އެމްޑީޕީގެ ފިކުރަކީ ރަސްކަން ނިމުމަކަށް ގެނެސް ދައުލަތަށް ލިބޭ އެއްޗަކުން އެންމެމަށް ކަންކަން ކޮށްދީގެން އުޅުން ކަމަށާއި އެއީ ވަކި މީހެއްގެ އެއްޗެއް ނޫން ކަމަށް އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ މޫސާ) ވިދާޅުވެއްޖެ އެވެ.

ރައީސް ސޯލިހުގެ ރިޔާސީ ޕްރައިމަރީ ކެމްޕޭނުގައި ރ. މީދުއަށް ވަޑައިގެން އެރަށުގައި ރޭ ބޭއްވި ޖަލްސާގައި ވާހަކަދައްކަވަމުން މޫސަ ވިދާޅުވީ, އެމްޑީޕީން ވިސްނީ ކުރީ ޒަމާނުގައި ރާއްޖޭގައި އޮތް ރަސްކަމުގެ އުސޫލުތަކާ ވަކިކޮށް, ދައުލަތަށް ލިބޭ އެއްޗަކުން އެންމެން ހިއްސާވެގެން އުޅުން ކަމަށެވެ. އެގޮތުން ބޭރުގެ މާހިރުންގެ ލަފާ ވެސް ހޯއްދެވި ކަމަށް އޭނާ ވިދާޅުވި އެވެ.

"އެމްޑީޕީއަކީ ދިވެހިރާއްޖޭގެ ރައްޔިތުންނަށްޓަކައި އަޅުގަނޑުމެން އުފެއްދި ޕާޓީއެއް. މީހެއްގެ އެއްޗެއް ނޫން. އަޅުގަނޑުމެން ހުރިހާ ރައްޔިތުންގެ އެއްޗެއް. ދިވެހި ރާއްޖޭގެ ރައްޔިތުންގެ ތެރެއިން އެމްޑީޕީގެ ފިކުރު ބަލައިގަތް އެންމެންގެ އެއްޗެއް،" ޖޯޝާއެކު ޖަލްސާގައި ވާހަކަދައްކަވަމުން ރީކޯ ވިދާޅުވި އެވެ.

މޫސަ ވިދާޅުވީ ސިޔާސީ ޕާޓީގެ ކަންކަން އުނގަންނައި ދިނުމަށް އައި އިނގިރޭސިވިލާތުގެ ބައެއްގެ ލަފަޔާއެކު ރައްޔިތުންނަށް ބޭނުންވާ ކަންކަން ގަނޑަކަށް ތިރި ކުރި ކަމަށެވެ. ރައްޔިތުންނަށް ބޭނުންވާ ކަންކަމާއި ރާއްޖޭގައި ހުރި މައްސަލަތައް ނޯޓުކޮށްގެން ފުރަތަމަ އެމްޑީޕީން އުފެއްދި ވައުދުތަކަކީ ވަކި މީހެއްގެ އެއްޗެއް ނޫންކަން ފާހަގަކުރައްވާ ރީކޯ ވިދާޅުވީ އެއީ އެމްޑީޕީގެ މެންބަރުންގެ އެއްޗެއް ކަމަށެވެ.

އޭނާ އިތުރަށް ވިދާޅުވީ އެމްޑީޕީގެ ޕްރައިމަރީއަކީ އެމްޑީޕީގެ ގޭތެރޭގެ މައްސަލައެއް ކަމަށާއި, އޭނާ ޕާޓިން ނެރުނީވެސް އެތެރޭގެ މައްސަލައެއްގައި ކަމުން އެވާހަކަ ނުދައްކަވާނެ ކަމަށެވެ. އަދި ވިދާޅުވީ ގޭތެރޭގައި ހިނގާ ކަންތައްތަކުގެ ވާހަކަ މީހުންގެ ތެރޭގައި އޭނާ ނުދައްކާނެ ކަމަށެވެ.