އަލް ރައްޔާން، ގަތަރު (ނޮވެމްބަރު 22) - ވޯލްޑް ކަޕް ފުޓްބޯޅަ މުބާރާތުގައި މިރޭ ވޭލްސްގެ ކެޕްޓަން ގަރެތު ބޭލް ފަހު ވަގުުތު ވައްދާލި ގޯލުން އެ ޓީމުން 1-1 އިން އެމެރިކާއާ އެއްވަރުކޮށްފި އެވެ.

ވޯލްޑް ކަޕް ގްރޫޕް ސްޓޭޖުގެ ގްރޫޕް ބީގައި އެމެރިކާ އާއި ވޭލްސް ވާދަކުރި މެޗު އެއްވަރުވުމާ އެކު މި ގްރޫޕުގެ އެއް ވަނައިގައި މި ވަގުތު އޮތީ މިރޭ އިރާން އަތުން 6-2 އިން މޮޅުވި އިންގްލެންޑެވެ.

މިރޭގެ މެޗު ފަށައިގެންވެސް ވޭލްސްގެ ފަހަތަށް އެމެރިކާއިން ދިޔައީ ބާރުބޮޑު ކުރަމުންނެވެ. މިގޮތުން މެޗުގެ އަށްވަނަ މިނެޓުގައި އެމެރިކާގެ ފޯވާޑް ޓިމޮތީ ވެއާ އަރިމަތިން ނަގައިދިން ބާރު ހުރަސް ވޭލްސްގެ ޑިފެންޑަރު ޖޯ ރޮޑޮން ބޮލުގައި ޖެހިފައި ބައިގޯލާ ދިމާއަށް ދިޔަ ވަގުތު ވޭލްސްގެ ކީޕަރު ވެން ހެނެސީ އެ ބޯޅަ ދިފާއުކުރި އެވެ. އޭގެ ފަހުން ވޭލްސްގެ ޑިފެންޑަރުންނަށް ރަނގަޅަށް އެ ބޯޅަ ސާފުކޮށްނުލެވިގެން އުޅެނިކޮށް ލިބުނު ފުރުސަތުގައި އެމެރިކާގެ ފޯވާޑް ޖޯޝުއާ ސާޖަންޓު ބޮލުން ފޮނުވާލި ހަމަލާ އަރިމަތީ ދަނޑިގައި ޖެހިފައި އަމާޒުވީ ބޭރު ދާގަނޑަށެވެ.

ވޭލްސް އަށް ރަނގަޅަށް މެޗުގެ ތެރެއަށް ނުވަދެވި އުޅެނިކޮށް މެދުތެރެއިން ގިނަ ބޯޅަތަކެއްގެ ކޮންޓްރޯލް ހޯދައި އެމެރިކާ އިން އިތުރަށް ނުރައްކާ ކުރި އެވެ. ނަތީޖާ އެއްގެ ގޮތުން އެޓީމުން މެޗުގެ ފުރަތަމަ ގޯލް ޖަހައި ލީޑުވެސް ނެގި އެވެ.

އެމެރިކާ ޓީމުގެ ގޯލު ޖެހި ޓިމޮތީ ވެއާ ލަނޑަށް ފަހު އުފާފާޅުކުރަނީ.

މެޗުގެ 36 ވަނަ މިނެޓުގައި އެމެރިކާގެ ގޯލު ޖަހައިދިނީ ލައިބީރިއާގެ ރައީސް އަދި ކުރީގެ މަޝްހޫރު ކުޅުންތެރިޔާ، ޖޯޖް ވެއާގެ ދަރިފުޅު ޓިމޮތީ ވެއާ އެވެ. މެދުތެރެއިން ލިބުނު ބޯޅައާ އެކު ކުރިއަށް ޖެހިލައި ކްރިސްޓިއަން ޕުލިސިޗް ދިން ޕާހަކުން މި ގޯލް ވެއާ ޖެހީ އޮފްސައިޑް މަޅިން ސަލާމަތްވެ، ކީޕަރު ހެނެސީ ކުރިއަށް ނުކުތް ވަގުތު ތިރީ ކަނަށް ބޯޅަ ފޮނުވާލައިގެންނެވެ. މިއީ ވެއާ އެމެރިކާ ޓީމަށް ޖަހައިދިން ފުރަތަމަ ގޯލެވެ.

