެއްވި އެވެ. މައްސަލަ ބަލައިގަންނަން 17 ވޯޓު ބޭނުން ވެ އެވެ.

ކުއްލި މައްސަލައަކީ އެޖެންޑާ ކުރުމެއް ނެތި މަޖިލީހުގެ ޖަލްސާ ފެށޭ ގަޑިއަށް ހުށަހެޅޭ "ކުއްލި" ހުށަހެޅުންތަކެވެ. ބޭނުމަކީ ސަރުކާރުގެ ސަމާލުކަމަށް ކަންކަން ގެނައުމެވެ. ކުއްލި މައްސަލައެއް ހުށަހެޅިއްޖެނަމަ ރައްޔިތުންގެ މަޖިލީހުގެ އެދުވަހުގެ އެޖެންޑާ މަޑުޖައްސާލުމަށްފަހު، މަޖިލީހުން ފުރަތަމަ އިންސާފުކުރަންޖެހެނީ ހުށަހެޅިފައި އޮތް ކުއްލި މައްސަލައަށެވެ.

އެހެންނަމަވެސް ކުއްލި މައްސަލައަށް ބަހުސް ކުރިނަމަވެސް ނުކުންނާނެ ނަތީޖާއެއް ނޯވެ އެވެ. ވޯޓެއް ނެގުމެއް، ތަޅުމުން ފާސްކުރުމެއް ނޯންނާނެ ނުވަތަަ އެ ނޫން ވެސް ނިންމުންތަކެއް ނިންމުމެއް ނޯންނާނެ އެވެ.

އެއާ ހިލާފަށް ގަރާރަށް ބަހުސްކޮށް، ކޮމިޓީއަށް ފޮނުވައި ލަފާ ދޭނެ ގޮތުގެ ރިޕޯޓު ވެސް އެކުލަވައިލެވޭނެ އެވެ. އެހެންނަމަވެސް ބިލުގެ މައްޗަށް ހިނގާ އުސޫލު ގަރާރުގެ މައްޗަށް ހިނގި ނަމަވެސް ތަންފީޒު ކުރުން ލާޒިމެއް ނުވެ އެވެ.