އއ. މަތިވެރިން 73 އަހަރުގެ ފިރިހެނަކު ގެއްލިގެން ހޯދަމުންދާ ކަމަށް އެ ރަށު ކައުންސިލުން ބުނެފި އެވެ.

ގެއްލިގެން ހޯދަމުންދަނީ އެ ރަށު ހަސަން އަލީ (ހަސަންފުޅު) ނަމަކަށް ކިޔާ މީހެކެވެ.

މަތިވެރި ކައުންސިލްގެ ރައީސް އަހުމަދު އަސްލަމު "އަދަދު" އަށް ވިދާޅުވީ ގެއްލިގެން ހޯދަމުންދާ މީހާ އެންމެ ފަހުން ފެނިފައިވަނީ ރޭގެ ވަގުތެއްގައި ކަމަށެވެ. މިހާރު އެ ރަށުގެ އާންމުން އޭނާ ހޯދުމަށް މަސައްކަތް ކުރަމުންދާ ކަމަށް ވިދާޅުވި އެވެ.

"ފަސް ގުރޫޕަކަށް ބަހާލައިގެން، އެއް ގުރޫޕް މޫދު ބަލަމުން އަނެއް ހަތަރު ގުރޫޕް ރަށުތެރެ ބަލަމުން މިދަނީ، ޑްރޯން ވެސް ބޭނުންކުރަމުން ދަނީ," އަސްލަމު ވިދާޅުވި އެވެ.

މި މައްސަލައިގާ ފުލުހުންގެ މީޑިއާ އޮފިޝަލު "އަދަދު" އަށް ވިދާޅުވީ މަތިވެރިން 73 އަހަރުގެ ފިރިހެނަކު ގެއްލިގެން އުޅޭ ކަމުގެ ރިޕޯޓެއް މިއަދު ހެދުނު 09:37 ހާއިރު ލިބިފައިވާ ކަމަށާއި އެ މީހާ ހޯދުމުގެ މަސައްކަތް ފުލުހުން ވެސް ކުރަމުންދާ ކަމަށެވެ.