ދެ ވަނަ ހާފަށް ވޭލްސް އިން ކުޅެން ނެރުނީ ފޯވާޑް ޑެނިއެލް ޖޭމްސްގެ ބަދަލުގައި ކެއިފާ މޯ ކުޅެން އަރުވައިގެންނެވެ. މޯ ކުޅެން އެރުވުމާ އެކު ވޭލްސްގެ އެޓޭކުތައް ރަނގަޅުވެ، އެޓޭކިން ލައިނުގައި ބޯޅަ ހިފަހައްޓައިގެން ކުޅޭ މިންވަރު އިތުރުވި އެވެ.

ވޭލްސް އިން ކުރިއަށް ޖެހިގެން ކުޅެން ފެށުމުގެ ނަތީޖާއަކަށްވީ އެ ޓީމަށް ގޯލް ޖަހާނެ ރަނގަޅު ފުރުސަތުތައް ލިބެން ފެށުމެވެ. އެ ގޮތުން އަރިމަތިން ލިބުނު ހިލޭ ޖެހުމަކުން އޭރިއާ ތެރެއަށް ނެރުނު ބޯޅައެއްގެ އެމެރިކާގެ ކުޅުންތެރިންނަށް ދިފާއުނުކުރެވިގެން އުޅެނިކޮށް ވޭލްސްގެ ބެން ޑޭވިސް ބޮލުން ފޮނުވާލި ބާރު ހަމަލާ އެމެރިކާގެ ކީޕަރު މެޓް ޓާނާ ދިފާއުކުރި އެވެ.

އޭގެ މިނެޓެއް ފަހުން ވޭލްސް އަށް ލިބުނު ކޯނަރަކުން އަނެއްކާވެސް އެޓީމުން ނުރައްކާ ކުރި އެވެ. ހެރީ ވިލްސަން ނަގައިދިން ކޯނަރުން މޯ ބޮލުން ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.

ދެ ވަނަ ހާފުގައި އެމެރިކާ އަށް މާ ރަނގަޅު ހަމަލާތަކެއް ނުއުފެއްދުނެވެ. މެދުތެރެއިން ގިނަ ބޯޅަތަކެއް ހޯދައިގެން ކުރިއަށް ޖެހިގެން ހުއްޓުމެއްނެތި ވޭލްސް އިން ކުރަމުން ދިޔަ މަސައްކަތް ކާމިޔާބުވީ މެޗުގެ 81 ވަނަ މިނެޓުގަ އެވެ.

އޭރިއާ ތެރެއަށް އާރޮން ރަމްސޭ ނަގައިދިން ބޯޅަ ކޮންޓްރޯލް ކުރަން އުޅުމުގެ ތެރޭގައި ވޭލްސްގެ ކެޕްޓަން ބޭލް އަށް އެމެރިކާގެ ޑިފެންޑަރު ވޯލްކާ ޒިމާމަން ކުރި ފައުލަކަށް ރެފްރީ ވަނީ ޕެނަލްޓީ އެއް ދީފަ އެވެ. ވޭލްސް އަށް މި ޕެނަލްޓީ ކާމިޔާބުކޮށްދީ ނަތީޖާ ހަމަހަމަކޮށްދިނީ ބޭލް އެވެ.

މިއީ 64 އަހަރު ފަހުން ވޯލްޑް ކަޕްގައި ކުޅުނު ވޭލްސް އިން ޖެހި ފުރަތަމަ ގޯލެވެ. އަދި މިއީ ގައުމީ ޓީމަށް އެންމެ ގިނަ މެޗު ކުޅެގެން ވޭލްސްގެ ކުރީގެ ތަރި ކްރިސް ގަންޓާ ހަދާފައިވާ ރެކޯޑާ މިރޭ އަރާ ހަމަކުރި ބޭލް ގައުމީ ޓީމަށް ޖަހައިދިން 41 ވަނަ ގޯލެވެ.

ވޭލްސްގެ ގޯލަށްފަހު ކުރިއަށް ޖެހިލައިގެން އެމެރިކާ އިން ކުޅުނު ނަމަވެސް އެޓިމަށް ގޯލެއް ޖަހާނެ ހުސް ފުރުސަތެއް ނުލިބުނެވެ. ފުރަތަމަ ހާފާ ހިލާފަށް ދެވަނަ ހާފުގައި ވޭލްސްގެ ޑިފެންސް ލައިނު ފެނުނީ ވަރަށް ވަރުގަދަކޮށެވެ.

ވޯލްޑް ކަޕްގެ ގްރޫޕް ސްޓޭޖުގައި ވޭލްސް ކުޅޭ ދެވަނަ މެޗުގައި ނުކުންނާނީ އީރާންއާ ދެކޮޅަށެވެ. އެމެރިކާ ނުކުންނާނީ އިންގްލެންޑާ ދެކޮޅަށެވެ.