ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބަހުރެއިނަށް މިހާރު ކުރައްވަމުން ގެންދަވާ ދަތުރުފުޅުގައި ހަތަރު އެއްބަސްވުމެއްގައި ސޮއިކުރައްވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.

ކޮންމެ ބުރާސްފަތި ދުވަހަކު މިއުވާން ދެއްވާ ނޫސްވެރިންގެ ބައްދަލުވުމުގައި ވާހަކަދައްކަވަމުން އޭނާ ވިދާޅުވީ ރާއްޖެ އާއި ބަހުރެއިނާ ދެމެދު ސޮއި ކުރާ ހަތަރު އެއްބަސްވުމަކީ ހާރިޖީ ދާއިރާ އަދި ކުޅިވަރުގެ ދާއިރާއިން ވެވޭ އެއްބަސްވުންތަކެއް ކަމަށެވެ.

ރާއްޖެއާ ބަހުރެއިނާ ދެމެދު ވެވޭ އެއްބަސްވުންތައް

• ފޮރިން ސާވިސް އިންސްޓިޓިއުޓް މޯލްޑިވްސް އާއި ބަހުރެއިނުގެ މުހައްމަބު ބިން މުބާރަކް އަލް ހަލީފާ އެކަޑަމީ ފޯ ޑިޕްލޮމެޓިކް ސްޓަޑީޒްއާ ދެމެދު ވެވޭ އެއްބަސްވުން
• ޕޮލިޓިކަލް ކޮންސަލްޓޭޝަން ކުރިއަށް ގެންދިއުމަށް ވެވޭ އެއްބަސްވުން
• ޒުވާނުންނާއި ކުޅިވަރުގެ ދާއިރާއިން ދެގައުމުގެ ދެމެދު ގުޅުން ބަދަހި ކުރުމަށް ވެވޭ އެއްބަސްވުން
• މޫސުމީ ބަދަލުތަކުގެ ދާއިރާއިން ވެވޭ އެއްބަސްވުން

އެއްބަސްވުންތަކާ ބެހޭ އިތުރު މައުލޫމާތު ހާމަ ނުކުރައްވާ މިއުވާން ވިދާޅުވީ އެއްބަސްވުންތަކުގައި ސޮއި ކުރުމަށްފަހު ފޮރިން މިނިސްޓްރީން އިތުރު މައުލޫމާތު ހާމަ ކުރާނެ ކަމަށެވެ.

ބަހުރެއިނުގެ ރަސްގެފާނު ހަމަދު ބިން އީސާ އަލް-ޚަލީފާގެ ދައުވަތަކަށް ރައީސް ސޯލިހުގެ ދެކަނބަލުން ބަހުރެއިނަށް ވަޑައިގެން ހުންނެވިއިރު ރާއްޖެއާއި ބަހުރެއިނާ ދެމެދު ވެވޭ އެއްބަސްވުންތަކުގައި ރާއްޖޭގެ ފަރާތުން ސޮއި ކުރުމަށް ހަމަޖެހިފައި ވަނީ ހާރިޖީ ވަޒީރު އަބްދުﷲ ޝާހިދު އަދި ކުޅިވަރާ ބެހޭ ވަޒީރު އަހުމަދު މަހުލޫފެވެ.

ތިން ދުވަހުގެ ދަތުރުފުޅަށްފަހު ރައީސް ރާއްޖެ ވަޑައިގަންނަވަން ހަމަޖެހިފައި ވަނީ އަންނަ ހޮނިހިރު ދުވަހެވެ.

މިއީ ރައީސް ސޯލިހް ވެރިކަމާ ހަވާލުވެވަޑައިގެންނެވިފަހު ބަހުރެއިނަށް ކުރައްވާ ފުރަތަމަ ދަތުރުފުޅެވެ. ރާއްޖެ އާއި ބަހުރެއިނާ ދެމެދު ހާރިޖީ ގުޅުން ގާއިމުކުރީ މާޗު 4، 1980 ގައެވެ.