މެޑްރިޑް، ސްޕެއިން (ޑިސެމްބަރު 8) - މި ފަހަރުގެ ފީފާ ވޯލްޑް ކަޕްގެ ނާކާމިޔާބީއާ ގުޅިގެން ސްޕެއިންގެ ކޯޗު ލުއިސް އެންރީކޭ މަގާމުން ވަކިކޮށްފި އެވެ.

ވޯލްޑް ކަޕްގެ ގަދަ 16 ބުރުގައި މިދިޔަ އަންގާރަ ދުވަހުގެރޭ ކުޅުނު މެޗުން ސްޕެއިން ކެޓީ ލަނޑެއް ނުޖެހި އެއްވަރުވެ، ޕެނަލްޓީ ޖަހައިގެން މޮރޮކޯ އަތުންނެވެ. އެ މެޗަށް ފަހު އެންރީކޭ ބުނީ އޭނާގެ މުސްތަގުބަލާ ގުޅޭގޮތުން ވާހަކަ ދައްކާނީ ޗުއްޓީ އަކަށް ދިއުމަށް ފަހު ކަމަށެވެ.

އެކަމަކު، ސްޕެއިން ފުޓްބޯޅަ ފެޑެރޭޝަނުން މިއަދު ނެރުނު ބަޔާނެއްގައި ބުނެފައިވަނީ ސްޕެއިންގެ ކޯޗުކަމުން އެންރީކޭ ވަކިކުރިކަން އޭނާ އަށް އަންގާފައިވާނެ ކަމަށެވެ. އެންރީކޭ އަށް ވަޒީފާ އިން ވަކިކުރިކަން އެންގީ ސްޕެއިން ފުޓްބޯޅަ ފެޑެރޭޝަންގެ ރައީސް ލުއިސް ރުބިއާލެސް އާއި ސްޕޯޓިން ޑިރެކްޓަރު ހޯސޭ ފްރަންސިސްކޯ މޮލީނާ އެވެ.

ސްޕެއިން ފުޓްބޯޅަ ފެޑެރޭޝަނުން ބުނީ ގައުމީ ޓީމަށް ދެން ގެންނާނެ ކޯޗެއްގެ ކަންކަން ނިންމާނީ މުސްތަގުބަލަށް ވެސް ވިސްނައި، އެންމެ ކަމުދާ ކޯޗަކަށް ކަމަށެވެ. އެ ގޮތުން ސްޕެއިނުން ހެޑް ކޯޗަކަށް ގެނައީ ސްޕެއިންގެ ޔޫތު ފުޓްބޯޅައިގައި 2013 ވަނަ އަހަރުން ފެށިގެން މަސައްކަތް ކުރަމުން އަންނަ ލުއިސް ޑެ ލާ ފުއެންޓޭ އެވެ.

ބާސެލޯނާ އާއި ރޯމާ އަށް ކުރިން ކޯޗުކޮށްދިން އެންރީކޭ، 52، ސްޕެއިންގެ ކޯޗުކަމާ އެންމެ ފުރަތަމަ ހަވާލުވީ 2018 ވަނަ އަހަރުގެ ވޯލްޑް ކަޕަށް ފަހު އެވެ. އެކަމަކު، އާއިލީ ކަމެއްގައި 2019 ވަނަ އަހަރުގެ ހަަތަރު މަސް ދުވަހު އެންރީކޭ ވަނީ ސްޕެއިންގެ ކޯޗުކަމުން ދުރުވެފަ އެވެ. އެ މުއްދަތުގައި ސްޕެއިނަށް ކޯޗުކޮށްދިނީ އޭނާގެ އެކުވެރިޔާ، އަދި އެސިސްޓަންޓް ކޯޗު ރޮބާޓޯ މޮރޭނޯ އެވެ.

އެންރީކޭ، 2019 ވަނަ އަހަރުގެ ނޮވެމްބަރު މަހު ގައުމީ ޓީމަށް އެނބުރި އައިސް، ނޫސްވެރިންގެ ބައްދަލުވުމުގައި ވާހަކަ ދައްކަމުން ބުނީ، މޮރޭނޯ ބޭނުންވީ އޮޅުވާލައިގެން ސްޕެއިންގެ ކޯޗުގެ މަގާމު ހޯދަން ކަމަށާއި އެކަމަކު، ފަށާފައިވާ ޕްރޮޖެކްޓެއް އެހެން މީހަކާ ހަވާލުކުރުމަކީ އެންމެ ރަނގަޅު ގޮތެއް ކަމަށް ނުފެންނާތީ އަލުން ގައުމީ ޓީމަށް އެނބުރި އައީ ކަމަށެވެ.

ދެ ފަހަރެއްގެ މަތިން ސްޕެއިންގެ ކޯޗުކަން ކުރި އެންރީކޭ ވަނީ އެ ޓީމަށް 45 މެޗު އިރުޝާދުދީފަ އެވެ. އެ މެޗުތަކުގެ ތެރެއިން 25 މެޗުން މޮޅުވިއިރު، ނުވަ މެޗުން ވަނީ ބަލިވެފަ އެވެ.

