މެޑްރިޑް (ޖެނުއަރީ 22) - ސްޕެނިޝް ލީގުގައި ރޭ ރެއާލް ވަލޮޑޮލިޑް އަތުން 3-0 އިން މޮޅުވެ، އެތުލެޓިކޯ މެޑްރިޑް ލީގުގެ ހަތަރު ވަނައިގައި އޮތްއިރު، ރަށުންބޭރުގައި 2-0 އިން ރަޔޯ ވަޔެކާނޯ ބަލިކޮށް ރެއާލް ސޮސިއެޑާޑުން އެ ޓީމުގެ ރަނގަޅު ފޯމު ދަމަހައްޓައިފި އެވެ.

ރޭގެ ނަތީޖާތަކާ އެކު، ސޮސިއެޑާޑުން ވަނީ ލީގުގެ ދެ ވަނައިގައި އޮތް ރެއާލް މެޑްރިޑާ ޕޮއިންޓުގެ ގޮތުން އެއްވަރުކޮށްފަ އެވެ. އެއް ވަނައިގައި އޮތް ބާސެލޯނާ އަށް 16 މެޗުން 41 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް ވަނީ 16 މެޗުން 38 ޕޮއިންޓް ލިބިފަ އެވެ. ތިން ވަނައިގައި އޮތް ސޮސިއެޑާޑަށް 18 މެޗުން ވަނީ 38 ޕޮއިންޓް ލިބިފަ އެވެ. ހަތަރެއްގައި އެތުލެޓިކޯ އޮތީ 18 މެޗުން 31 ޕޮއިންޓް ހޯދައިގެންނެވެ.

އެތުލެޓިކޯގެ ވަންޑާ މެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗުގައި އެ ޓީމުގެ ތަރި އަކީ އެންޓޮއިން ގްރީޒްމަން އެވެ. މެޗުގެ 18 ވަނަ މިނިޓްގައި ގްރީޒްމަން ދިން ބޯޅައަކުން އެތުލެޓިކޯ އަށް ލީޑުނަގައިިދިނީ އަލްވާރޯ މޮރާޓާ އެވެ. މޮރާޓާ މި ލަނޑު ޖެހީ، ވަލޮޑޮލިޑްގެ ކުޅުންތެރިއަކު ކައިރިން ނައްޓައިފަ އެވެ. މެޗުގެ 23 ވަނަ މިނިޓްގައި، އެތުލެޓިކޯގެ ނަހުއެލް މޮލީނާ ނެގި ހުރަހަކަށް އަރައި، އެ ޓީމުގެ ދެ ވަނަ ގޯލު ޖެހީ ގްރީޒްމަން އެވެ.

މެޗުގެ 28 ވަނަ މިނިޓްގައި، އެތުލެޓިކޯގެ ތިން ވަނަ ގޯލު ޖެހީ މާރިއޯ ހާމޯސޯ އެވެ. މިއީ ގްރީޒްމަން ހިލޭ ޖެހުމަކުން ނަގައިިދިން ބޯޅައަކުން، ހާމޯސޯ ބޮލުން ފޮނުވާލި ހަމަލާ ވަލޮޑޮލިޑްގެ ކީޕަރު ޖޯޑީ މަސިޕް މަތަކުރުމުން ރީބައުންސް ބޯޅަ ގޯލަށް ވައްދާލައިގެން ޖެހި ގޯލެކެވެ.

ދާދި ފަހުން، ބާސެލޯނާ ދޫކޮށް އެތުލެޓިކޯ އަށް ބަދަލުވި މެމްފިސް ޑިޕާއި މި މެޗުގެ ދެ ވަނަ ހާފުގައި ކުޅެން އެރި އެވެ. ދެ ވަނަ ހާފުގައި އެތުލެޓިކޯ އަށް ގޯލެއް ޖަހައިދިނުމާ އެންމެ ގާތަށް ޖެހިލީ އެންހެލް ކޮރޭއާ އެވެ. އޭރިއާތެރެއިން އޭނާ ޖެހި ބޯޅަ އަމާޒުވީ ގޯލުގެ ދަނޑިއަށެވެ.

ރަޔޯ ވަޔެކާނޯ ކޮޅަށް ސޮސިއެޑާޑަށް ލީޑުނަގައިިދިނީ 15 ވަނަ މިނިޓްގައި ނޯވޭގެ ފޯވާޑް އަލެކްސަންޑަ ސޯލޯތު އެވެ. މިއީ ސޮސިއެޑާޑްގެ ޑޭވިޑް ސިލްވާ ދިން ބޯޅައަކުން ސޯލޯތު ޖެހި ގޯލެކެވެ. ސޮސިއެޑާޑްގެ ދެ ވަނަ ގޯލު ޖެހި އަންޑާ ބަރެނެޓްޒާ އެވެ.

ސެވިއްޔާ އިން ވަނީ 1-0 އިން ކަޑިޒް ބަލިކޮށް ރެލިގޭޝަނުން ސަލާމަތްވާން މުހިންމު މޮޅެއް ހޯދައިފަ އެވެ. މި މެޗުގައި ސެވިއްޔާގެ ހަމައެކަނި ގޯލު މެޗުގެ ފަހުކޮޅުގައި ޕެނަލްޓީ އަކުން ކާމިޔާބުކުރީ އިވާން ރަކިޓިޗް އެެވެ. މި މެޗުގައި ސެވިއްޔާގެ ކޯޗު ޖޯޖް ސަމްޕައޮލީ، ރެފްރީގެ ނިންމުންތަކާ މެދު ހިތްހަމަނުޖެހުން ފާޅުކުރި ގޮތުން ވަނީ ކާޑު ދައްކައި، ބެންޗުން ފޮނުވާލައިފަ އެވެ.