ބާމިންހަމް (އޮކްޓޫބަރު 25) - ހުސްވެެފައިވާ އެސްޓަން ވިލާގެ ކޯޗުކަމާ އާސެނަލަށް ކުރިން އިރުޝާދުދިން ސްޕެއިންގެ ކޯޗު އުނާއި އެމެރީ ހަވާލުވާން ނިންމައިފި އެވެ.

ވިލާގެ ކޯޗުގެ މަގާމު ހުސްވީ 11 މަސް ދުވަހަށް ފަހު ސްޓީވެން ޖެރާޑް އެ ޓީމުގެ ކޯޗުކަމުން ވަކިކުރުމުންނެވެ. ޖެރާޑް ވަކިކުރީ މިދިޔަ ހަފްތާގައި ފުލަމް އަތުން 3-0 އިން ބަލިވި މެޗަށް ފަހު އެވެ. މިދިޔަ އާދިއްތަ ދުވަހު ލީގުގައި ވިލާ އިން ކުޅުނީ ވަގުތީ ކޯޗު ޑޭންކްސްގެ އިރުޝާދުގެ ދަށުންނެވެ. އެ މެޗުން ވަނީ ބްރެންޓްފޯޑް އަތުން 4-0 އިން މޮޅުވެފަ އެވެ.

ވިލާ އިން އެމެރީ ކޯޗަކަށް ގެނައިއިރު، އޭނާއާ އެކު ވިޔަރެއާލުން ހަދާފައިވާ ކޮންޓްރެކްޓް އުވާލަން ވަނީ ހަ މިލިއަން ޑޮލަރުގެ ފީއެއް ދައްކައިފަ އެވެ. އެމެރީ ވިޔަރެއާލްގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. އެކަމަކު، ވިލާ އިން އަވަހަށް އެމެރީ ގެނައުމުގެ ކަންކަން ނިންމައިލީ އެވެ. އެމެރީ އަށް ދޭނީ ކިތައް އަހަރުގެ ކޮންޓްރެކްޓެއް ކަމެއް ވިލާ އިން ހާމަކޮށްފައެއްނުވެ އެެވެ.

މިހާރު އޮތްގޮތުން ރަސްމީކޮށް އެމެރީ، ވިލާއާ ހަވާލުވާނީ އަންނަ މަހުގެ އެއް ވަނަ ދުވަހުގަ އެވެ. އެއީ އޭނާގެ ވޯކް ޕާމިޓްގެ ކަންކަން ފުރިހަމަވުމަށް ފަހު އެވެ.

ބާވީސް އަހަރަށް ފަހު، އާސެން ވެންގާ، 2018 ވަނަ އަހަރު އާސެނަލްގެ ކޯޗުކަން ދޫކޮށްލުމުން ދެން އެ މަގާމަށް ގެނައީ އެމެރީ އެވެ. އެކަމަކު، 2019 ވަނަ އަހަރުގެ ނޮވެމްބަރު މަހު އާސެނަލުން ވަނީ އެމެރީ މަގާމުން ވަކިކޮށްފަ އެވެ. ދެން، އެމެރީ ހަވާލުވީ 2020 ވަނަ އަހަރު ވިޔަރެއާލާ އެވެ. އޭނާ ވަނީ މެންޗެސްޓާ ޔުނައިޓެޑް ބަލިކޮށް 2021 ވަނަ އަހަރު ވިޔަރެއާލަށް ޔޫރޮޕާ ލީގު ކާމިޔާބު ކޮށްދީފަ އެވެ. އެއީ ސެމީ ފައިނަލުގައި އާސެނަލް ވެސް ބަލިކުރުމަށް ފަހު އެވެ.

މީގެ ކުރިން ސެވިއްޔާ އަށް ތިން ފަހަރު ޔޫރޮޕާ ލީގު ކާމިޔާބުކޮށްދިން އެމެރީ ވަނީ މިދިޔަ ސީޒަނުގައި ވިޔަރެއާލް ގޮވައިގެން ޗެމްޕިއަންސް ލީގުގެ ސެމީ ފައިނަލުގައި ވެސް ވާދަކޮށްފަ އެވެ. އާސެނަލް ކޯޗެއްގެ ގޮތުގައި މަސައްކަތްކުރި 18 މަސް ދުވަހުގެ ތެރޭގައި އޭނާ ވަނީ އެ ޓީމު ގޮވައިގެން ޔޫރޮޕާ ލީގުގެ ފައިނަލުގައި ކުޅެފަ އެވެ.

ފްރާންސްގެ ޗެމްޕިއަންކަން އެއް ފަހަރު ޕީއެސްޖީ އަށް ހޯދައިދިން އެމެރީ ވަނީ މީގެ ކުރިން ރަޝިއާގެ ސްޕާޓާ މޮސްކޯ އާއި ސްޕެއިނުގެ ވެލެންސިއާ އާއި އަލްމޭރިއާ އަދި ލޯކާ ޑިޕޯޓިވާ އަށް ވެސް ކޯޗުކޮށްދީފަ އެވެ.