ސްޕެއިނުން ވަނީ އެންރީކޭގެ ކޯޗުކަމުގައި މިިދިޔަ އަހަރުގެ ޔޫރޯ ފުޓްބޯޅަ މުބާރާތުގެ ސެމީ ފައިނަލާއި މިދިޔަ އަހަރުގެ ނޭޝަންސް ލީގުގެ ފައިނަލާއި މި އަހަރުގެ ވޯލްޑް ކަޕްގެ ގަދަ 16 ބުރުގައި ވާދަކޮށްފަ އެވެ. ޔޫރޯގެ ސެމީ ފައިނަލުގައި ޕެނަލްޓީ ޖަހައިގެން ކެޓީ އެ މުބާރާތުގެ ޗެމްޕިއަން، އިޓަލީ އަތުންނެވެ. ނޭޝަންސް ލީގުގެ ފައިނަލުގައި ބަލިވީ ފްރާންސް އަތުންނެވެ. އަދި މި ފަހަރުގެ ވޯލްޑް ކަޕްގެ ގަދަ 16 ބުރުގައި މޮރޮކޯއާ ވާދަކޮށް ޕެނަލްޓީ ޖަހައިގެން ބަލިވީ އެވެ.

އެންރީކޭ، ސްޕެއިންގެ ކޯޗުކަމުގައި ހުރިިއިރު، އެންމެ ބޮޑަށް ފާޑުކިޔުން އަމާޒުވި ނިންމުންތަކަކީ މިދިޔަ އަހަރުގެ ޔޫރޯ ފުޓްބޯޅަ މުބާރާތަށް ނެގި ސްކޮޑުން ރެއާލް މެޑްރިޑްގެ އެއްވެސް ކުޅުންތެރިއަކަށް ފުރުސަތު ނުދިނުމުގެ އިތުރުން، ތަޖުރިބާކާރު ކުޅުންތެރިޔާ، އަދި ކުރީގެ ކެޕްޓަން ސާޖިއޯ ރާމޯސް އަށް މިދިޔަ އަހަރުގެ ޔޫރޯ އާއި މި ފަހަރުގެ ވޯލްޑް ކަޕް ސްކޮޑުން ޖާގަ ނުދިން މައްސަލައިގަ އެވެ.

މި ފަހަރުގެ ވޯލްޑް ކަޕަށް އެންރީކޭ ނެގި ސްކޮޑުގައި ޖުމްލަކޮށް ބަލާއިރު، ތިބީ ގިނަ ޒުވާން ކުޅުންތެރިންނެވެ. ވޯލްޑް ކަޕް ކަަަހަަލަ ބޮޑު މުބާރާތެއްގެ ތަޖުރިބާ މަދު ކުޅުންތެރިން ނަގާފައިވާތީ، ސްޕެއިންގެ ކުރީގެ ކޯޗުން ވެސް ވަނީ އެންރީކޭގެ ނިންމުންތަކާ މެދު ހިތްހަމަނުޖެހުން ފާޅުކޮށްފަ އެވެ.

އެންރީކޭ އަކީ މި ފަހަރުގެ ވޯލްޑް ކަޕް ނަތީޖާތަކާ ގުޅިގެން ޓީމު ދޫކޮށްލި ކޯޗުންގެ ލިސްޓަށް އިތުރުވި ނަމެކެވެ. މީގެ ކުރިން މެކްސިކޯގެ ކޯޗު ޓަޓާ މާޓީނޯ, ބެލްޖިއަމްގެ ކޯޗު ރޮބާޓޯ މާޓީނޭޒް، ގާނާގެ ކޯޗު އޮޓޯ އައްޑޯ އަދި ދެކުނު ކޮރެއާ އަށް އިރުޝާދުދިން ކޯޗު ޕައޮލޯ ބެންޓޯ ހިމެނެ އެވެ.

ޖަރުމަނުން ވަނީ އެ ޓީމުގެ ކޯޗުގެ މަގާމުގައި ހަންސީ ފްލިކް ދެމިހުންނާނެ ކަމަށް ބުނެފަ އެވެ. އެކަމަކު، ޕްރެޝަރު ބޮޑުވެފައިވާ ކޯޗުންނަށް ބަލާއިރު، ގަތަރުގެ ކޯޗު ފީލިކްސް ސަންޗޭޒް، އިރާންގެ ކާލޯސް ކުއެރޯޒް، ވޭލްސްގެ ރޮބް ޕޭޖް، ޑެންމާކްގެ ކެޝްޕާ ހިއުލްމަންޑް، އުރުގުއޭގެ ޑިއޭގޯ އަލޮންސޯ އަދި ސާބިއާގެ ޑްރަގަން ސްޓޮއިކޮވިޗް ހިމެނެ އެވެ. މީގެ އިތުރުން އިކުއެޑޯގެ ކޯޗު ގުސްޓާވޯ އަލްފާރޯ އާއި ކެނަޑާގެ ކޯޗު ޖޯން ހާޑްމަން އަންނަނީ އެ ޓީމާ އެކު ހަދާފައިވާ ކޮންޓްރެކްޓް ހަމަވެފައިވާތީ، އެއްބަސްވުން އާ ކުރަން މަޝްވަރާ ކުރަމުންނެވެ.