މިލާން (ސެޕްޓެމްބަރު 3) - އިޓާލިއަން ލީގުގައި މިރޭ އިންޓަ މިލާން އަތުން 3-2 އިން އެންމެ ފަހުގެ ޗެމްޕިއަން، އޭސީ މިލާން މޮޅުވިއިރު، ލާޒިއޯ 2-1 އިން ބަލިކޮށް ނަޕޯލީން ލީގުގެ އެއް ވަނަ އަށް ޖެހިލައިފި އެވެ.

ޔުވެންޓަސް މިރޭ ކުޅުނު މެޗުން ވަނީ ރަށުންބޭރުގައި ފިއޮރެންޓީނާއާ 1-1 އިން އެއްވަރުވެފަ އެވެ.

ނަޕޯލީ އެއް ވަނަ އަށް އެެރީ ދެ ވަނައިގައި އޮތް އޭސީ މިލާނާ އެއްވަރަށް ފަސް މެޗުން 11 ޕޮއިންޓް ހޯދައިގެންނެވެ. ތިން ވަނައިގައި އޮތް އެޓަަލަންޓާ އާއި ހަތަރެއްގައި އޮތް ރޯމާ އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ. ފަސް ވަނައިގައި އޮތް ޔުވެންޓަސް އާއި ހަ ވަނައިގައި އޮތް އިންޓަ އަށް ވަނީ ފަސް މެޗުން ނުވަ ޕޮއިންޓް ލިބިފަ އެވެ.

އިންޓަ އިން ލީޑުނެގީ މެޗުގެ 20 ވަނަ މިނިޓްގައި މާސެލޯ ބްރޮޒޮވިޗް ޖެހި ގޯލުންނެވެ. ޔަކީން ކޮރޭއާ ހާފުގެ މެދެއްހާ ހިސާބުން ލިބުނު ބޯޅަ ހިފައިގެން، ވަދެ ބްރޮޒޮވިޗް ވަނީ ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ. އިންޓަ އަށް ލީޑު ހިފަހައްޓައިލެވުނީ އަށް މިނިޓެވެ. މެޗުގެ 28 ވަނަ މިނިޓްގައި ސަންޑްރޯ ޓޮނާލީ ދިން ބޯޅަ، އޭރިއާތެރެއިން ރަފައެލް ލެއާއޯ ވަނީ ގޯލުގެ މަތީ ކަނަށް އަމާޒުކޮށްލައިފަ އެވެ.

ދެ ވަނަ ހާފްގެ ކުޅުން ފެށިގެން ފުރަތަމަ 15 މިނިޓް ތެރޭ މިލާނުން އިތުރު ދެ ގޯލު ޖެހި އެވެ. އެ ގޮތުން މެޗުގެ 54 ވަނަ މިނިޓްގައި މިލާންގެ ދެ ވަނަ ގޯލު ޖެހީ، އޮލިވިއޭ ޖިރޫޑް އެވެ. ލެއާއޯ ނެގި ހުރަހަކުން އޭރިއާތެރެއިން ޖިރޫޑް ފޮނުވާލި ބޯޅަ އަމާޒުވީ ގޯލުގެ ދުުރު ކަނަށެވެ. އޭގެ ހަ މިނިޓް ފަހުން، އިންޓަގެ ތިން ކުޅުންތެރިން ކައިރިން ދެމިގަތުމަށް ފަހު، އޭރިއާތެރެއިން ލެއާއޯ ޖެހި ބޯޅަ ވަނީ ގޯލުގެ ދުރު ކަނަށް އަމާޒުވެފަ އެވެ.

މިލާނުން ދެ ގޯލުގެ ލީޑެއް ނަގާފައިވަނިކޮށް އިންޓަ އަށް މެޗުގައި އުންމީދެއް ހޯދައިދިނީ އެޑިން ޖެކޯ އެވެ. މެޗުގެ 67 ވަނަ މިނިޓްގައި އިންޓަގެ ފުލްބެކް، މަޓެއޯ ޑާމިއާން ނެގި ހުރަހަކުން އޭރިއާތެރެއިން ޖެކޯ ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ. އިތުރު ގޯލެއް ޖަހައި، ނަތީޖާ ހަމަހަމަކުރަން އިންޓަ އިން ކުރި މަސައްކަތް ކާމިޔާބެއްނުވި އެވެ.

ލާޒިއޯ ދަނޑުގައި މިރޭ ކުޅުނު މެޗުގެ ހަތަރު ވަނަ މިނިޓްގައި އެ ޓީމުން ލީޑުނެގީ ކުރިއަށް ކުޅޭ މަޓިއާ ޒަގާނީ ޖެހި ގޯލުންނެވެ.

ފުރަތަމަ ހާފު ނިމުމުގެ ކުރިން ނަޕޯލީން އެއްވަރުކުރި އެވެ. މި ގޯލު ޖެހީ ޕިއޮޓްރޭ ޒިއެލިންސްކީ ދިން ބޯޅައަކުން ފަހަތަށް ކުޅޭ ކިމް ޖައެ އުން އެވެ. ދެ ވަނަ ހާފުގައި ނަޕޯލީ މޮޅުކޮށްދިނީ ކްވިޗާ ކްރަވަޝްކޭލިއާ ޖެހި ގޯލުންނެވެ. މި ލަނޑު ޖަހަން ފުރުސަތު ހޯދައިދިނީ ޒަމްބޯ އަންގީސާ އެވެ.

ފިއޮރެންޓީނާ ދަނޑުގައި ކުޅުނު މެޗުގެ ހަތަރު ވަނަ މިނިޓްގައި ޔުވެންޓަސް އިން ލީޑުނެގި އެވެ. މި ގޯލު ޖެހީ ޕޮލެންޑްގެ ފޯވާޑް، އާކަންޑިއުޝް މިލިކް އެވެ. މިއީ ޔުވެންޓަސްގެ ހުއާން ކުއަޑްރާޑޯ ނެގި ހުރަހަކުން، ފިިލިޕް ކޮސްޓިޗް ފޮނުވާލި ވޮލީ އޭރިއާ ރޮނގުކައިރިން ބޮލުން ގޯލަަށް ފޮނުވާލައިގެން މިލިކް ޖެހި ގޯލެކެވެ.

މެޗުގެ 29 ވަނަ މިނިޓްގައި ފިއޮރެންޓީނާގެ ކްރިސްޓިއަން ކޯމޭ ބޯޅަ ހިފައިގެން އޭރިއާތެރެއަށް ވަދެ، ޖެހި ގޯލުން ނަތީޖާ ހަމަހަަމަކުރި އެވެ. ފިއޮރެންޓީނާ އަށް ލީޑުނަގައިދޭން މެޗުގެ 44 ވަނަ މިނިޓްގައި ލޫކަ ޔޯވިޗް އަށް ރަނުގެ ފުރުސަތެއް ލިބުނެވެ. ޔޯވިޗް ޖެހި ޕެނަލްޓީ އަމާޒުވީ ގޯލުގެ ދަނޑިއަށެވެ.