ޕިކަޕެއް ފަހަތަށް ޖައްސާލި ވަގުތު އެ އުޅަނދުން ޖެހި އެކްސިޑެންޓުވެގެން ރ. މަޑުއްވަރީ މީހަކު މިއަދު މަރުވެއްޖެ އެވެ.

މަރުވީ އެ ރަށު ކައުންސިލުގެ ސެކްރެޓަރީ ޖެނެރަލް އަހުމަދު އަސްލަމް، 40، އެވެ. އޭނާ މަރުވިއިރު އަންބަކާއި ތިން ކުދިން ތިބެ އެވެ.

ފުލުހުން ބުނީ އެ މައްސަލައިގެ ތަހުގީގު ކުރަމުންދާ ކަމަށެވެ.

އެކްސިޑެންޓުވުމުން އަސްލަމް ގެންދިޔައީ އެ އަތޮޅު އުނގޫފާރު ހޮސްޕިޓަލަށެވެ. އެތަނަށް ގެނައިއިރު ވެސް އޭނާ މަރުވެފައިވާ ކަމަށް ހޮސްޕިޓަލުން މި ނޫހަށް މައުލޫމާތު ދިނެވެ.

"ގާތްގަނޑަކަށް 1:25 ގައި ހޮސްޕިޓަލަށް ގެނެވުނީ. ގެނައި އިރު ވެސް މަރުވެފައި އޮތީ. ދެން މިހާރު އިތުރަށް ކުރަންޖެހޭ ކަންކަން ހޮސްޕިޓަލުން ކުރަމުންދާނެ. މިވަގުތު ފުލުހުންގެ ތަހުގީގުގައި އެމީހުން ބޭނުންވާ ކަންކަން ކުރުމުގެ މަސައްކަތް ދަނީ،" އެ ހޮސްޕިޓަލުގެ ތަރުޖަމާނު ހަސަން ފަޒީލް ވިދާޅުވި އެވެ.